Өткен жылы ауданда облыс әкімі Нұрлыбек Нәлібаевтың тапсырмасына сәйкес, бақша дақылдарын егуге арналған арнайы жер дайындалып, тұрғындарға табысталған болатын. Нәтижесінде өңір халқы картоп, пияз, сәбіз секілді көкөністермен қоса, қауын, қарбыз егіп, қажетті азық-түліктерін жинап алды. Биыл да жергілікті халық бау-бақшалық жерге тұқым тастауға ынтасын білдіріпті. Себебі биыл бақша дақылдары жоспарланған көлемнен артық егілген. Демек, бұл жұмыстар қарапайым шаруа адамының күнкөріс деңгейіне оң әсер етуде. Бір артықшылығы техникалары бар шаруашылықтар жерді ашып, аяқ суын жеткізіп береді, тұрғындар тек егін егіп, оның күтіміне ғана жауапты болады. Осы орайда биыл өңірде жеке тұрғындардың бақша салуына 500 гектар жер дайындалған. Дайындалған 500 гектар жерге 921 отбасы 217,3 гектар картоп, 63 гектар көкөніс, 219,7 гектар бақша дақылдарын орналастырған. Бүгінде олардың алды қауын-қарбызын сабағынан үзіп, алғашқы өнімнен ауыз тиюде.

«Маңдайы терлемегеннің қазаны қай­намайды» деген тәмсілді естен шы­ғар­майтын Аққұм ауылының тұр­ғыны Темірбек Сарыбасов жаз келсе қол қусырып отырмай, сортаң жерді иге­ріп, бау-бақша дақылдарын егеді. Иә, диқаншы ағамыз биыл да жыл­дағы дәстүрден жаңылмапты. Ерте көк­темнен бастап 5-6 гектар жерге бақша дақылдарын егіп, жаз бойы бел жазбай еңбек етуде.

Бізде Аққұмға аяқ тіреген соң, Темір­бек ағаның бақша басына ба­руды жөн көрдік. Иә, ерте көктемнен бас­талған тынымсыз тіршілік еш кет­пегені көзге көрініп-ақ тұр. Бақшасы жай­қалып, өсіп тұр. Атыз арасында піскен қауынның иісі мұрынды жарады. Бүгінде балаларынан артылған қауын-қарбызды аудан орталығына апарып, көтерме бағада өткізуді жоспарлап отыр. Қауын, қарбыздан бөлек картоп, ас­қабақ тұқымын да тастапты. Ата жолын қуған немерелері де өзіне қол­ғабыс жасап жүр. «Осылардың арқа­сында бақша арам шөптен оталып қал­ды» дейді күліп, Темірбек аға.

– Мен бақша егумен көп жылдан бері айналысып келемін. Өткен жылы 5 гектар жерге дәл осылай егін еккен бола­тынмын. Шүкір, жаман емес, жер жақсы өнім берді. Биыл да ауыл­дағы «Аққұм-жер» шаруашылығы тұр­ғын­дарға бақша егуге арнайы жер дайындап берді. Әрине, бақша егу та­бан­дылық пен еңбекқорлықты қажет етеді. Көріп тұрғаныңыздай жаз бойғы еңбегіміздің нәтижесі жаман емес. Қарбыз, қауын, асқабақтың шығымы жақсы. Ең бастысы аяқ судан мәселе жоқ. Бақшаға да керегі су емес пе? Бұйырса, ертең қауын, қарбызды жинап, аудан орталығына немесе ауыл маңынан өтетін күре жолға шығып, сау­далаймын, – дейді шаруа адамы.

Темірбек аға иісі аңқыған қауынды үзіп алып, дәм татуды ұсынды. Әрине, сап-сары болып, пісіп тұрған қауыннан бас тарту мүмкін емес еді. Бақша басындағы қоста алғашқылардың бірі болып, тәтті қауынның дәмін тарт­тық. Бір қызығы шаруа адамы бос уақы­тында қоста жатып, интернет арқылы бақша егуді зерттеп тастапты. Бізге қауын, қарбыз егудің барлық қыр-сы­рын түсіндірумен болды.
Мәселен кеберсіген топырақты 2-3 рет суғарады екен. Алғашқы суғаруды тұқымның өсуі алдында не тұқым шыға салысымен жүзеге асырады, екіншісін сабақтары шыққан кезде, үшіншісін жеміс пісуінің алдында жасайды. Су­ғару жыртылған жер жанында өсіп жат­қан өсімдіктер бойынша жасалады, алайда судың көп мөлшерде болмауын қа­дағалау керек. Қарбыз бен қауынды ыстық күндері піскендерін іріктеп жи­найды. Дақылдарды жинауды ауа-райы суымай тұрғанға дейін аяқтайды. Сон­дай-ақ Темірбек аға Алматыдан бақ­шаға зиян келтіретін құстарды үркітетін арнайы құрылғы да сатып алыпты.

Жаз бойғы еткен адал еңбектің ар­қасында Темірбек Сарыбасовтың от­басы қауын, қарбыз, картоп, асқа­бақ­тың ешқайсысын сатып алмайды. «Қыстың қамын жаз ойла» демекші, шаруа адамы қыстық азығын осы жерден бұйыртып отыр. Үйдегі жең­геміз де қауыннан «қауынқұрт» жасап, ота­ғасы баптаған өнімдердің берекесін келтіріп, жаратады.

Иә, «Жер қадірін еккен білер» де­гендей еңбекқор, бірлігі мен тірлігі жарасқан Темірбек ағаның отбасының еңбегі қашанда зор құрметке ие.

Жандос ЖАЗКЕН