Кеше аудан әкімі Ардақ Ибраимов ауыл тұрғындарымен кездесті. Жұмыс сапарымен ең әуелі Аққыр ауылына аялдаған ол тұрғындардың талап-тілегіне құлақ түріп, елдің мәселесі ескерусіз қалмайтынын жеткізді. Аудан орталағынан шалғай орналасқан тұрғындардың талап-тілегі көп. Олар көтерген мәселе қалай, қашан шешімін табатыны беймәлім. Десе де, кешегі кездесуде тұрғындарға «өтірік уәде беруден аулақпын» деген аудан басшысы ұсыныстардың барлығын назарға алып, кезең-кезеңімен шешімін табуға тырысатынын жеткізді.

Спорт кешені бой көтеруде

Бүгінге дейін бірнеше рет Аққыр ауылына тілшілік тіршілікпен барып, елді мекеннің тынысымен танысқан болатынбыз. Байқауымызша, мұнда кәсіпкерлік саласы түрленген. Бүгінге дейін 91 шағын және орта кәсіпкерлік субъектісі тіркелген. Оның 54-і шаруа-фермер қожалығы болса, 36-сы – дара кәсіпкер. Қуантарлығы, қазіргі таңда барлығы 100 пайыз жұмыс жасап тұр.
«Бастау Бизнес» кәсіпкерлік негіз­дерін 6 ауыл тұрғыны оқып, оның 4-еуі қайтарымсыз грант алған. Ал «Аграрлық несие корпорациясы» АҚ арқылы 2 жоба қаржылай қолдау тауып, бүгінде өз жұмысын жасап жа­тыр. Ал 1 тұрғын «Ауыл аманаты» жо­басы бойынша асылтұқымды ірі қа­ра өсіруге құжаттарын өткізіп, жоба қар­жыландыруға ұсынылған. Жалпы құны 6 млн теңгені құрайды.
Иә, шалғайдағы Аққырдың ширақ шаруасына қарап, мұнда тұрғындарды кәсіппен айналысуға үндеу мақсатында жүргізілген түсіндірме жұмыстарының оң нәтиже бергенін аңғардық. Бұған дейін тек мал шаруа­шы­лығымен айна­лысып келген жер­гілікті тұрғындар биыл күрішке алғаш рет орақ салды. «Ер-Әлі» шаруа қожалығы суды қайта пайдалану арқылы елді мекенге 120 гек­тар «Маршал» сұрыпты күріш еккен.

