Алмат Ысқақов ауыл шаруашылығы саласына тәуелсіздіктің алғашқы жылдары келді. Сол уақыттан бері ауданның, аймақтың, тіпті елдің ауыл шаруашылығы саласына серпін беруде қажырлы еңбек етіп келеді. Бүгінде ол «Сәрке батыр» ЖШС-ның даңғайыр диқанына айналған.

Кейіпкеріміз бастапқыда батыр атындағы шаруашылықта 2 жыл қарапайым жұмысшы болды. Кейін диқанның көмекшісі бола жүріп, күрішті баптаудың қыр-сырына қа­ныққан. Өзі де серіктестікте күріш егуге сұранады. Жұмысында жауапкершілікті бірінші орынға қоя­тын Әлекеңнің бұл ұсынысы жерде қалмады. Бастапқыда бри­гадир оған 50 гектар жерден мол өнім алуды міндеттейді. Сол жылы күзгі науқанда сенім үдесінен шық­қан ағамыз қамбаға қатарлас­тарынан артық астық құйды.
Диқанның аузын бақсақ, бү­гінде Сыр салысын күтіп-баптау­дың барлық әдісін жетік меңгерген. Бірақ «ісінен сөзі алда жү­­ре­тін­дердің» сұрпынан емес. Нә­­ти­жеге еңбек етіп, жыл сайын ас­тық­тан тау тұрғызады. Басшы­лық құрам оның былтыр да жоғары өнім алғанын жоққа шығармады.
– «Ауылда береке бар» дей­міз, бірақ сол береке өздігінен кел­­мейді. Оны қалыптастыратын Алмат сияқты осы ауылдың аза­мат­тары. Жалпы өзім Алмат Ысқа­­қовтың жұмысын жоғары ба­ға­­лаймын. Ұзақ жылдан бері ауыл шаруашылығы саласында ең­бек еткесін сала маман­да­рының, оның ішінде ди­қан­­дар­дың жұмысы оңай бол­майтынын жақсы білемін. Бірақ әріп­­тестерім сол қиындықтың бар­лығын ең­серіп, жыл сайын қам­баны ас­тыққа тол­тыруда. Күзгі нау­қанда ме­рейімізді асыратын да осы Алмат секілді диқандар, – дейді шаруа­шылық төрағасы Қанат Демесінов.
Ширек ғасырдан бері Алмат Ыс­қақов күріштің бірнеше сұрпын өсірді. Әлі күнге дейін Сыр са­лы­сының қай сұрпына қандай күтім қажет, бұл жағы еңбек ада­мына таң­сық емес. Ал мұндай ма­ман­ның күзгі науқанда төмен нә­тиже көр­сетуге де хақысы жоқ. Бұл жа­уап­кершілікті Әлекең жақсы біледі.
Қазіргі таңда батыр атындағы шаруашылықта бір бригадта 7 ди­қан бар. Соның бірі – Алмат Ыс­қақов. Ол қазір салаға жас­тардың келгеніне қуанады. Тіпті олар­мен жиған тәжірибесін бөлісіп, қай өнім­ге қандай күтім қажеттігін үй­ретіп келеді.
– Соңғы онжылдықтың басында шаруашылықтағы диқандардың ең жасы өзім едім, қазір ең үлкенімін. Шүкір, жастар көптеп келіп жатыр. Оларға осыған дейін салада түй­генімді үйретіп жүрмін. Күріш де­ген жерге дәнді тастап, күзге дейін суда ұстап, науқан соңында тек жинап алатын өнім емес. Осынша уақытта оған қандай күтім жа­са­латынын білмейтіндер көп. Мә­­селен, дән себілемін дегенше жер­дің өзі бірнеше өңдеуден өтеді. Егін егілгеннен кейінгі күнделікті күтімін қазір бастасам, кешке дейін айтатын дүние көп. Ол да бала сияқты, ерекше күтімді қажет етеді. Оны да қырқынан шығарасыз, одан кейін түсіне байланысты суды да кейде жиі ауыстырып оты­ру қажет. Күріштің суы ауысқан сайын жаны кіреді. Ал уақытында ауыс­тырмасаң, бойы аласа болып қалады. Бұлай шыққан егіннен мол астық аламын деу бос сөз. Осындай салада түй­гендерімді жас диқандарға үйретіп келемін. Ертең біздің жо­лы­­мызды жалғайтын жастар ғой. Сондықтан біз алдыңғы буын­нан алғанымызды оларға үй­ретуге міндеттіміз. Себебі ұрпақ са­бақ­тастығы өздігінен жүзеге ас­пайды, – дейді ағамыз.
Әлекең былтыр 50 гектар ал­қапқа күріш екті. Оның әр гек­та­рынан 60 центнерге жуық өнім алды. Биыл да осы меже сақталып отыр. Қазірдің өзінде Әлекеңнің егіс алқабы көгеріп келеді. Саға­ның соңында болғасын суды бә­рінен кейін алыпты. Көктемде ди­­қандармен бірге демалмады, да­­мыл таппай егіс басында жүрді. Өзі­нің жерін жыртуға келгенде ме­ха­ни­затордың қасынан табылды. Мұның бәрі мол астық алудың қамы еді. Қазірдің өзінде сол еңбектің есесі қайтып жатқандай. Себебі су астынан қылаң берген өнімнің шығымы жаман емес.
Алмат Ысқақов кент іргесіндегі Ақсу ауылында тұрады. Отбасында жары Ұлтай Иманқұлова екеуі 4 бала тәрбиелеп өсірді. Апамыз да осында аспаз болып жұмыс істейді. Ал ұлы Абзал Құ­дай­­бергенов ба­тыр атындағы шаруа­шылықта ме­ха­низатор болып еңбек етуде.
Биыл Әлекең 50 гектар жерге күріштің «Лидер» сұрпын еккен. Ал­дағы онкүндіктің соңында суды ауыстыруға бел буып отыр. Кү­ріштің әлгі сұрпы 120 күнде толық пісіп жетіледі екен. Шаруа­шы­лық ұжымы тұқымды да өздері дайын­дайды. Олар тұқымды 3 жыл сайын жаңартып отырады.
Былтыр аяқсудан айтарлықтай тапшылық байқалмады. Соның нәтижесі болар, Сыр диқандары күріштен мол астық жиды. Оның ішінде Жалағаш «Үздік аудан» но­ми­нациясына ие болды. Биыл да аяқсу қат болмаса, ауа райы диқандарға қарасып тұр. Алмат Ыс­қақов сияқты тәжірибелі маман­дар аман болса, өткен жылғы же­тіс­тікті қайталауға мүмкіндік мол.

К.БАЛҒАБАЙ