Су ресурстары және ирригация министрі Нұржан Нұржігітов «Қазсушар» мекемесінде мыңдаған жұмыскердің жалақысы 50 процентке көтерілетінін мәлімдеді, деп хабарлайды Sputnik Қазақстан тілшісі.

Министрдің айтуынша, бүгінде су саласындағы мамандардың жалақысы біртіндеп көтеріліп келеді. Мәселен, былтыр «Қазсушар» мекемесінде жұмыс істейтін 10 мыңнан астам қызметкердің айлығы 25 процентке көтерілді. Биыл тағы 50 процентке артады.

«Қазіргі кезде олардың орташа жалақысы – 210 мың теңге. Ендігі кезекте табиғи монополиялар заңнамасына тиісті өзгерістер енгізіліп жатыр. Оған сәйкес, су саласының мамандары энергетика және жылу энергетикасы қызметкерлеріне теңестіріледі. Сонда айлығын да 50 пайыздан астамға көтеруге мүмкіндік болады», – деді Нұржігітов мәжілістегі үкімет сағатында.

Қазіргі кезде тиісті заң сенаттың қарауында жатыр. Оны жақын арада мақұлдауға тиіс. Министрдің сөзіне қарағанда, екінші жартыжылдықта су мамандарының жалақысы 50 процентке көтеріледі.

«Сонда жалақының көлемі орта есеппен 210 мыңнан 310-320 мың теңгеге дейін артады. Ал айлық көтерілсе, мамандар да келеді»,-деп атап өтті Нұржігітов.