Еңбек және халықты әлеуметтік қорғау министрлігі бүгін елдегі зейнеткерлердің саны мен  зейнетақының орташа мөлшері туралы мәліметтерді ұсынды, деп хабарлайды Egemen.kz.

Жыл басынан бері республикалық бюджеттен 1 трлн 549,3 миллиард теңге көлемінде зейнетақы төленсе, оның 487,5 миллиард теңгесі базалық зейнетақыны төлеуге, 1 трлн 61,8 млрд ынтымақты зейнетақыға бағытталды.

«2024 жылғы 1 маусымдағы жағдай бойынша зейнеткерлердің саны 2 млн 383 мың адамды құрайды. 2024 жылғы 1 маусымдағы жағдай бойынша орташа жалпы зейнетақы 132 401 теңгені құрады, оның ішінде ынтымақты зейнетақы мөлшері – 89 697 теңге, базалық зейнетақы – 42 704 теңге», деп хабарлады министрліктің баспасөз қызметі.

Сондай-ақ министрлік 2018 жылдың 1 шілдесінен бастап мемлекеттік базалық зейнетақы төлемі әрбір алушыға оның зейнетақы жүйесіне қатысу өтілі ескеріле отырып, жеке тағайындалатынын еске салды. Бұл ретте, зейнетақы жүйесіне қатысу өтіліне 1998 жылғы 1 қаңтардағы жағдай бойынша ынтымақтастығы жүйесінде әзірленген еңбек өтілі, сондай-ақ міндетті зейнетақы жарналары (МЗЖ) төленген кезеңдер кіреді.

Осылайша, егер зейнетақы жүйесіне қатысу өтілі 10 жыл және одан аз болса, сондай-ақ ол болмаған жағдайда базалық зейнетақының мөлшері ең төменгі күнкөріс деңгейінің 65%-ына тең болса, онда 10 жылдан асатын әрбір жыл үшін оның мөлшері 2%-ға артады. Мысалы, 20 жыл қатысумен базалық зейнетақы ең төменгі күнкөріс деңгейінің 85 пайызын құрайды. 30 және одан да көп жыл еңбек өтілі болған жағдайда ол ең жоғары мөлшерде – ең төменгі күнкөріс деңгейінің 105% мөлшерінде белгіленеді.

Осылайша, міндетті зейнетақы жарналары неғұрлым жүйелі және толық аударылса, зейнет жасындағы базалық зейнетақы төлемдерінің мөлшері соғұрлым көп болады.