Тіршілік көзін қасиетті су деп білген, ел тұтастығына берекелі еңбегімен тыныс берген, табиғатын қоршаған ортаны өмір тірегі, тіршілік жүрегі деп таныған, таза суды бақытына балаған, жер анадан ырыс терген су шаруашылығының қызметкерлерінің бүгін төл мерекесі. Айтулы мерекеде аудан әкімі Асқарбек Есжанов сала ардагерлері мен қызметкерлерін қабылдап, ізгі тілегін білдірді.

Қабылдауда аудан әкімі Асқарбек Есжанов алдымен ауданымыздағы бір­қатар атқарылған жұмыстарға тоқталып өтті.

– Сала ардагерлері мен маман­дарға адал еңбектері үшін риза­шылық білдіргім келеді. Өңірде су шаруашылығын да­мытуға баса на­зар аударылып, маңызды міндет­тер іске асырылуда. Барша сала қыз­мет­керлеріне зор денсаулық, шаңы­рақтарына береке, жұмыстарына табыс тілеймін. Соңғы жылдары ау­данда ауыз су инфрақұрылымын да­мыту бағытында бірқатар жұмыстар атқарылып келеді. Өткен жылы Аққұм және Мәдениет елді мекендерінде су тарату желілерін кеңейтуге 370 млн теңге бөлініп, пай­далануға берілді. Сонымен қатар жаңадан ашылған «Ақтерек» тұрғын үй учаскесінде сумен жабдықтау жүйесінің және су тарату кешенінің құрылысына 883,3 млн теңге бөлініп, қазіргі таңда құрылыс жұмыстары толығымен аяқ­талды. Осы ретте аудан тұрғындары 100 пайыз орталықтандырылған ауыз су­мен қамтылып отыр. Дегенмен «су­дың да сұрауы бар» деген сөз бар, жасыратыны жоқ, соңғы уақытта су тапшылығы белең алуда, сондықтан алдағы уақытта тір­шілік көзін ысырап етпей, үнемдеп пайда­лануымыз ке­рек, – деді аудан әкімі.

Иә, судың тіршілік көзі екеніне ешкім де қарсы дау айта алмайды. Әсіресе ауыз судың адам баласы үшін маңызы зор. Оның үстіне жер қойнауында жасырынып жатқан осынау тіршілік көзінің қанша екенін ешкім дөп басып айта ал­майды. Алайда осы саланы зерт­теу­мен айналысып жүрген ға­лымдар­­дың пайымдауынша, оның мөл­­­шері тым аз қалса керек. Сон­дық­­тан Мемлекет басшысы су са­ла­сын дамыту мәселелеріне көп көңіл бөліп, бірқатар стратегиялық мін­деттер қойылды.

Баршаға белгілі, Прези­дент суармалы жер көлемін 2030 жылға дейін ағымдағы 1,6 млн гектардан 3 млн гектарға дейін ұлғайту жөнінде тапсырма берді. Бұл – ең алдымен жұмыс орындары, елдің азық-түлік қауіпсіздігінің кепілі. Бүгінде ауданда ұзындығы 180 шақырымнан аса сумен қамтамасыз ететін және 200 шақырымнан астам қашыртқы дренаждық жүйелер бар.

Айтулы мереке қарсаңында тір­шілік нәрін үйлестіруде қалтқысыз қызмет етіп жүрген сала ардагерлері мен білікті мамандар марапатталып, арнайы гүл шоқтары табысталды. Нақтырақ тоқталсақ, сала ардагері Марат Үмбетқұловқа, аудандық оқ­шау сумен жабдықтау жүйелерін пай­даланушы өндірістік бөлімшесінің іс жүргізушісі Айжамал Омароваға 63 жасқа толуына орай аудан әкі­мінің Құттықтауы табысталса, сала қызметкерлері Айман Мұха­това, Қайрат Байдуллаев, Ишан­бек Қосбармақов, Нұржамал Байма­ханова, Ербол Аманбай және Бек­тұрған Сейтов аудан әкімінің ал­ғыс хатымен марапатталды.

– Иә, су – кез келген тіршілік иесі үшін аса қажет нәрсе. Адам өмірінде судың алатын орны тіпті зор. Мұны әсіресе осы салада еңбек етіп жүрген азаматтар жақсы түсінеді деп ойлаймын. Сондықтан еліміздің су шаруашылығының дамуына аян­бай күш-жігерін жұмсап жүрген әріптестерімді мерейлі мерекемен шын жүректен құттықтаймын. Су ша­руашылығы саласының маңыз­дылығын ескеріп, айтулы мерекеде ба­сымызды қосып, ілтипат көрсетіп жатқан аудан әкімі Асқарбек Темір­бекұлының жарқын көңіліне алғыс білдіреміз, – деді сала ардагері Марат Сейтжанұлы.

Жандос ЖАЗКЕН