Елорда төрінде Мемлекет басшысы Қасым-Жомарт Тоқаевтың қатысуымен ауыл шаруашылығы еңбеккерлерінің бірінші форумы өтті. Форумға аймақ басшысы Нұрлыбек Нәлібаев бастаған облыс делегациясы қатысты. Делегация құрамында Қазақстанның Еңбек Ерлері Абзал Ералиев, Имамзада Шағыртаев және 50-ден астам еңбек адамы бар.

Президент Жарлығымен ауыл ша­руашылығы, тамақ және өңдеу өнер­кәсібі қызметкерлері күні қарса­ңында елдің агроөнеркәсіп кешеніндегі жемісті еңбегі, отандық ауыл шаруашылығы инфрақұрылымын дамытуға қосқан үле­сі үшін Сыр өңірінің еңбеккерлері «Ерен еңбегі үшін» медалімен мара­патталды. Бір сөзбен айтқанда, адал ісімен көпке үлгі бол­ған, ерте көк­тем­нен егіс даласында тер төгіп, жо­ғары жетістіктерге жеткен дала дара­боздарының еңбегі еленді.
Иә, биыл мерекелі жылды аудан еңбеккерлері мол табыспен қарсы алды. 2024 жылдың қорытындысымен облыс бойынша ауданымыз аг­роөнер­кәсіп кешенін дамытуда ең жоғары көр­­сеткіштерге қол жеткізіп, «Үздік ау­­дан» номинациясына ие болды.
Нақтырақ тоқталсақ, аграрлық ау­данда 37 218 гектарға ауыл шаруа­шы­лығы дақылдары егілсе, оның 19 800 гектары – күріш. Шаруашылықтар ала жаздай баптаған өнімін шашпай-төкпей жинап алды. Күріштің әр гектарынан 60,5 центнерден өнім алып, қамбаға 1 197 900 центнер өнім құйды.
Күріштен бөлек бидай, арпа, сұлы, қант құмайы, мақсары, картоп, көкөніс және басқа да бақша дақылдары то­лық жинап алын­ған. Тарқатып айт­сақ, 129 гектар күздік бидайдың әр гек­тарынан 13, 770 гектар жаздық бидайдың әр гектарынан 9 центнерден, 665 гектар мақсарының әр гектарынан 8,7, 200 гектар қант құмайының әр гектарынан 41, 40 гектар арпаның әр гектарынан 8,2 центнерден өнім жиды. Мұнан бөлек 64 центнер сұлы, 33 276 центнер картоп, 195 центнер көкөніс, 299 650 бақша дақылдары жиналды. Бүгінде 4850 гектар жаңа жоңышқаның әр гектарынан 12,5 центнерден өнім алынды. Сондай-ақ 8091 гектар ескі жоңышқаның 191 гек­тары тұқымға алы­­нып, 7900 гектар жо­ңышқаның әр гек­тарынан 65 цент­нерден өнім алынды.
Сондай-ақ аудан шаруашылықтары техника пар­кін жаңарту жұмыстарын да үнемі жүргізіп ке­леді. Биыл 1670,6 млн теңгеге 26 ауыл шаруа­шылығы тех­ни­касы сатып алынды. Ал күзгі дала жұ­мыстарына 1027 ауыл шаруашылығы техникасы қатысқан. Оның ішінде 431 трактор, 249 комбайн, 124 жатка, 58 жүк көлігі, 165 трактор тіркемесі бар.
Осы орайда өңірдің саладағы же­тістігі ескеріліп, аудан орта­лығын­да­ғы «Агро­хим­сервис-С» ЖШС дирек­то­ры Сергей Ким «Құрмет» ордені ме­­даліне лайық деп танылды. Жалпы «Агро­хим­сер­­вис-С» ЖШС-ның түйір­шік­телген азот тыңайтқыштарын өндіру зауыты «Биз­нестің жол картасы – 2020» бағ­дарламасы арқылы 2020 жылы іске қо­сылған. Зауыт жылына 50 мың тон­на түйіршіктелген азот ты­ңайт­қыш­тарын өн­діреді. Қазіргі таңда зауыт­та 20 адам тұ­рақты жұмыс жасайды.
Мемлекет басшысы форумның елі­мізде тың игеру науқаны басталғанына 70 жыл толуымен тұспа-тұс келіп отыр­ғанын атап өтті. Тың игеру науқанының жағымды және жағымсыз түрлі сал­дары болғанына қарамастан, ауыл шаруашылығында көптеген оң өзгеріс орын алды. Аз уақыт ішінде Қазақстан әлем­дегі астықты елдердің біріне ай­нал­ды.
– Қазақстан егіс алқабы және жайы­лымдық жер көлемі жағынан әлемде алтыншы орын алады. Біз бидай экс­порттайтын 10 ірі мемлекеттің қата­рына кіреміз. Ұн экспорты бойынша көш басындағы елдің біріміз. Биыл түрлі қиындыққа қарамастан, қам­ба­мыз астыққа толды. Күзгі жиын-те­рімде 26,7 миллион тонна дақыл жи­налды. Бұл – соңғы он жылдағы ре­кордтық көрсеткіш. Диқандарымыз тамаша нәтижеге жетіп отыр. Құттықтаймын және баршаңызға шынайы ризашылығымды білдіремін! Ауыл шаруашылығы бәсекеге қабілетті озық сала болуы керек. Агроөнеркәсіп кешені экономикадағы басты қозғаушы күштің біріне айналуы тиіс. Бизнес те, мемлекет те осыған мүдделі. Бұл ең алдымен азық-түлік қауіпсіздігін қам­тамасыз ету тұрғысынан маңызды. Ауыл­дағы ағайынның тұрмысы да осы са­лаға тікелей байланысты, – деді Мемлекет басшысы.
Сонымен қатар Президент алда атқарылатын жұмыстардың не­гізгі ба­­­ғыт­­тарына да тоқталды. Атап айтқанда, агроөнеркәсіп кешенін қаржы­ланды­руды жүйелі жүргізу, саланы индус­трияландыруды белсенді түрде жал­­ғастыру, ауыл шаруашылығы ғылы­мын өркендету, селекция мен тұ­қым ша­руашылығын жандандыру, озық тех­но­логияларды енгізу, ауыл шаруа­­шы­лығы техникасының қолже­тім­ділігін арт­тыру және агроөнер­кәсіп са­ла­сы­ның экспорттық әлеуетін кү­шейту мә­се­лелерін қозғады.
Мемлекет басшысы келер жылды «Жұмысшы мамандықтар жылы» ре­тінде жарияланғанын атап өтіп, на­ғыз еңбек адамдары жо­ға­ры дең­гей­де ұлықталуы тиіс еке­нін айтты. Яғни бұл бас­тама қоғамда еңбек­қорлық пен кә­сіби құнды­лық­тар­ды дәріптеуге ықпал ететініне сенім білдірді.

Жандос ЖАЗКЕН