Саналы ғұмырын өңірдің өркендеуіне сарп еткен Алимаш Таженованың есімі жалағаштықтарға етене таныс. Тағылымды ғұмыр иесі өмірінің соңына дейін өзіне адал еңбекті серік етті. Дала жұмысында да дараланып, Сыр салысынан мол астық жинады. Бірнеше мекемеде, кәсіпорында қарапайым жұмысшы болды. Өнегелі өмір иесінің еңбегі еленіп, талай рет марапат төрінен көрінді.

Жалпы біз осындай қарапайым еңбек адамдарының тағылымды ісін, саналы ғұмырын өскелең ұрпаққа үлгі етуге міндеттіміз. Өйткені қара­пайым еңбек адамдарынан үлгі ал­ған жастардан бәсекеге қабілетті ұрпақ қалыптасады. Ал ел дамуында мұндай жастардың қандай рөл атқа­ратыны айтпаса да түсінікті.
2023 жылдан бері Жалағашта еңбек адамы Алимаш Таженованы еске алуға арналған футзалдан тур­нир өтіп келеді. Дәстүрлі шара биыл, яғни Жұмысшы мамандықтары жылы да жалғасын тапты. Спорттық ша­раның ашылу рәсімінде аудандық дене тәрбиесі, спорт және туризм бө­лі­мінің басшысы Еркен Жантуғанов, және тыл ардагерінің ұрпақтары та­ғы­лымды естеліктерімен бөлісіп, қа­ты­сушыларға сәттілік тіледі.
– Жалпы өткенін ұлықтап, өшкенін қайта жаңғырту – баршамызға ортақ міндет. Өйткені біз тарихымызды та­нымай, адал еңбекпен еңсе тікте­ген қарапайым жұмысшыларды, еңбек адамдарын жастарға үлгі етпей бә­секеге қабілетті ұрпақ қалыптастыра ал­маймыз. Сондықтан осын­дай қа­­рапайым еңбек адамдарының тағы­лымды ғұмырын үлгі етуге ба­сым­­дық беруіміз керек. Жалағаштықтарға тыл ардагері Алимаш Та­женова ана­мыз­дың есімі жақсы таныс. Әжемізді аудан жұрты еңбек­сүйгіштігімен, өне­гелі өмірімен, елдің дамуына қосқан үлесімен таниды. Міне, сондықтан бүгінгі жарысты тек спорттық сайыс емес, тағылымды шара деп түсінуіміз керек. Турнир үшінші жыл қатарынан ұйымдастырылып отыр. Демеуші бол­ған әжеміздің ұрпақтарына да мың алғыс. Қатысушыларға тек сәттілік тіеймін, – деді Еркен Жантуғанов.
Иә, биылғы турнир өте тартысты өтті. Бұл сайысқа жалағаштық аяқ­доп шеберлерінің тыңғылықты дайын­­дық­пен келгені анық бай­қа­ла­ды. Жа­рысқа Жалағаш кенті мен ауыл­дық елді мекендерден 14 ко­манда қатысып, өзара мықтыны анықтады.
Турнирдің бірінші кездесуі «Адия» мен «СМУ» құрамасы арасында өтті. Ойын соңына дейін қос команда қорғанысқа басымдық берді. Тіпті біразға дейін есеп ашылмады. Кез­десудің соңына дейін «Адия» жігіттері «СМУ» қақпасынан саңы­лау тапты. Жанкүйерлер осыдан кейін драмаға толы ойын көреміз деп топшылады. «СМУ» жігіттері де таразы басын теңестіруге барын салды. Алайда «Адияның» қақпашысы сыр бермеді. Осылайша алғашқы ойын 1:0 есе­бімен аяқталды.
Мұнан кейінгі кездесулер де тар­тысты өтті. Жанкүйерлер үшін қуа­натын да, «әттеген-ай» дейтін сәттер де көп болды. Түске дейін іріктеу ойын­дары өтіп, үш топтан бірнеше ко­­манда финалдық кездесулерге жол­дама алды.
Келесі кезеңге «А» тобынан «Адия» мен «Ақсу» командасы жол­дама алды. Бұл топта «Адия» жігіт­тері 9 ұпаймен көш бастаса, «Ақсу» ко­мандасының қоржынында 6 ұпай бар. Ал «Б» тобында «Дәуімбай» жі­гіттері нәтижелі ойын көрсетті. Олар 4 кездесу өткізіп, оның екеуін же­­­ңіспен аяқтаса, екеуінде тең тар­қасты. Осылайша турнирлік кестеде «Дәуімбай» жігіттері 8 ұпай­мен көш бастады. Мұнан кейінгі орындарға 7 ұпаймен «Наркескен» мен «М.Шә­менов-2» командалары жай­ғасты.
