Almaty Half Marathon кезінде 84 жастағы және 21 жастағы екі қатысушы қайтыс болды, деп хабарлайды ALMATY MARATHON 2025 ұйымдастырушылары.

Екеуі де жартылай марафон қашықтығын (21,1 км) еңсеріп, Алматыда өтетін жарыстардың тұрақты қатысушысы болған.

«Ұйымдастырушылар регламентке сәйкес әрекет етті: медициналық қызметтер, шұғыл қызметтер және полиция жедел және уақтылы жұмыс істеді. Қабылданған шараларға қарамастан, қатысушылардың өмірін сақтап қалу мүмкін болмады», – дейді ұйымдастырушылар.

Жартылай марафон 20 сәуірде таңертең Тұңғыш президент саябағынан орталық стадионға дейінгі маршрут бойынша өткен. 84 жастағы Аққоян Рсалиев 2021 жылдан бері жарыстарға үнемі қатысқан. Бұған дейін Almaty Half Marathon және Almaty Marathon-да 21,1 км және 10 км қашықтықты сәтті жүріп өткен болатын, дейді ұйымдастырушылар.

Қайтыс болған екінші қатысушы – Нұрбол Ахмади, ол бұрын Winter Run 2025 жарысында 10 км қашықтыққа қатысып, Астана мен Алматыда жартылай марафонға, сондай-ақ Алматыда марафонға тіркелген.

«Бүгін Алматыда 16 км қашықтықтағы жартылай марафон кезінде жүгіруші есінен танып қалды. Оқиға орнына келген дәрігерлер реанимациялық әрекеттер жасады. Алайда нәтиже болмады, ол бригада келгенге дейін қайтыс болды», – дейді марафон ұйымдастырушылары.

Дәрігерлердің айтуынша, қатысушылардың қайтыс болу себебі сот-медициналық сараптаманың қорытындысы бойынша белгілі болады және оның нәтижесін жақын арада туыстарына хабарлайды.

«Жарысқа тіркелу кезінде барлық қатысушы спорттық іс-шараға физикалық түрде қатысуға дайын екендігі және өз денсаулығы үшін толық жауапты екендігі туралы қолхатқа қол қояды, бұл мұндай марафондарды өткізу кезінде әлемде қабылданған тәжірибе. Almaty Marathon қатысушылары үшін жыл бойы біз сарапшылармен дайындық және қауіпсіз жүгіру тақырыбында тегін ашық жаттығулар мен дәрістер өткіземіз. Старт күні әрбір тамақтану нүктесінде алғашқы көмек көрсету үшін қажетті позициялары бар медициналық персонал орналастырылады. Жарыстың барлық бағыты ПД және жедел медициналық көмек қызметтерімен бірлесіп мұқият және алдын ала пысықталады», — дейді «Бірінші болу батылдығы» корпоративтік қорының атқарушы директоры Салтанат Қазыбаева.

Полиция қылмыстық іс қозғады.

«Екі факт бойынша да аудандық полиция бөлімшелерінде тергеу жүргізілуде. Өлімнің себебін анықтау мақсатында сот-медициналық сараптамалар жасалып жатыр», – дейді Алматы қаласы полиция департаментінің баспасөз қызметі.