Атырауда 4 адамның өзге тілде жазуы бар мемлекеттік Тумен түскен фотосы әлеуметтік желіде тараған еді. Құқық бұзушылардың арасында кәмелетке толмаған екі жасөспірім бар.

Атырау қаласындағы әкімшілік құқық бұзушылықтар жөніндегі мамандандырылған сотының материалында көрсетілгендей, 4 адамға ҚР Әкімшілік құқық бұзушылық туралы кодексінің 434-бабының 1-бөлігімен (Ұсақ бұзақылық) айып тағылған.

«2025 жылғы 23 наурызда азаматшалар Н., А. және кәмелет жасына толмаған Х. мен А.  Атырау қаласындағы мұз айдыны сарайының ғимаратында араб тіліндегі жазуы бар Қазақстан Республикасының Туымен суретке түскен. Суретті әлеуметтік желі арқылы таратып, ұсақ бұзақылық жасаған. Олардың кінәсі әкімшілік құқық бұзуышылық туралы хаттамамен, фотосуретпен, баянатпен және басқа да іс материалдарымен толық дәлелденді», деп хабарлады аталған соттан.

Сот қаулысымен құқық бұзушылар айып тағылған баппен кінәлі деп танылды.

«Н.-ға кәмелетке толмаған адамды әкiмшiлiк құқық бұзушылыққа тарту, адамдар тобының әкiмшiлiк құқық бұзушылық жасауы секілді жауаптылығын ауырлататын мән-жай ескеріліп, 15 тәулікке әкімшілік қамаққа алу түріндегі әкімшілік жаза қолданылды. А.-ға әкімшілік жаза ретінде 78 мың 640 теңге, кәмелетке толмаған Х. мен А.-ның заңды өкіліне 39 мың 320 теңге әкімшілік айыппұл салынды», деп мәлім етті соттан.

Сот қаулылары заңды күшіне енген жоқ.