Соңғы жылдары ауданда кәсіпкерлік саласына серпін беруде жастардың қосқан үлесі зор. Бұл сөзімізге мемлекет тарапынан берілетін қолдаудан бөлек өз қаражаты есебінен шағын және орта бизнесте толайым табысқа қол жеткізген жас кәсіпкерлер дәлел. 2020 жылдан бастап жаңа жобаны қолға алып, кәсіпкерлік саласында өзіндік қолтаңбасын қалдырғандар қатарында жалағаштық Қанат Ермек те бар. Кейіпкеріміз сұранысқа сай құрылысқа қолданатын сапалы полистиролбетон мен газоблок шығарады.

Тілшілік тіршілікпен біз де шағын цехтың жұмысымен танысып, кәсіп­кер­дің алдағы жоспарына қатысты, жал­пы өндіріс орнының болашағы жа­йында бірқатар сауалымызға жауап алдық.
Қанат Ермек бұл кәсіпті бастауға өзі қаражат құйған. Кейін 2021 жылы «Бизнестің жол кар­тасы – 2025» мем­ле­кеттік бағдар­ламасы аясында инно­ва­циялық жобалар бойынша 2 млн теңге қай­тарым­сыз грант ұтып алған. Ал былтыр «Ауыл аманаты» бағ­дарла­масы шеңберінде 2,5 пайызбен 8,6 млн теңге несие алып, қа­жетті құрал-жаб­дықтар сатып алған. Ерекше құ­ры­лыс заттарын аудан, об­лыс кө­ле­мін­де сатылымға шығарып жүр­ген ол бұл кәсіпті ұзақ зерт­­­те­генін айтады.
– Негізгі мамандығым теміржол са­ласына қатысты. Бұл өнімді біраз уақыт зерттеп жүріп, 2020 жылы қолға алдым. Ал 2021 жылы газоблок өндірісін аш­тым. Қазіргі таңда 3 адамды тұрақты жұмыспен қамтып отырмын, – дейді ол.
Айта кетейік, полистиролбетон – компози­ция­­­лық құрылыс материалы. Жеңіл және ауыр бетонды араластыру техно­­логиясы арқылы түйіршіктелген кеуек пенопласт пен цементті қолдану ар­­қы­лы жасалады. Пенопласт өнімге жылу айыр­ғыш қасиет берсе, бетондық негіз оның беріктігін сақтайды. Мұндай құрылыс блоктары синтетикалық және минералдық құрамдастарды қиысты­рудың арқасында суыққа төзімді, ды­­быс айырғыш және оттан сақ­тай­тын қасиеттерге ие. Сон­дай-ақ жа­рам­ды­лық мерзімі де ұзақ.
Бұл өнім негізінен Гер­манияда пайда болған. Кейін Ресей мен Оңтүстік Ко­реяда дамып, бүгінде Алматы, Қара­ғанды қалаларында қолға алынып, ау­да­нда да мұндай өнім шығаратын шағын цех бүгінде жұмыс жасап тұр.
– Өнімімізді халыққа ұсынбас бұрын біз оны түрлі сынақтардан өткізіп көр­дік. Ауыр затпен ұру, биіктен төменге қа­рай лақтыру, үлкен жүк көлігімен басу арқылы біз оның басқа құрылыс зат­тарына қарағанда сапалы екенін аң­­ғардық. Жарылмайды, сынбайды, үгітілмейді, – дейді Қанат Ермек.
Иә, біз де өндіріс орнына келген соң «бұл өнімнің са­па­сын бірге көрейік» деген оймен кейіп­ке­рімізден өнімін кө­зімізше сынап көруді сұрадық. Ол көз ал­дымызда бір блокты темір балғамен ұрып, суға батырып, түрлі сынақтан өткізді. Нәтижесінде ша­ғын блоктың сапалы екеніне біз де көз жеткіздік.
