Астанада банк бөлімшесін басып алған 30 жастағы Әлихан Мұрадовтың қанша жылға сотталатыны белгілі болды, деп хабарлайды Sputnik Қазақстан.

Қазіргі кезде сотқа дейінгі тергеудің мән-жайы жарияланбай отыр. Алайда 7 адамды кепілге алған басқыншының қандай баппен жауапқа тартылатыны белгілі.

«Аталған факті сотқа дейінгі тергеудің бірыңғай тізіміне Қылмыстық кодекстің 261-бабы, 2 бөлігі (Адамды кепілге алу) бойынша тіркелді. Бұл бапта мүлкі тәркіленіп немесе онсыз, жетi жылдан он екi жылға дейiнгi мерзiмге бас бостандығынан айыру жазасы қарастырылған», – делінген ішкі істер министрлігінің ресми хабарламасында.

Айта кетері, 18 маусымда Астанадағы «Каспий Банк» филиалын белгісіз біреу басып алды. Тапаншаға ұқсас зат ұстаған ер адам 7 адамды кепілге алып, бірнеше талап қойды. Тәртіп сақшылары алдымен келіссөз жүргізіп көрді. Ал 16:35-те арнайы жасақ басқыншыға шабуыл жасады. Кепілге алынғандардың барлығы босатылды.

Прокуратураның мәліметіне сәйкес, 30 жастағы Әлихат Мұрадов 2013 жылдан бері есірткіге тәуелді адамдар есебінде тұр. Жамбыл облысының тумасы банктен кредит те алған. Екі рет қылмыстық іс бойынша күдікті болып танылған.