Қазақстан Республикасының сот жүйесінде кассациялық сот сатысы ерекше маңызға ие. Ол төмен тұрған соттар қабылдаған сот актілерінің заңдылығы мен негізділігін тексеруге бағытталған және азаматтардың құқықтары мен заңды мүдделерін қорғаудың маңызды тетігі болып табылады.

Кассациялық соттың басты міндеті – істі қайта қарау емес, соттардың заң нормаларын дұрыс қолдануын бақылау. Яғни, кассациялық тәртіпте істің мән-жайлары қайтадан анықталмайды, дәлелдемелер қайта бағаланбайды. Бұл сатыда сот, ең алдымен, материалдық және процестік құқық нормаларының сақталуын тексереді.

Кассациялық сот өндірісі сот практикасының біркелкілігін қамтамасыз етуге ықпал етеді. Әртүрлі соттарда ұқсас істер бойынша әрқилы шешімдер қабылдануы құқық қолдану тәжірибесінде ала-құлалық туындатуы мүмкін. Осы тұрғыда кассациялық сот құқықтық позицияларды қалыптастырып, сот тәжірибесін біріздендіруде шешуші рөл атқарады.

Сонымен қатар, кассациялық сот әділ сот төрелігін жүзеге асырудың қосымша кепілі болып табылады. Тараптар төменгі сатыларда жіберілген елеулі заң бұзушылықтарды дәл осы кассациялық тәртіпте жоюға мүмкіндік алады. Бұл азаматтардың сотқа деген сенімін арттырып, құқықтық мемлекеттің қағидаттарын нығайтады.

Кассациялық шағым беру тәртібі мен мерзімдері заңмен нақты белгіленген. Бұл тараптардың құқықтарын тең қамтамасыз етуге және сот процесінің тұрақтылығын сақтауға бағытталған. Осы талаптарды сақтау кассациялық сотқа жүгінудің табысты болуына тікелей әсер етеді.

Кассациялық сот – сот жүйесінің ажырамас бөлігі. Ол заңдылықты сақтауға, сот қателіктерін түзетуге және құқық қолдану тәжірибесін жетілдіруге қызмет етеді. Сондықтан кассациялық сатының тиімді жұмыс істеуі – әділ сот төрелігінің маңызды шарты.

Жалағаш аудандық сот әкімшісінің

бас маман-сот отырысының хатшысы  Ғ.Б.Сахи