Қызылорда қаласындағы «Өнер» орталығында «Үш дәуірдің астанасы – Қызылорда» атты республикалық ақындар айтысы өтті. Жыр додасын Парламент Мәжілісінің депутаты, Қазақстанның еңбек сіңірген қайраткері, филология ғылымдарының докторы Аманжол Әлтай жүргізді. Ашылу рәсімінде аймақ басшысы Нұрлыбек Нәлібаев қатысушыларға сәттілік тіледі.

– Биыл – еліміз, өңіріміз үшін ме­рейтойлар жылы! Қазақтың бас ақыны Абай Құнанбайұлының туғанына 180 жыл, Қызылорданың Қазақ елінің ас­та­насы болғанына 100 жыл, Ұлы Же­ңістің 80 жылдығы, Байқоңыр ғарыш ай­лағының ашылғанына 70 жыл, Қа­зақ­стан халқы Ассамблеясының 30 жыл­дығы кең көлемде аталып өтуде. Бұл мерейлі даталардың ұлт тарихында алар өзіндік орны мен маңызы зор. Сыр өңі­ріндегі айтулы шаралар мыңжылдық асыл мұрамыз айтыспен басталуда. Мемлекет басшысы бірлік пен берекенің, өнер мен мәдениеттің құтты ұясы бол­ған Сыр өңірін алтын бесікке теңеп, айрықша бағасын берген еді. Бурабайда өткен Ұлттық құрылтайда келесі 5-ші отырысты Сыр бойында, кезінде Қазақ елінің астанасы болған Қызылорда қа­ла­сында өткізуді ұсынды. Алқалы жиында қабылданған тарихи шешім аймақ жұртының мерейін асқақтатты. Пре­зидентіміз халқымыздың «қазақ» деген байырғы атауы қайтарылған, та­рихи әділдік орнаған Қызылордадағы ма­ңызды оқиғалар ел жадында сақ­талуға тиіс екенін атап өтті. Бұл – біз үшін зор мәртебе, Президентіміздің өңі­­­рімізде атқарылған жұмыстарға бер­ген оң бағасы деп білеміз. Сыр то­пы­рағынан түлеген ақындарымыз ай­тыс өнерін дамытуға үлкен үлес қосуда. Өйткені айтыс – мәңгілік киелі мұ­ра­мыз! Бүгінгі сөз додасына келген жүйрік­терге ел рухын асқақтатудағы елеулі еңбектеріңіз үшін алғыс айтамын. Қа­за­­қылықтың қаймағы бұзылмаған, бір­лік пен ұлт тұтастығының алтын дің­гегіне айналған қасиетті Сыр өңіріне келген қадамдарыңыз құтты болғай! Ха­­лықты ізгілікке үндейтін өнердегі шын жүйріктер тыңдарманға келелі ой айтып, тағылымды сайыс жасаңыздар! Бар­­шаңызға сәттілік тілеймін, – деді Нұрлыбек Машбекұлы.
Айтыс алаңында еліміздің әр айма­ғынан жиналған 12 ақын бақ сынады. Сыр жұртының төл өнерге деген құр­метін, қызығушылығын, айтыс өнерін құр­меттейтіні анық байқалды. Тіпті мың орындық «Өнер» орталығы бос орын қалмады. Айтыскерлер қазақтың бас ақыны Абай Құнанбайұлының туғанына 180, Қызылорда қаласының Қазақ елі­нің астанасы болғанына 100 жыл то­луын, Ұлы Жеңістің 80, Байқоңыр ға­рыш айлағының 70 және Қазақстан халқы Ассамблеясының 30 жылдығын жыр­ға қосты.
Қазылар алқасына мемлекет және қоғам қайраткері Сауытбек Абрах­манов төрағалық етті. Құрамында Қа­зақстанның еңбек сіңірген қайраткері Жүрсін Ерман, халықаралық «Алаш» әдеби сыйлығының лауреаты Ғалым Жайлыбай, Мәдениет саласының үздігі, Ақмола облыстық тарихи-өлкетану му­зейінің директоры Құдайберлі Мыр­за­бек, Қазақстанның еңбек сіңірген қай­раткері, Қазақ ұлттық өнер универ­ситетінің профессоры, жырау Алмас Ал­матов, сондай-ақ айтыскер ақын, филология ғылымдарының кандидаты, Қазақстанның еңбек сіңірген қайраткері Мэлс Қосымбаев болды.
Аламан айтыстың бас жүлдесі Сара Тоқтамысоваға бұйырды. Ал I орынға қызылордалық ақын, аймақтың мақ­танышы Мейірбек Сұлтанхан лайық деп танылды. Мұнан кейінгі орынға жер­ле­сіміз, «Алтын домбыраның» 3 мәрте иегері Мұхтар Ниязовқа бұйырды. Сон­дай-ақ Абай облысынан келген Рүстем Қайыртай мен Қарағандылық Мақсат Аханов үштікті түйіндеді. Мұнан бөлек Ба­тыс Қазақстан облысынан келген Жан­­сая Мусина мен түркістандық Бека­­рыс Шойбековке арнайы жүлде бұйырды.
Сөз додасының көрігін қыздырған Қарағанды облысының ақыны Дидар Қа­миевке, Павлодар облысынан кел­ген Аспанбек Шұғатайға, ақтөбелік Злиқа Наурызалина мен Нұрбол Жауын­баевқа, сондай-ақ Түркістан облысынан кел­­ген Нұрмахан Жақыпбекке 500 мың тең­геден сыйақы табысталды.

Кенжетай ҚАЙРАҚБАЕВ