– Полистиролбетон өнімі – көп­қа­бат­ты және жеке тұрғын үй салуға тап­­тыр­майтын құрылыс материалы. Ұзын­дығы – 60, биіктігі – 30, ені – 20 см. Өл­шемі қомақты болса да, салмағы бар болғаны 15 келі. Сонымен қатар по­листиролбетон дымқылға қарсы тұра алады. Сынақ барысында өздеріңіз бай­қағандай, суға қанша салса да, ылғал тартпайды. Дымқылдығы бар болғаны – 0,4 пайыз. Бұл материалға құрт-құмырсқа жоламайды. Суықтан қор­ғайды. Жылуды сақтайды, артық дыбыс пен шуды өткізбейді. Сондықтан бұл өнімге деген сұраныс күннен-күнге артып келеді. Ауданнан бөлек Қар­мақшы, Жезқазғаннан да келіп алатын тұрақты тұтынушыларым бар, – дейді жас кәсіпкер.
Ал газоблок – қуысты бетон туын­дылары қатарынан. Материалдың 85 пайызын газды көбік құрайды. Сон­дықтан қуысты бетон жеңіл сал­мақта болады. Газоблок судан, әктастан, це­мент пен кварц құмынан жа­салады. Ол отқа жанбайтын табиғи мине­ралды шикізаттан дайын­далады және жа­нуға көнбейді әрі мүлде отты қабыл­дамайды.
Кәсіпкер оның ша­ғын қабатты кар­кассыз салынатын биік­тігі 14 метр үй­лердің ішкі-сыртқы қабырғаларын қа­лауға да ыңғайлы әрі тиімді екенін ай­тады. Ал оның төзімділігі кәдімгі кір­піштің пайдалану мерзімімен бірдей екен. Өндірушілер сақтандыруды 80 жыл­ға береді. Аталған материалдан қа­ланған қабырғаның төзімділігі одан әріге барады, ешқандай бұзылуға жол бермейді және материал қасиеті өзі­нің негізгі сипатын сақтайды.
Жас кәсіп­кердің айтуынша, газо­блок­­тан тұрғызылған қабырғадан әрқа­шан жылу білініп тұрады. Мате­риал­дың тө­мен жылу өткізгіштігіне байланысты адам­нан жылуды аластатпайды, қайта жылудың болуын сақтайды. Ар­тық ылғалды сыртқа теуіп, газоблок «дем алады», сондықтан ол қа­быр­ғада бүлінбейді және зеңге, саңырау­құ­лақтануға қарсы.
Өніміне сұраныс жоғары екенін ес­кер­ген кейіпкеріміз алдағы уақытта ая­дай ғана ауласынан ашқан кәсібінің көк­жиегін кеңейтіп, өнім санын арт­ты­руды жоспарлап отыр. Ай­туынша, ол қазіргі таңда күніне 200 дана по­лис­тиролбетон мен 120 дана га­зоблок шығарады.
– Ауданнан осындай сапалы құры­лыс заттары өндіріліп жатқанына қуа­­­­­ныштымын. Қазір кенттің келбеті күн­­­нен-күнге жаңа ғимарат, үлкен үй­лер­мен көркейіп келеді. Мен былтыр Қа­наттың өнімін қолжетімді бағада сатып алып, үй салдым. Өнімі өте са­палы, ыза өтпейді. Қыста жылы, жазда салқын. Құрт-құмырсқа, тыш­қан деген атауымен жоқ, – дейді кент тұрғыны Сәкен Жайлаубаев.
– Әрине, жұмыстың оңайы жоқ, де­се де «еңбекпен жеген нан тәтті» де­мекші, өнімізді сапалы етіп халыққа ұсы­­нып, алғысын алуға тырысамыз. Це­хымыз шағын болса да барлық жағ­дай жасалған, – дейді Қанат.
Иә, «кәсіптің көзін тауып, жұмыс жа­саймын» деген жанға мемлекеттен қа­шанда қолдау бар. Жас болса да өзін ғана емес, аудан жұртын жұмыспен қам­тып, ел қажетіне жа­­райтын кейіпке­ріміз­дің бүгінде жұмысы жүйелі, кәсібі қар­қынды.
Ақтоты ЕРЖАНҚЫЗЫ