Мәжіліс депутаты Асхат Аймағамбетов мұғалімдер МӘМС-ке тұрақты түрде жарна төлесе де, дәрігерге көрінерде проблемаларға тап болатынын айтты, Бұл туралы Қазбілім порталы BAQ.KZ сайтына сілтеме жасап хабарлайды.

Көптеген педагог МӘМС-ке тұрақты түрде жарна төлесе де, міндетті медициналық сақтандыру жүйесі аясында медициналық көмек алуда проблемаларға тап болып жатыр. Бұл мәселе ФОМС және Денсаулық сақтау министрлігінің бюрократиялық процедураларымен байланысты және педагогтерді ақылы медициналық қызметтерге жүгінуге мәжбүр етіп жатыр, — дейді депутат.

Оның сөзінше, Қарағандыда өткен кездесуде педагогтер осы мәселені көтерген. Бұл проблеманың себебі — жазда, үш айлық демалыс және каникул кезінде, кейбір бухгалтерлер жалақыны және МӘМС бойынша тиісті жарнаны бір аударыммен аударады.

Бұл өз кезегінде, МӘМС-тің бюрократиялық тиімсіздігінен оларды сақтандырылған азаматтар мәртебесінен айырып, медициналық көмектің қолжетімсіздігіне алып келді. Біз бұған дейін Денсаулық сақтау министрлігіне осы мәселені тез арада шешу туралы талап қойғанбыз. Бұл мәселеде жауапсыздық пен міндеттерін орындаудағы бейқамдыққа жол берілмейді. Болашақта бұл проблеманы шешеміз деп сенемін, — деп айтты Асхат Аймағамбетов.

Депутаттар кездесуде білім беру саласына қатысты заң жобаларды талқылап, ұсыныстарды тыңдаған.