Аққырлықтар бұған дейінгі кезде­сулерде көтерген күрделі мәселенің бірі мәдениет үйі ғимаратына қатыс­ты болған. Кеше­гі кездесуде де аққыр­лықтардың басты мәселесі де осы болды. Ауыл әкімінің айтуынша, бұған қатысты арнайы жоба әзірленген. Алдағы уа­қытта қаржылай қолдау тапса, Ақ­қыр­да жалпы құны 325 млн теңгені құрайтын 100 орындық ауылдық клуб бой көтереді.
Иә, мәдениет саласына жағдай жа­салған дұрыс. Кезінде осы аядай ғана ауыл­дан қан­шама өнер адамдары шы­ғып, респуб­ликалық, облыстық са­йыс­­тарда ауыл­­дың қарапайым ме­ха­ни­­затор, са­уын­шылары бас бәй­гені еншілеген.
Мыңнан астам халқы бар Аққырда биыл ел еңсесін тіктеуде жарқын жо­балар жүзеге аспақ. Об­лыс бойынша «Үлгілі елді мекен» но­минациясын жеңіп алған ауылда жоба аясында 15 млн теңге және аудандық бюджеттен 1,5 млн теңге, яғни жалпы құны 16,5 млн теңгеге спорт­тық жаттығу алаңын жүргізу жос­парлануда. Келер жылы алғашқы алты айлықта тиісті жұмыстар атқа­рылады.
Мәселен, мұнда «Қазақстан хал­қына» қоры арқылы құны 175 млн теңгені құрайтын ангар типтес спорт ке­шенінің құрылысы жүргізілуде. Жыл соңына дейін ел игілігіне пайдалануға беру жоспарлануда. Қазіргі таңда елді мекенде 1 спорт зал, 1 спорт алаңы тұрғындарға қызмет көрсетеді. Жыл басынан бері №14 спорт мектебінің ауыр атлетика филиалы ашылған. Қа­зіргі таңда 60 бала ауыр атлетика спортымен шұғылдануда.
Шалғайдағы ауылда білім саласы да айтарлықтай жақсарған. Елді мекен­дегі №188 орта мектеп 2020 жылы күрделі жөндеуден өткен. Қазіргі уақытта 157 оқушы білім алатын алтын ұяда 30 ұстаз еңбек етуде. Мұға­лім­дер­дің 96,8 пайызы – жоғары білімді маман. Былтыр мектепті 9 түлек бітіріп, 100 пайыз ұлттық бірыңғай тестілеуге қа­тысып, барлығы еліміздегі маң­дайалды оқу орындарында білім алуға грант жеңіп алған. Бір қызығы, мек­теп табалдырығын аттаған соңғы 6 жылдағы түлектердің барлығы ҰБТ-ға түгел қатысып, 100 пайыз жоғары оқу орнына түскен. Сонымен қатар ауылды абаттан­дыру барысында 1,3 млн теңгеге елді мекеннің кіреберісіндегі жа­сыл белдеуді қоршау және 1 млн тең­­геге санитариясын қамтамасыз ету, өңір­лерді дамыту бағдарламасы бо­­йынша 548 мың теңгеге ауылға кіребе­ріс және орталық көшеге 2 бей­не­бақылау камерасы орнатылған.
Жалпы ауылда 6 ішкі көше бар, бүгінде оның бесеуіне жарық жүргізілген. Был­тыр ауылдың ішкі жолдарын жақ­сарту мақсатында құны 489 млн 858 мың теңгеге 5 көшеге күрделі жөндеу жұмыстарын жүргізуге жоба-сметалық құжат әзірленіп, қаржыландыруға ұсы­нылған. Нәтижесінде келер жылы Н.Тас­­пенов және Аққыр көшелеріне күр­де­­лі жөңдеу жұмыстары жүргізіледі деп жос­­парлануда.
Мемлекет басшысының 10 мың адамға 100 жаңа жұмыс орнын құру жөніндегі тапсырмасына орай қазіргі таңда Аққыр ауылында 10 жаңа жұ­мыс орны ашылған. Биыл 52 тұрғын жұ­мыссыз ретінде тіркеліп, оның 27-сі тұрақты, 25-і ақылы қо­ғамдық жұмыс­қа орналасқан.

