Көкжөтел – тыныс алу жолдарын зақымдайтын, ауа-тамшы жолымен тез таралатын жұқпалы ауру. Оның қоздырғышы – бактерия.

Бұл ауру көбінесе балалар арасында жиі кездескенімен, ересектер де ауыруы мүмкін. Әсіресе екпе алмаған балалар үшін көкжөтел өте қауіпті.

Көкжөтелдің алғашқы белгілері қарапайым суық тиюге ұқсас болады. Аурудың бастапқы кезеңінде мұрын бітеліп, жеңіл жөтел пайда болады, кейде дене қызуы сәл көтеріледі. Осы себепті көп жағдайда ауруды бірден анықтау қиынға соғады. Бірнеше күннен кейін ауру асқынып, жөтел күшейеді. Ең тән белгісі – ұстамалы, тоқтаусыз жөтел. Жөтел кезінде адам бірнеше рет қатарынан жөтеліп, соңында қатты дем алып, «ысқырық» тәрізді дыбыс шығарады. Кейде жөтелден кейін құсу да байқалады.

Көкжөтелдің қауіптілігі – оның асқынуларында. Әсіресе нәрестелер мен кішкентай балаларда өкпе қабынуы, тыныс алудың қиындауы, тіпті құрысу сияқты ауыр жағдайлар туындауы мүмкін. Сондықтан ата-аналар балаларындағы ұзаққа созылған жөтелге бейжай қарамауы тиіс.

Ауру ауа-тамшы жолымен тарайды, яғни науқас адам жөтелгенде немесе түшкіргенде бактериялар ауа арқылы басқа адамдарға жұғады. Сол себепті көкжөтелдің алдын алуда жеке гигиена ережелерін сақтау және науқас адамдармен байланысуды шектеу маңызды.

Көкжөтелдің алдын алудың ең тиімді жолы – вакцинация. Балаларға бұл екпе ұлттық егу күнтізбесіне сәйкес салынады. Вакцина аурудың ауыр түрінен қорғап, асқынулардың алдын алады.

Емдеу барысында дәрігердің кеңесімен антибиотиктер тағайындалады. Сонымен қатар науқасқа тыныштық, таза ауа және мол сұйықтық ішу ұсынылады. Жөтелді өз бетінше емдеу немесе халықтық әдістерді дәрігердің кеңесінсіз қолдану қауіпті болуы мүмкін.

Көкжөтел – алдын алуға болатын, бірақ уақытында емделмесе ауыр асқынуларға әкелетін ауру. Сондықтан екпе алу, ауру белгілерін ерте тану және дер кезінде дәрігерге қаралу – денсаулықты сақтаудың басты кепілі.

Г.Айымбетова, Жалағаш аудандық санитариялық –эпидемиологиялық бақылау басқарма басшысы