Қарақат Сейлханқызының би өнерін қолға алғанына 10 жылға жуықтаған. Ең алғаш балабақша қабырғасында қазақ биін билеген ару уақыт өте оған қызығушылығы артып, осы салаға бет бұрады. Бүгінде ол – аудандағы «Қарақат» би студиясының жетекшісі. Ашылғанына небәрі 3 ай болған орталық күні кеше Шымкент қаласында өткен халықаралық жарыста үздіктер қатарынан көрінді.

Кейіпкеріміз Шымкент қаласында өткен халықаралық «DANCE BATTLE» байқауына тура 1 ай дайындалғанын айтады. Аталған байқауға бірнеше облыс пен аудандардан 40 би тобы қатысқан. Жарысқа «Қарақат» би студиясының 5-6 жас ерекшелігіне қарай «Crystal» би тобы қатысып, «Көңілді қыздар достығы» биін орындаған. Қатысушыларға елімізге белгілі хореограф Б.Махаматсалиев, С.Үсейнова, Р.Абрахимова төрелік етті.
Кіл мықтылар бас қосқан байқауда ерекше биімен көпшіліктің көңілінен шығып, қазылар алқасының ыс­тық ықыласына бөленген жалағаштық жас өрендер халықаралық би сайысында І орынды иеленді. Мың бұралған бишілеріміз қазылар алқасын өнерімен таңдай қақтырып, «Жалағаштық бишілер – бүгінгі байқаудың үздіктері» деген мақтауды да естіп қайтты. Сондай-ақ бүлдіршіндердің жетекшісі Қарақат Се­йл­ханқызы да бұл байқауда арнайы ди­пломмен ма­ра­патталды.
– Өзім ес білгелі биге қатты қызығатынмын. Ең алғаш балабақшадағы Мақпал есімді жетекшім мені түрлі ша­ра­ларда биге дайындап, топтың алдына қойып, биге деген қызығушылығымды оятты. Содан бастап бала­бақшадағы, мектептегі барлық шараға белсене қатысып, әр ұлттың биін билеп, жарыстарға да қа­тыса бастадым. Бала күннен айналысқан сүйікті ісім бү­гінде мамандығыма ай­налды. М.Мәметова атындағы Қызылорда педагогикалық жоғары колледжінде білім алып, қазіргі таңда Қорқыт ата атындағы Қызылорда университетінде хореография мамандығы бойынша магис­тратура оқудамын. Мектеп оқыған жылдары бізде би үйірмесі көп болмады. Сол кезде осы саланың жолына түсіп, ауданда би студиясын ашамын деп алдыма нақты мақсат қойдым. Қазіргі таңда би топтары көп болғанымен, үйірмелер саусақпен санарлық. Десе де қыздарын биге қатыстырғысы келетін аналар көп, – дейді кейіпкеріміз.
Қарақат студиясы ең алғаш 20 баламен өз жұмысын бастаған. Ал қазіргі таңда мұнда 40-тан аса оқушы бар. Олар жас ерекшеліктеріне қарай 2 топқа бөлінеді. Үлкен топ 7-12 жас аралығы болса, кіші топ 5-6 жас аралығында. Алайда ата-аналардың өтінішімен кіші топқа қазір 4 жастан бастап бүлдіршіндер қабылдануда. Себебі Қа­рақат шәкірттерінің кешегі жеңісінен кейін балаларын биге қатыстыруға ниет білдірген аналар қатары едәуір артқанын айтады.
Кейіпкеріміздің шәкірттері үйірмеге аптасына үш рет келеді. Ол би студиясы тек балалардың өнерге де­ген қабілетін ашып қана қоймай, кез келген ор­тада өздерін еркін ұстап, ойын ашық айтуға септігін тигі­зетінін тілге тиек етті. Әр бала – әрбір үйдің еркесі. Олардың барлығының басын бір арнаға тоғыстырып, бірдей қимыл жасату оңай іс емес. Осы жайтты ескерген кейіпкеріміз әр баламен жеке жұмыс жасап, оның талғамы мен ике­міне қарай қимылдарды үйрететінін айтады.
Айта кетейік, кіші топтың шығармашылық қоржынында 2 би болса, үлкен топта 3 би бар. Ал сахнада әзірге бір ғана би жарық көрген. Кішкентай бүлдіршіндер алғашқы сайыстарын халықаралық байқаудан бастаған. Жарысқа кіші топтың 11 бүлдіршіні барып, өнерлерін ортаға салды.
– Жарысқа қимылы жеңіл, балалар ұмытып қал­майтындай би шығардым. Дайындық барысында би­дің әр элементіне жеке-жеке тоқталып, денені қалай ұс­тау керек, аяқ қалай тұру керектігін шәкірттеріме жіті түсіндірдім. Сахнада олар еш қобалжымай биді ойымдағыдан жоғары дәрежеде орындап шықты. Кеше ға­на балабақшамен қоштасып, мектеп табалдырығын енді аттағалы отырған балалар үшін әрине, бұл – үлкен жеңіс. Осы орайда менің жанымнан табылып, қолдау көрсеткен ата-аналарға алғысымды білдіремін. Олар қыздарының киімін, қажетті заттарын тауып, сахнаға шығарда «менің қызым, сенің қызың» деп бөліп жармай, бәріне бірдей қарап, барлығын киіндіріп, шаштарын дұрыстап көмектесті, – дейді Қарақат Сейлханқызы.
Білікті маманнан білім алатын бүлдіршіндердің биік белесті бағындыруы заңдылық. Шағын ғана би орта­лығының өнерпаздары мұнымен тоқтап қалмайды. Олар ұстаздарынан алған білімінің арқасында әлі талай би алаңында топ жармақ. Кейіпкеріміздің де мақсаты осы, бүл­діршіндерді өнерге баулуда аянбай еңбек етіп, олар­дың жетістікке жетуіне өз септігін тигізу.

Ақтоты ЕРЖАНҚЫЗЫ