Жаңаталапта
жол жөнделеді

Аққырлық ағайынның ақ батасын алған аудан әкімі мұнан кейін Жаңа­талап ауылына табан тіреді. Жауапты сала басшыларымен бірге ауыл тұр­ғындарының мұң-мұқ­тажын тың­даған ау­дан басшысы жаңа­талап­тықтардың мәселесі жерде қал­май­тынын айтты. Білім ошағына жиыл­ған жұртқа аудан­да атқарылған бірқатар жұмысты айт­қан Ардақ Әбдіғаппарұлы алдағы уа­қытта ауылдық елді мекендер мәселесін ше­шу бағытында тиісті жұмыстар жүзеге асатынын жет­кізді.
800-ге жуық халық тұратын ел­ді мекенде өңірлерді дамыту бағ­дар­ламасы аясында 1,2 млн теңгеге П.Қарақұлұлы, Д.Бекбергенов көшелері жарықтандырылған. Бұдан бөлек 420 мың теңгеге П.Қа­рақұлұлы көшесі бойындағы сая­бақ абаттандырылып, 568 мың теңгеге ауыл ішінен күл-қоқыстар шыға­рылған. Ауылды абат­тандыру барысында 2,2 млн теңгеге П.Қара­құлұлы, Ә.Қожабаев көшелері бойынан жасыл белдеу қоршалып, 449 мың теңгеге ауылға кіреберіс көше бо­йына бейнебақылау камерасы орна­тылған.
– Ауылдық клубтың ғимарат мә­се­лесін білемін. Алдағы уақытта күр­делі жөндеуден өткізу үшін тиісті жұ­мыс­тар жасаймыз. «Бүгін немесе ер­тең бітіріп беремін» демеймін, десе де мәселелеріңіз үнемі назарымда. Әри­не, мәдениетке де, спортқа да көңіл бөлген дұрыс. Әйтсе де мен ең ал­ды­мен инфрақұрылымды дұрыстап ал­ған жөн деп ойлаймын. Мәдени ша­ралар мен спорттық сайыстарды мек­тептің акт залы мен спорт залында да өткізуге болады. Сондықтан ең ал­­дымен көшелерімізді күрделі жөн­деуден өткізіп алғанымыз жөн. Құны 460 млн теңгеге 100 орындық клуб құ­рылысына жоба-сметалық құжат әзір­леніп, қаржыландыру үшін тиісті бас­қармаларға бюджеттік өтінім жолданды, – деді аудан әкімі Ардақ Ибраимов.
Былтыр ауылға кіреберіс жол бойы­нан 1 млн 715 мың теңгеге арка ор­натылған. Ауылда 3 ішкі көше бар. Оның екеуіне асфальт, 1 көшеге қиыр­шық тас төселген. Келер жылы 128 млн теңгеге осы 3 көшені күрделі жөңдеуден өткізуге облыстық бюджеттен қаржы бөлуге ұсынылды.
Жергілікті халық бүгінде кәсіпкерлік саласына ден қойған. Әрине, бұл – қуа­нарлық жағдай. Себебі бұл шалғай ауыл­дағы шаруашылықтың ширауына, әрі жұмыссыздық мәселесін тұсауға да үлкен қолғабыс болмақ.
Ауыл әкімінің айтуынша, елді мекен­де 48 кәсіпкерлік субъектісі тіркелген. Бүгін­де оның бар­лығы жұмыс жасап тұр. Биыл бір аза­мат жылқы ұстап, сау­мал сату үшін «Бастау Бизнес» бағдарламасы аясында қайтарымсыз грант ұтып алса, 1 кәсіпкер мал шаруа­шылығы бағы­тын­да төмен пайыз­бен несие алған.
Сондай-ақ халықтың ұсынысына сәйкес ауылдық округте 7,3 млн теңгеге жаңа балалар ойын алаңы салынып, 949 мың теңгеге алаңның жасанды тө­сеніші ауыстырылған. Кездесуде ауыл тұрғындары елді мекенге дейінгі ау­­­дан­дық маңызы бар жолда төрт тү­лік­ке байланысты рейдтік шараларды ұйым­дастыруды ұсынды. Аудан басшы­сының айтуынша, бұл бағыттағы жұ­мыс­тар уақытылы шешімін тауып, «Боз арық» көпірін күрделі жөндеу мәселесі де кезең-кезеңімен шешімін таппақ.