«С» тобында «Темірбек Жүр­генов» жігіттері қарсылас шақ кел­­тір­меді. 9 ұпаймен дараланған ауыл спорт­шылары бұл жарысқа тың­­ғылықты дайындықпен келгенін ширақтығымен, алаңда өздерін еркін ұстайтынымен, және допты оңай меңгеруімен дәлелдеді.
Әне-міне дегенше турнирдің 1/4 кезеңіне де келіп жеттік. Бірінші ойын «Ақсу» мен «Дәуімбай» жігіттері ара­сында өтті. Кездесуде «Ақсу» ко­­ман­­дасының қақпасына қарсыластары 2 гол соқты. Алайда оның еш­қай­сысына жауап болмады. Осы­лайша жартылай финалға «Дәуім­бай» ко­мандасы жолдама алды.
«Наркескен» мен «М.Шәменов-2» командалары арасындағы ойында гол көп болды. Мәселен, «Наркескен» жігіттері қарсыласының қақпасына 4 гол салса, ауыл жігіттері жұбаныш голын соғып, ойын 4:1 есебімен аяқ­талды. Ал «М.Шәменов-1» мен «Адия» арасындағы кездесу дра­маға толы болды. Бұл ойында бас тө­реші бас-аяғы 6 голды есепке алды. Кездесуде тең тарқасқан қос команда келесі кезеңнің жолдамасын айып добын орындаумен сарапқа салды. Соңында «Адия» командасы жар­тылай финалдан көрінді. «Таң» мен «Темірбек Жүргенов» коман­далары арасындағы кездесуде келесі кезеңге қоғам қайраткері атындағы команда өтті.
Жартылай финал. 4 команданың ішінен жеңіске жеткендер ақтық мәреге жолдама алса, қарсыласына есе жібергендер үшінші орынды са­рапқа салады. Алғашқы ойын «Нар­кескен» мен «Дәуімбай» ара­сында өтті. Кездесу 3:1 есебімен аяқ­та­лып, ақтық мәреге «Наркескен» коман­дасы жодама алды. Ал «Адия» мен «Темірбек Жүргенов» командалары арасында қайраткер атындағы ко­манда қарсыласына есе жіберді. Үшінші орынға таласта да олар барын салғанымен «Дәуімбай» құрамасы мықтылығын дәлелдеді.
Ақтық мәре. «Наркескен» мен «Адия». Қос топтан суырылып шық­­қан командалардың қайсысы же­ңіске жетеді? Жанкүйерлердің ішінде жал­ғыз сұрақ осы. «Адия» бұл кездесуде қорғанысқа басымдық бере жүріп, қарсыласының қақпа­сына қос гол соқты. Мұнан кейін есеп еш өзгеріссіз қалды. Осылайша «Адия» турнирдің жеңімпазы атанды.
Үшінші мәрте ұйымдастырылған турнир де өз мәресіне жетті. Мара­паттау рәсімінде жеңімпаз командаға кубок пен диплом табыстаған тыл ардагерінің ұрпақтары Бегман Каж­данбек пен Ақберген Таженов тыл ардагері атындағы турнирде бел­сен­ділік танытқан қатысушыларға алғыс білдірді.
– Сырда туып, Сырда өскен, са­налы ғұмырын туған жердің түлеуіне арнаған Алимаш Қалилақызы атын­дағы тағылымды шарада бас қосып отырмыз. Апамыздың өнегелі өмір жолын жастарға үлгі ету – ортақ міндет. Бүгінгі шарада жарыстың көркін қыздырған жастарға алғыстан басқа айтарым жоқ. Жеңімпаз ко­мандаларды құттықтаймын, – деді Бегман Кажданбек.
Жарыс жеңімпазы «Адия» коман­дасына турнирдің бас кубогы мен арнайы диплом және 100 мың теңге қаржылай сыйақы табысталды. Ал ақтық мәреде сыр берген «Нар­кес­кен» командасы 70 мың теңге қар­жылай сыйақыға ие болды. Үздік үштікті түйіндеген «Дәуімбай» ко­ман­дасына 50 мың теңге беріслсе, қай­раткер атындағы командаға 20 мың теңге қаржылай сыйақы табысталды.
Мұнан бөлек турнирде өзінің ерекше ойынымен көзге түскен аяқдоп шеберлері де арнайы номи­на­цияларға ие болды. Мәселен, Кенже­бек Сман­құлов «Үздік қақпа­шы» атанса, Нұр­жан Мұсахан «Үз­дік шабуылшы» деп танылды. Қор­ғаныста сыр бермеген Мирхан Саудабек «Үздік қор­ғаушы атанды. Сондай-ақ басқа да ойын­шылар түрлі номинацияларға ие бо­лып, қаржылай сыйлыққа ие болды.
Айта кетейік, тыл ардагері Алимаш Таженова атын­дағы аудандық турнир 3 жыл қа­тарынан ұйымдастырылып келеді. Келер жылы дәстүрлі шара облыстық деңгейде өтіп, ауқымы кеңейеді.

Кенжетай ҚАЙРАҚБАЕВ