Бір ай бұрын Аламесек ауылдық округі әкіміне үміткерлердің сайлауалды бағдарламасымен танысып едік. Жексенбіде бұл саяси науқан да өз мәресіне жетті. Жалпы жергілікті жұрт әкімдерін бұған дейін де өздері сайлаған. Бірақ сол қарқын әлі де басылмапты, таң атысымен ауылдағы ағайын мәдениет үйінде орналасқан сайлау учаскесіне ағылды.

Жалпы бұл сайлауда 3 үміткер бақ сынады. Үшеуінің де мемлекеттік қызметте тәжірибесі бар. Бір қызығы, осыған дейін халық сайлаған ауылдың бұрынғы әкімі Дәулеткерей Тәжібаев та биыл тағы белді бекем буған.
Соңғы жылдары Аламесек қарқынды дамып келеді. Бұрын аудан тарихының басында тұрған елді мекенде мәселе көп болатын. Қазір ше, бүгінде аудан әкімі барған сайын жергілікті жұрттың басты мәселесіне айналған емхана ғимараты жаңадан бой көтерді. Тағы бір құлақты қажаған жол мәселесі де шешімін тауып жатыр. Тіпті ауылда 1 жылда 5 көшеге күрделі жөндеу жүрді. Электр жарығы қайта жаңғыртылды. Енді ауыз су жүйесі кеңейтілуде.
Жалпы тізе берсек, батыр атындағы ауылда тарқатып жазар дүние көп. Бірақ бұл ауылдың мәселесі түбегейлі шешілгенін білдірмейді. Елді мекенде әлі де басқа мәселелер жетерлік. Міне, бұл сайлауда халықтың белсенді бо­луын түсіне қойдық. Алдағы уақытта қал­ған мәселелердің шешімін табатын әкімді сайлауда жаңылғысы келмейді. Өйткені туған жердің болашағына жер­гілікті жұрт бейжай қараған емес.
Ауылдағы мәдениет үйінде орна­лас­қан №151 сайлау учаскесінде жұ­мыс қызып тұр. Бірі дауыс беру үшін бюл­­летень толтырса, енді бірі арнайы орынға кіріп өз таңдауын жасады. Ор­та­дағы дауыс жинайтын жәшікті төңі­ректеп тағы 4 кісі тұр.
Осындай абыр-сабырдың кезінде ішке отыз шақты адам кіріп келді. Бақсақ, бұл ауылдағы шаруашылық ұжымы екен. Қимылдары шалт, есіктен енген бойда дауыс беруге кіріскен олардың дала жұмысына асыққанын аңғара қой­дық. Бірақ жұмысқа да, сайлауға да уақыт тапқан еңбек адамдарының бұл ісі – кейінгіге өнеге. Онысымен қоймай әлгі дала дарабоздарының бірі бізге сұхбат беруге де уақыт тапты.
– Күнделікті жұмыс жүре береді, біз бірінші кезекте ауылдың болашағын ойлауымыз керек. Елді мекеннің еңсесі биік болмаса, ондағы халықтың да жағ­дайының оңуы екіталай. Сон­дық­тан біз бірінші кезекте туған жердің болашағына бас қатыруымыз керек. «Әркімге туған жері – Мысыр шаһар» деген. Шүкір, мен де туған жеріммен мақтанамын. Шын­дығында, Аламесектің тарихы әріде жатыр. Осындай тамыры тереңнен бас­тау алатын елді мекеннің болашағы бізді бейжай қалдырмайды. Міне, бүгін уақыт тауып, дауыс беруге келгеніміздің мақсаты да сол. Қазір шаруашылықта алдымыз зейнет жасына келіп қалдық. Ең жасы отыздан асты. Бүгіннен со­ларға осындай ісімізбен үлгі болсақ, ер­тең олар да көргенін жасайды. Ұрпақ сабақтастығы үзілмеуі керек. Осындай саяси науқандарда, басқа да түрлі ша­раларда бір-бірімізге үлгі болсақ, елді мекеннің де, елдің де келешегі кемел болады, – дейді еңбек адамы Тұрсынбек Қорғанбеков.
Айта кетейік, батыр атындағы ауыл­да 2 мыңға жуық халық бар. Оның 942-сі – сайлаушы. 15 адам үйден дауыс бе­ріп, өз таңдауын жасады. Оларға сай­лау учаскесінің мамандары арнайы жә­шікпен барып, дауысын алды.
Биыл Аламесекте 6 адам бірінші рет дауыс берді. Он сегізге енді толған жастар да саяси науқанда белсенді болды. Олардың қатарында Айда Бо­латбек те бар.
– Сайлауға бірінші рет қатысып отырмын, ауылдың болашағы үшін осын­дай саяси науқанда сенің де дауы­сың маңызды болғаны өзіңе үлкен жауап­кершілік жүктейді екен. Сондықтан алдын ала барлығының сайлауалды бағдарламасымен танысып шықтым. Осы ауылда өскесін туған жерде қандай мәселе бар, барлығы таңсық емес. Жас та болсам «ауылда жарқын жобалар жүзеге асса» деп армандайтынмын. Кешегі үміткер ағаларымыздың да сай­лауалды бағдарламасында біраз мә­селе қамтылыпты. Соның ішінде өзімнің көңілімнен шыққан үміткерге дауыс бер­дім. Жаңа келгеннен байқағаным, мұнда үлкен кісілер көп, олардың өзі уақыт тауып осында келгенде бізге сайлауда мүлде белсенді болу керек, – дейді ең жас сайлаушы.
№151 сайлау учаскесі қай уақытта да сайлаушылардан босамады. Мұнда ұстаздар да, бір көшенің тұрғындары да, еңбек адамдары да бірге келіп өз таңдауын жасады. Тіпті ауылдың арда­герлері де саяси науқанда белсенді болды. №151 сайлау учаскесінің тө­ра­ғасы Әбдіқайыр Әйтімов мұны қа­лыпты жағдайға балап отыр. Өйт­кені Аламесектегі ағайын ауылда қан­дай шара болсын барлығында бел­сен­ділік та­нытады екен. Мұның өзі ауыз­бірші­ліктің үлгісі, бір жағынан елді мекеннің болашағына жергілікті жұрт­тың бейжай қарамайтынын аңғартады.
– Бұл ауылда өтіп жатқан бірінші сайлау емес. Осыған дейінгі саяси нау­қандарда да болдыңыздар. Онда жергілікті халықтың қалай бел­сенді бол­ғанын да жақсы білесіздер. Бүгін де дәл солай, дауыс беруге асыққан елді көріп қуана­мын. Бірінші келген сай­лаушыға, ең жас, ең қарт сайлаушыларға және басқа да сайлаушыларға сыйлық үлестірдік. Еш­қайсысын құр қайтармауға тырыс­тық. Бір қызығы, бүгін ауылда 7 сай­лау­шының туған күні екен. Осында келіп, өз таңдауын жасаған туған күн иелерін де құр қайтармадық. Жалпы ха­лық­тың сайлауда белсенді болуы – жақсы­лықтың нышаны. Сондықтан біз ел­­дің мұндай маңызды науқанда бел­сен­ді болғанына қуанамыз, – дейді Әбдіқайыр Әйтімов.

Кенжетай ҚАЙРАҚБАЕВ