Бірлігі бекем ауыл

Келесі аялдамамыз – мемлекет және қоғам қайраткері есімін иеленген, 2 мыңға жуық халық мекен еткен тірлігі тын­дырымды Темірбек Жүргенов ауы­лы. Халықтың хал-жағдайын сұрап, ат­қа­­рыл­ған бірқатар жұмысты са­ра­лаған аудан басшысы елдің талап-тілегіне құ­лақ түрді.
Айта кетейік, аудан бойынша ауыл­дық округтердегі көлемді жобалардың бірі осы ауылда жасалуда. Биыл ауыл­дық округте жалпы құны 414,4 млн тең­геге тұрғын үй секторының ин­же­нер­лік-коммуникациялық инфра­құ­ры­лымының құрылысы жүргізілді. Со­ны­мен қатар 435 мың теңгеге елді ме­кеннің ішкі көшелер жарығына жәй жөн­деу жұмыстары жүргізіліп, «Ер-Әлі» шаруа қожалығының демеу­ші­лігімен Т.Жүргенов, Тоғанас батыр, Сә­дір би, М.Нұрылдаев көшелеріне 2 млн теңгеге 100 дана көше жарығы қойылды.
Қазіргі таңда 145 млн теңгеге ауылдық мәдениет үйі ғимаратына күрделі жөндеу жүргізу мен 677,9 млн теңгеге елді мекендегі ішкі көше­­лерге күрделі жөндеу жұмыстарына жо­ба-сметалық құжат әзір­леніп, қар­жыландыру үшін тиісті бас­қар­маларға бюджеттік өтінім жолданған.
Айта кетейік, шаруасы шираған ауыл халқының негізігі тіршілік көзі – егін және мал шаруашылығы. Ауылда мал шаруашылығы қарқынды дамыған. Бүгінде ауылда мал шаруашылығымен айналысатын кәсіпкерлерде 545 ірі қара, 206 жылқы мен бірнеше түйе бар. Ал ауылдық округтің жеке отба­сы­ларында 1903 ірі қара, 512 жылқы, 4114 уақ мал, 40 түйе бар.
Бұған дейін Сыр салысынан мол астық жиған жергілікті шаруашылықтар былтырдан бері бақша өнімдеріне басымдық берген. Мұнан бөлек бірнеше гектарды құрайтын алмабақ өнімдері де қазіргі таңда еліміз бойынша үлкен сұранысқа ие.
Айта кетейік, бүгінде ауылда жүзге жуық кәсіпорын бар. Тіркелген кә­сіп­керлік субъектілерінің қазіргі таңда 99 пайызы жұмыс жасап тұр. Ауыл әкімі Бауыржан Тұңғышбаев кәсіп бастаймын деген жерлестерін қа­шанда сүйемелдеуге дайын. Оның айтуынша, ауылда кәсіпкерлікке бет­бұр­ған азаматтар жетерлік. Бұл әрине, елді мекеннің еңсесін тіктеуге үл­кен қолғабыс болып отыр. Ауыл тұр­­ғындары тек мал, егін шаруа­шы­лығымен шектеліп қалмай, кәсіп­кер­лік саласын түрлендірген. Мәселен, жыл басынан бері ауылдағы 5 тұрғын кә­сіп­керлікті дамыту бағытында қай­та­рымсыз грант алған. Оның 1-еуі – кондитерлік өнім, 1-еуі – фасфуд өнімі, 2-еуі – сүт бағытындағы ірі қара ұстау, 1-еуі – дәнекерлеу қызметі. Ал «Ауыл ама­наты» жобасы аясында 4 жоба ма­құлданған. Оның ішінде жылыжай салу және ет бағытындағы асылтұқымды мал шаруашылығын дамыту жобасы бар. Жалпы айтқанда, ауылда қай са­ланы сараласақ та өсу, өрлеу, даму динамикасы жоғары. Әсіресе жергілікті шаруашылықтар астықтан тау тұр­ғы­зып, жыл сайын рекордтық өнімге қол жеткізуде.
Біз тілге тиек еткен жарқын жоба­лардың сәтті жүзеге асуына қай істе де ауызбіршілік пен ынтымақты ту еткен тұр­ғындардың үлесі зор.

Кәсіпкерлік қарқын алған

Халықтың ұсынысын тыңдауға ба­ғытталған келесі кездесу Мәдениет ауы­лында жалғасты. Атқарылған жұ­мыс­тарды саралаған аудан бас­шысы ауылдағы мәселелерді назарға алды.
Елді мекенде биыл 1,3 млн тең­геге ауылдың ішкі көшелерінде жасыл белдеуді қоршау және 522 мың теңгеге ауылдың санитариясын қам­тамасыз ету жұмыстары жүргізілген.Сонымен қатар 698 мың теңгеге Мәдениет ауылдық округі әкімі ап­па­ратының ғимаратына 3 бейне­бақылау камерасы орнатылып, құны 2,6 млн теңгені құрайтын «Жеңіс» бағы жанында орна­ласқан спорт алаңына жөндеу жұмыс­тары жүргізілген.
Бұдан бөлек ауыл тұрғындарының демеушілігімен 3,5 млн теңгеге А.Құ­нанбаев көшесі бойынан 0,10 гектарды құрайтын ба­лалар ойын алаңы мен саябақ, Ж.Жабаев көшесі бойынан 0,15 гектар жерге ағаш көшеттері отыр­ғызылып, «ӘлемТрансЖол» ЖШС де­­­меу­шілігімен 7 млн теңгеге ауыз­су мұ­нарасы ауыс­тырылған. Сон­дай-ақ жал­пы құны 199,8 млн теңгені құрайтын Жаңа­қо­ныс көшесін орташа жөндеуге ЖСҚ әзірленіп, қаржыландыру үшін тиісті басқармаларға бюджеттік өтінім жолданды.
2 мыңға жуық тұрғыны бар ауылда жұмыссыздық деңгейі 1,5 пайызды құрайды. Мұнда 137 кәсіпкерлік субъек­тісі тіркеліп, қазіргі таңда оның 108-і нақты жұмыс жасап тұр. Ал биыл 4 тұрғын мемлекет тарапынан бе­рі­летін қолдауды тиімді пайдаланып, өз кәсібін бастаған. Кәсіпкерлердің басым бөлігі ауылда мал шаруа­шылығын дамыту бағытында жұмыс жасауда.
Бүгінде елді мекенде 11 ішкі көше бар. Оның 9-ы асфальтталған. Ал 2 көше күрделі жөндеуді қажет етеді. Кездесу барысында тұрғындар жұ­мыс­сыздық, қылмыстың алдын алу бойынша нақты мәселелер көтеріп, әсіресе кәмелеттік жасқа толмаған жасөс­пірімдердің темір тұлпар тізгін­деуіне қарсылық білдірді. Жергілікті жұрт ауылдың үстімен аудан орталығына немесе басқа ауылдарға қарай бағыт алған жүргізушілер жыл­дамдықты шектен тыс асырып айдай­тындықтан мектепке баратын балалардың болашағына алаңдаулы. Сон­дықтан олар ауылға қосымша жылдамдықты асыруға шектеу болатын кедергілер орнатуды сұрады. Ардақ Ибраимов бала болашағына тек мектеп пен полиция қызметкерлері ғана емес, ең алдымен үйдегі ата-ана да жауапты екенін қатаң ескертті. Ол кездесу со­ңында айтылған ұсы­ныстар аясында жауапты сала бас­шыларына тиісті тап­сырмалар берді.

