Бүгінде Жалағашқа келген қонақтар кенттің тазалығына таңқалып, тамсанып жатады. Шыны керек, аудан орталығы соңғы уақытта қоқыстан тазарып, көшелеріміз көркейіп-көгалданды. Бұрын ауламыздан қоқыс шығару үлкен мәселе еді. Қазір бұл да шешімін тапты. Нақтырақ айтсам, қоқысты қапқа салып, аула сыртына шығарып қойсаң, таң атысымен кент әкімшілігіне қарасты «Жалағаш қызмет» КММ қызметкерлері көлікпен жинап алып кетеді. Сондай-ақ қоқыс жәшіктері де орналасқан. Бір сөзбен айтқанда, аудан тазалығына жауап беретін азаматтардың жұмысында жүйе бар.

Жыл сайын елді мекендерді көркейту-көгалдандыру ба­ғы­тында көптеген жұмыс атқарылады. Әкімдік тарапынан өкімдер шығып, күз және көктем мезгілдерінде тазалық-санитариялық, көркейту-көгалдандыру айлықтары жария­ланады. Бүгінде «Таза Қазақстан» республикалық эко­­­ло­гиялық акциясы аясында аудан орталығында, ауылдық елді ме­кен­­­­дерде жаппай сенбілік шаралары белсенді өтуде. Акция аясында көшелер жиналып, қоқыстар мен қатты қалдықтар шы­ғарылып, көптеген ағаш отырғызылды. Сонымен қатар көше жолақтары сызылып, аллеяларда сырлау жұмыстары жүргізілді. Тазалық жұмыстарына мекеме, кәсіпорын қызмет­керлері мен аудан тұрғындары, ерікті жастар белсене қатысты. Аудан әкімі Ардақ Ибраимов сенбілік жұмыстарымен танысып, жауапты сала басшыларына жиналған күл-қоқыстар мен қалдақтарды уақытылы жинап алу қажеттігін жеткізді.
– Таза Қазақстан – тамаша идея. Бүгінгі іс-шара ба­рысында Дәуімбай елді мекенін тазалап, күл-қоқыстарды жинадық. Бұл жұмысты әрі қарай жалғастыратын боламыз. Жалпы жалағаштықтарды осындай іс-шараға қатысуға ша­қырамын, – дейді кент тұрғыны Баяділ Берікбай.
Жалпы тазалық пен кент келбетінің көркі жайлы аудандық газетке бірнеше рет мақала шығарып, тұрғындарды таза­лыққа шақыруды үздіксіз жүргізіп келеді. Тазалықты жай ғана қарапайым сөз емес, үлкен ұлағатты, мағыналы сөз­дердің бірі ретінде түсінуіміз қажет. Себебі тазалық – адамның рухани, мәдени жетілу деңгейінің, кісілігі мен тәр­биесінің маңызды көрсеткішінің бірі.
Мұнан бөлек аудан тұрғындарына үйлерінің сыртқы кел­бетін және өздері мекен ететін көшесін таза ұстауға, көгал­дандыруға, аула маңын жақсартуға насихаттау, елді мекенді абаттандыру жолындағы бастамаларын қолдау және ынта­ландыруға бағытталған «Жасыл көше», «Үздік аула» байқаулары ұйымдастырылуда. Осындай шаралар тұрғын­дардың экологиялық мәдениетінің одан әрі көтерілуіне ықпал етуде.

Гүлсезім АУҒАН,
Қорқыт ата атындағы ҚУ-дың 4-курс студенті