Кеше аудан әкімі Ардақ Ибраимов Қазақстанның Еңбек Ері, «Алтын жұлдыз», «Отан» орденінің иегері, «Таң ЛТД» ЖШС төрағасы Имамзада Шағыртаевты қабылдады. Қабылдауда Еңбек Ерінің 55 жас туған күніне орай аймақ басшысы Нұрлыбек Нәлібаевтың және аудан әкімінің құттықтауларын табыстады.Салтанатты қабылдауға аудандық ардагерлер кеңесінің төрағасы Садық Әлиев, аудандық мәслихат төрағасы Өмірзақ Елеусінов, аудан ардагерлері, «Ер Әлі» ШҚ төрағасы, Жалағаш ауданының құрметті азаматы Әліби Бекжанов қатысты.

– Өздеріңіз білесіздер, Таң ауылының бүгінгі келбеті бұрынғыдан көп өзгерген. Имамзада Қуанышбайұлы басқаратын «Таң ЛТД» серіктестігі арқылы Таң ауылын абаттандыру бағытында жалпы құны 2 млрд теңгеден асатын жобалар жүзеге асырылуда. Биыл да ауылдық округте серіктестік арқылы 3 өнеркәсіптік база, 2 пәтерлі 10 тұрғын үйдің құрылыстары, сондай-ақ ішкі көшелерді жарықтандыру, балабақша ғимаратын ағым­дағы жөндеу және абаттандыру жұмыстары жүргізілуде. Жыл сайын көркейіп келе жатқан ауылға қарап, алдағы күнге деген халықтың сенімі артып отыр, – деді Ардақ Ибраимов.
Бұған дейін Таңда 14 көше жөндеуден өткен. Ауыз су, аяқсу мәселесі толық шешімін тапқан. «Таң ЛТД» ЖШС-ның қолдауымен 90 мл­­н теңгеге көшелерді түнгі жарықтандыру жұмыс­тары жасалып, 80 миллион теңгеге «Тағ­зым» алаңы салынған. Жаңақоныс елді ме­ке­ніндегі балалар ойын алаңы ағым­дағы жөндеуден өтіп жатыр. Сондай-ақ 200 млн тең­геге спорт кешенінің құрылысы да жүргізілуде. Жалпы ауыл­дағы жобалардың басым бөлігі Еңбек Ерінің демеу­шілігімен жүзеге асты десе де болады.
Іскер азамат туған жерінде жалпы құны 300 млн теңгеге 120 орындық «Таң бөбегі» балабақшасын салып берді. Қа­зіргі таңда онда 21 адам жұмыспен қам­тылған. 56 млн теңгеге спорт кешенін ашып, 16 адамның тұрақты жұмыспен қамтылуына қолғабыс етті.
Қабылдауда зиялы қауым өкілдері Еңбек Ерінің жүріп өткен жолы мен үлгілі істеріне тоқталып, алдағы жоспарлына сәттілік тіледі.

«ЖЖ» ақпарат