Электр желілері жаңғыртылуда

Мұнан әрі халықпен кез­десу Мыр­забай ахун ауылында жалғасты. 1300-ге жуық халқы бар ауылда бү­гінде 134,7 млн теңгеге тұрғын үй секторының инженерлік-ком­муни­кация­лық инфрақұрылымының құ­рылысы жүр­гізілуде. Ауыл әкімінің ай­туынша, жоба жыл соңына дейін ел игілігіне пай­далануға берілмек. Сондай-ақ биыл мұнда 917 мың теңгеге Колхоз көшесі бойынан жасыл белдеу қоршалып, 850 мың теңгеге ауыл ішінен күл-қоқыстар шығарылған.
Ал өңірлерді дамыту бағдарламасы аясында құны 1,6 млн теңгеге елді мекендегі Колхоз көшесі жа­рықтандырылып, 550 мың теңгеге елді мекенге кіреберіс және ішкі көшелерге 4 бейнебақылау камерасы орнатылған. Бұдан бөлек құны 4,3 млн теңгеге учаскелік полиция инспекторына қыз­меттік тұрғын үй сатып алынған.
Жергілікті тұрғындар кәсіп ашуға бейім. Бүгінде мұнда 74 кәсіпкер бар. Қазіргі таңда 73-і тұрақты жұмыс жасап тұр. Айта кетейік, мұнда бүгінге дейін түйткілді мәселенің түйіні тарқатылған. Толығырақ айтсақ, ауылда 5 ішкі көше бар. Оның 3-еуіне асфальт төселген. Ал 2-еуі күрделі жөндеуді қажет етеді. Алдағы уақытта 595,1 млн теңгеге Жаңақоныс пен Кенжебек Оспанов көшелеріне күрделі жөндеу жұмыстары жүргізіледі. Былтыр ауылға жалпы құны 385,9 млн теңгеге емхана салынған. Алдағы уақытта қаржылай қолдау тапса, 346,4 млн теңгеге 100 орындық мәдениет үйі де бой көтермек. Бұған қатысты жасалған арнайы жоба да жоқ емес. Міне, Мырзабай ахун атындағы ауылдың бүгінгі тірлігі тындырымды. Ауызбірішілігі мығым елдің аза­маттары кәсіп ашуға машықтанғандай.
Халықпен кездесу барысында ау­дандағы атқарылып жатқан ауқымды жұмыстар Ел Президентінің қолдауы мен Үкімет басшысының, облыс әкімінің тапсырмасына сәйкес атқарылып жат­қанын айтқан аудан әкімі Ардақ Ибраимов бірінші кезекте ел ішіндегі өзекті мәселелерді шешуге жұмыс жасайтынын жеткізді. Сондай-ақ ол тұр­ғындардың түйткілді сауалдарын да жа­уапсыз қалдырмады.

