Өткен аптада 40 жастан асқан ардагерлер арасында Б.Құлтекенов атындағы жабық бассейнде суға жүзуден жарыс өтті. Жарысқа 7 ардагер қатысып, өзара мықтыны анықтады. Иә, суда жүзуден кәсіби түрде айналыспаса да ес білгелі дарияның суын кешіп, суда жүзген жарысқа қатысушы ауыл ардагерлерінің бәрі дерлік шапшаң қозғалады екен. Жарыс тартысты өтті.

Жарысқа қатысушылар 50 метр­­ге еркін әдіспен жүзуден бақ сынасты. Жарыс нәтижесі бо­­йын­­ша кент атынан қатысқан Мей­­рам­бек Оразбаев ІІІ орын, М.Шә­менов ауылының ардагері Мей­рамбек Рахимов ІІ орын, Бұ­қар­бай батыр ауылының ардагері Нұрлы­бек Төлеубаев І орынды қан­­жығасына байлады. Одан бө­лек 60 жастан жоғары жастағы қа­тысқан ардагерлерге түрлі номи­нациялар берілді.
– Ауылда өскендіктен кіш­кен­тайымнан суда жүзуді жаныма серік еткенмін. Бұрын каналдарды жағалап, дария суына жүзетін болсақ, қазір шүкір, ауданда жа­бық бассейн ашылған. Иә, суда жүзу адам денсаулығына пайдалы, мәселен, жүрек, жүйке жүйесін жақсартады, шынықтырады, өкпе жұмысын реттейді. Жарысқа ке­летін болсақ, өте тартысты өтті. Суға жүзумен кішкентайымнан шұ­­­­­ғылданып, әліге дейін еркін жүзе алатындықтан бо­лар, бүгін жеңімпаз атандым. Ұйым­дасты­ру­­шыларға алғыс айтамыз, са­йыс­қа қатысудан қаш­пай­мыз, – дейді Бұқарбай батыр ауылының спортшы ардагері Нұрлыбек Төлеубаев.
Жарыс соңында жеңімпаздар арнайы медаль және дип­лом­дар­мен марапатталды. Ұйым­дас­ты­ру­шылардың айтуынша, бұл игі дәстүр жалғасын тауып, шара ауқымы кеңейе түспек.
Десе де суға жүзуден жарысқа қатысамын деушілердің қатары аз көрінеді. Иә, қазақ жастарының су спортына аз баруының себептері де жоқ емес. Біріншіден, қазақ жастарының көбісі ауылда тұ­ра­ды. Ауылда бассейн жоқтың қасы. Ал ауданға бассейннің салынғанына көп уақыт бол­мады. Көбісі суға жүзуді түсіне бермейді. Екіншіден, қазір жас­өспірімдердің көбісі үйлерінде отырып, әлеуметтік желідегі ақ­па­раттарды оқуға құмартып алды. Осылайша жастар алтын уа­қыт­тарын интернетте өткізуде.
– Жалпы, біз су спортынан бей­хабармыз. Әрі білген күн­нің өзінде жүзуге менсінбей қарай­мыз. Баламыз шымыр болсын деп күрес, боксқа жиі алып ба­рамыз. Ал жүзу спорты жекпе-жек сынды спорт түрлерінен кем түспейді. Өйт­кені бұл спорт адам­ды шы­мыр етіп қана қоймай, шыдам­ды­лыққа, әдептілікке баулиды. Тіпті ең мықты, талантты деген боксшы олимпиадада әрі кетсе бір ғана алтын алып шектеледі. Ал жүзу спортындағы мықтылар бір дүбірлі додада бір емес, біраз қашықтыққа бақ сынап, бір­неше ал­тын алып жататынын көріп жүрміз. Сондай-ақ су спор­ты жөнінде насихат аз болып тұр. Жарыстарды жиі өткізуге тыры­самыз, бірақ тұрғындар тарапынан жарысқа қатысуға қызығушылық жоқ. Қатысатын адам болмаған соң, көп жобаларымыз аяқсыз қа­лып жатыр. Жалпы, жүзу адам ағзасына тигізетін пайдасы мен әсері жағынан басқа спортқа қарағанда ерекше. Жүзумен тұ­рақты шұғылданған адамның бұл­шық еті үйлесімді жетіледі, жүйке тамыры нығаяды, денедегі зат алмасу, тыныс алу мен қан айналу жүйесінің қызметі жақ­сарады. Бұл спорт түріне Жала­ғаш жастары жиі тартылса, нұр үс­тіне нұр болар еді, – дейді бас­сейн басшысы Берікқазы Әуесбаев.
Айта кетейік, үлкендерге ар­налған бассейннің ұзындығы – 25, ені 12 метр. Ал тереңдігі 1,6 метрден бастап 2 метрден асып жығылады. Балаларға арналғаны бөлек. Жеті жасқа дейінгі ба­лалар үшін ұзындығы 12, ені 6 метр, бассейннің тереңдігі 60 сан­тиметр. Суға түскенде бат­пауға арналған жабдықтар да жеткілікті.
Бассейндегі су айына бір рет ауыстырылып тұрады. Ал заң­дылығында үш не алты ай деп бе­реді. Мұндағы су үнемі айна­лымда, астында орналасқан төрт фильтр қондырғы арқылы ұда­йы тазалайды. Судың темпе­ра­турасын қалыпты ұстайтын құ­­ралы бар. Балалар түсетін бас­сейн температурасы 32, ал ере­­сектердікі 28 грудус. Еден де жы­лытқышқа қосылған. Негізгі та­лап – келушілер тері аурулары жоқ екенін растайтын дәрігердің рұқсатымен ғана суға түсу керек. Ішім­дік пайдаланған тұрғындар мүлде кірмейді. Сондай-ақ шыны ыдыс­тарды пайдалануға рұқсат жоқ.
Бассейнге бір айға суға түсудің құны – 10 мың теңге. Аптасына үш рет келе аласыз. Ал жеті жасқа дейінгі балаларға тегін. Ер және әйел адамдарға апта күндері бө­ліп қарастырылады. 20 адамға дейін қабылдауға мүмкіндігі бар бас­сейнде оқушыларға жүзу үйір­месі де жұмыс істейді.

Ақнұр АЛТЫНБЕК