Тірлігі тындырымды Таң

Ауыл тұрғындарының әлеуетін көтеру мақсатында мемлекет тара­пы­нан қолдау тапқан ауқымды жо­балардың жемісін Таң ауылынан көруге болады. Бұл туралы аудан әкімі Ардақ Ибраимов Таң елді мекенінде өткен халықпен кездесуде айтты.
Таң ауылдық округіне биыл 116,3 млн теңгеге кіреберіс көше жарығы бар автомобиль жолына күрделі жөн­деу, 78,1 млн теңгеге №118 орта мек­теп ғимаратының қасбетіне ағым­да­ғы жөндеу және мектеп аумағын абат­тандыру жұмыстары жүргізілген.Өңірлерді дамыту бағдарламасы шең­берінде жалпы құны 3,7 млн теңгеге елді мекенді көркейту-көгалдандыру, абаттандыру жұмыстары жүргізіліп, кіреберіс көшелерге бейнебақылау ка­ме­ралары орнатылған.
Тәуелсіздік жылдары түлеген Таң­да 6,5 млн теңгеге ішкі көшелерді жарық­тандыру жұмыстары, 1,7 млн теңгеге мал тоғыту алаңының құрылысы жүргі­зілген. Жалпы құны 350,3 млн теңгеге ауылдық мәдениет үйінің ғимаратына күрделі жөндеу жұмыстары жүргізілуде. Бұл жұмыстар желтоқсан айында аяқ­талады.
Сондай-ақ биыл «Таң ЛТД» ЖШС-ның демеушілігімен жалпы құны 12 млн теңгеге ауылдағы Орынбай жырау, Сегізбай би, Жамбыл, Абай көшелерін абаттандыру жұмыстары жүргізіліп, 40 млн теңгеге 4 көшеге заманауи свето­диодты шамдармен түнгі жарықтандыру жұмыстары жүргізіледі.
Өздеріңіз білетіндей, Таң ауылы соңғы жылдары ерекше қарқынмен да­мып келеді. Елді мекенде Еңбек Ері Имамзада Шағыртаевтың баста­масымен бірқатар жоба жүзеге асқан. Қазіргі таңда оның барлығы жергілікті халықтың игілігіне жарап тұр. Кешегі кездесуде Таң ауылының тұрғындары айтарлықтай мәселе көтермеді. Олай болатындай жөні бар. Себебі бұл ауылда тұралаған мәселе жоқ деуге болады. Тұрғындар тарапынан тек «кө­гілдір отын қашан тұтынамыз?» деген сауал қойылды.
– Барлық мәселе өз ретімен шешіліп жатыр. Биыл кентке жақын орналасқан Ақсу мен Мөрәлі Шәменов ауылын көгілдір отынға қоссақ, келер жылы Бұқарбай батыр мен Қаракеткен елді мекеніне көгілдір отын тарту жоспарда бар. Реттілік осылайша жал­ғасып, сіз­дер де көгілдір отын тұты­натын күнге жетесіздер, – деді Ардақ Ибраимов.
Ардақ Әбдіғаппарұлының жұмы­сы­на сәттілік тілеген ақсақалдар аудан басшысына батасын берді.

Жол сапасы жақсармақ

Халықпен кездесу барысында тұр­ғындар тарапынан қозғалған мәсе­ле­лерді шешуге тырысатынын айтқан аудан әкімі Ардақ Ибраимов Бұқарбай батыр ауылында атқарылып жатқан жарқын бастамаларға тоқталды.
Ауылдағы сапасы сын көтермейтін жол мәселесі биыл шешімін тапқан. Мұнда жалпы құны 403,1 млн теңгені құрайтын 11 көшенің құрылыс жұ­мыстары басталыпты. Қазіргі таңда 2 көшеге республикалық бюджет есе­бінен 50 млн теңге қаржы бөлініп, ас­фальт төсеу жұмыстары жүргізілген. Қал­ған 9 көше келер жылы жөндеуден өтеді.
Биыл «Ауыл – ел бесігі» жобасы аясында жалпы құны 428 млн теңгеге №33 орта мектеп ғимаратына күрделі жөндеу жұмыстары жүргізілді. Ал өңір­лерді дамыту бағдарламасы ая­сын­да 6,7 млн теңгеге Абай көшесіне темір шарбақ орнату, 1,2 млн теңгеге күл-қоқыс жоюға арналған полигон қоршалып, бейнебақылау камералары орнатылды. Сондай-ақ елді мекенді көркейту-көгалдандыру, абаттандыру жұмыстарына 1 млн теңге, сани­тар­лық тазалықты қамтамасыз ету жұ­мыстарына 1 млн теңге қаралған.
Ауылдық мәдениет үйі ғимаратын күрделі жөндеуден өткізуге 3 млн теңгеге жоба сметалық құжаты жа­салып, мемлекеттік сараптамадан өткі­зілді. Жобаның жалпы құны – 131,9 млн теңге. Сондай-ақ жалпы құны 170,2 млн теңгеге 16 көше жарықтандырылады.
– Мен үшін халықтың мәселесі бі­рінші орында. Сондықтан қолымнан келгенше елді мекендерде қордаланған мәселелерді шешуге жұмыс жасаймыз. Ел болғасын мәселе болатыны белгілі. Өздеріңіз білетіндей, оны бір күнде шешіп тастау да мүмкін емес, десе де барлығын кезең-кезеңімен шешуге тырысамын. Мүмкіндік болып жатса, барынша сіздердің талап-тілектеріңізді орындаймын, – деді аудан басшысы.
Ақсақалы баталы, ұрпағы ақыл­ды, көпұлтты елді мекен ретін­де ерек­шеленетін Бұқарбай батыр ауы­лын­дағы тұр­ғындар Ел Президентіне, Үкі­мет бас­шысына және облыс әкіміне алғыс­та­рын жаудырды.

Жарқын жобалар жүзеге асқан

Биыл табиғи газге қосылған екі ауылдың бірі – Ақсу. Тұр­ғындармен кез­десу барысында аудан басшысы ат­қа­рылған жұмыстарға тоқталып, ке­лер жылы ауылдың ішкі кө­шелерін күрделі жөндеуге жоба-сме­талық құ­жат­тар әзірлеу қолға алына­тынын жет­кізді.
Ақсу ауылына биыл жалпы құны 545,2 млн теңгені құрайтын газ та­рату желілерінің және жеткізуші газ құбырының құрылыс жұмыстары жүргі­зіл­ді. Сонымен бірге елді мекеннің тұр­­ғын үй секторының инженерлік-ком­му­никациялық инфрақұрылымының құры­лыс жұмыстарына 203,6 млн тең­ге бөлініп, қазіргі таңда жұмыстар толығымен аяқталған. Өңірлерді да­мыту бағдарламасы арқылы 2,6 млн тең­ге бөлініп, елді мекендегі парк ішін абаттандыру жұмыстары және Т.Бо­ранбаев көшесіндегі арықтарды шар­бақпен қоршау жұмыстары жасалған.
Елді мекендерде санитарлық та­залық жұмыстарына 1 млн теңге бө­лініп, тиісті жұмыстар атқары­луда. Ауыл­ды абаттандыру бойынша 8,3 млн теңге бөлініп, оның ішінде 3,4 млн теңгеге Ақсу елді мекеніндегі бала­лар спорт алаңын ағымдағы жөндеу жұмыстары және қалған 4,9 млн тең­геге Т.Елеусінов көшесіне торлы ме­талл қоршауларын орнату, дизельдік мо­топомпа орнату, «Ер есімі – ел есінде» ескерткішіне жөн­деу жұмыстары және елді мекенге 4 дана бейнебақылау камераларын орна­ту жұ­мыс­тары жүргізілді.
Айта кетейік, ауылда демеушілер тарапынан да бірқатар жоба жүзеге асқан. Мәселен, «Сәрке Батыр» ЖШС тарапынан балалар ойын алаңының құрылысы жүргізіліп, тұрмысы төмен отбасының үйіне газ тартылған. Ал «АВ Агро Орда» ЖШС тарапынан «Бер­кімбай кәлпе» кесенесін газ­бен жылыту жү­йесіне қосу жұмыс­тары жүргізілген. Жалпы жергілікті шаруашылықтар ауыл­­­­дың әлеуетін арттырып, жергілікті мә­­селелерді шешуге 12 млн теңге қар­жы құйып, 4 жобаны жүзеге асырған.
Аудан әкімінің кешегі тұрғын­дар­мен кездесуі Ақсу ауылында қоры­тын­ды­ланып, түйткілді мәселелер назарға алынды.

Ақтоты ЕРЖАНҚЫЗЫ