Елімізде спортқа ерекше көңіл бөлініп отыр. Нәтижесінде спортшыларымыз облыстық, республикалық жарыстарда топ жарып, үздік нәтижеге қол жеткізіп жүр. Әрине, бұл ретте жастардың бос уақытын тиімді өткізуге сеп болған үйірме мен спорт мектептерінің үлесі басым екенін жоққа шығара алмаймыз. Осы ретте кеше Мәдениет ауылындағы балалар мен жасөспірімдер спорт мектебіне арнайы барып, ауыл жастарының спорттағы жетістіктері мен алдағы додаларға дайындық барысымен таныстық.

Бізді спорт мектебінің оқу ісі жө­нін­дегі орынбасары Базарбек Әбе­нов ұжымның тыныс-тір­­шілігімен, спорт­шылардың жет­­­­­­­­­кен жетістігімен таныстырды. За­­ман талабына сай бой көтерген ны­сан­­­ын біріздендіруге, мекеменің ма­териалдық-техникалық базасын жа­­ңартып, спортшылардың облыс­тық, республикалық додаларға қаты­суына жергілікті биліктен үлкен қолдау бар.

– Спорт мектебінің филиалдары өзге ауылдарда бар. Яғни Мәдениет ауылындағы №14 балалар жас­өс­пірімдер спорт мектебіне қарасты Бұқарбай батыр ауылында еркін күрес, Аламесек ауылында қол добы, Еңбекте волейбол, бокс, Мырзабай ахун ауылында бокс, таеквандо, Жа­ңаталап ауылында дзюдо, Мақ­палкөл ауылында қазақ күресі, кикбоксинг, Аққыр ауылында ауыр атлетика спорт үйірмелері жұмыс жасайды, – дейді Базарбек Әбенов.
Бұл ауыл балаларының спорт саласында жетістікке жетуге жасалған үлкен мүмкіндік екені даусыз. Айта кетейік, аталған ауылдардағы спорт үйірмелері 692 шәкіртті байрақты бәсекеге дайындап, аудан қоржынын түрлі медальдармен толықтыруда. Мәселен, мұндағы 9 спорт түрі бойынша 80-ге жуық жасөспірім спорт шеберіне үміткер атағын орындаған. Ал І-ші разрядты 40 спортшы бар.
Біз табан тіреген Мәдениет ауы­лында қазіргі таңда бокс пен дзюдо үйірмесі тұрақты жұмыс жасауда. Бокс үйірмесінің жаттықтырушысы Бо­латбек Оралжанның бұл үйірмеде шәкірт шыңдағанына 10 жылдан асқан. Осы жылдар ішінде ол үйір­меден 1 спорт шебері, 51 спорт шеберіне үміткер, 20-ға жуық І-ші разрядты спортшы шығарған. Айтуынша, қазіргі таңда үйірмеде 8 жастан 16 жасқа дейінгі 28 бала бар. Қазіргі таңда олар облыс біріншілігі мен халықаралық турнирлерге тыңғылықты дайындық үстінде. Білікті жаттықтырушының мақтан тұтар шәкірттері жетерлік. Соның бірі – Думан Кенжебек. Ол 4-ші сынып оқушысы.
– Жаттықтырушымның шақыр­туы­­мен бұл үйірмеге былтырдан бас­тап қатысып келемін. Қамшыбек Қоң­қабаев, Бекзат Саттарханов ағаларым секілді мықты боксшы болып, әлем­дік деңгейдегі жарыс­тарда жеңіс тұ­ғырынан көрініп, елімнің көк туын желбіреткім келеді, – дейді жас спортшы.
Бір қызығы, Думанның бұл спорт­пен шұғылданғанына әлі бір жыл толмаған. Әйтсе де ол өзінің мық­тылығын жақында Алматы қаласын­да өткен республикалық турнирде дәлелдеп, І орын алып, «Үздік бо­ксшы» номинациясын иеленген. Бо­кстан бөлек жас спортшы, мек­тептегі волейбол үйірмесіне де қаты­са­ды.
Думанмен қатар Алматыда өткен республикалық турнирде үйірменің тағы бір қатысушысы Алпысбай Сан­жар І орын, Бисенбай Мирас ІІІ орын иеленген.
– Өзім бұл спорт түріне 6-шы сыныбымда келдім. 2004 жылы алғашқы жаттықтырушым осындағы Ба­зарбек ағай болды. Ал 2005 жыл­дан 2010 жылға дейін Қызылорда об­лыс­тық дарынды балаларға арналған Жалантөс Баһадүр атындағы мектеп интернатында білім алдым. 2009 жылы ҚР жазғы спорт ойындарында ІІІ орын иелендім. Шәкірттерімнің спортқа деген құлшынысын арттыру мақсатында 2019 жылы Қамшыбек Қоң­қабаевпен, ал былтыр Париж Олим­пидасының күміс жүлдегері Нұр­­бек Оралбаймен арнайы кездесу ұйым­­дастырдым. Болашақта ел на­мысын қорғайтын жас спортшы­лар­мен кездесу барысында Нұрбек өзінің спорттағы жетістіктері мен қызықты сәттерімен бөлісіп, жастардың бір­қатар сауалына жауап берді, – дейді жаттықтырушы.
Білікті бапкердің алғашқы шәкірт­тері Махан Нұрымжан, Жұбатқан Ер­шат, Андрей Асхат, Ысқақ Рус­лан, Мадияр Айдосұлы, Бекарыс Кө­­регенұлы, Айдос Қасқырбай сын­ды спортшылар республикалық жә­­не халықаралық жарыстардың жүл­­дегері атанған. Оның ішінде Ма­дяир Айдосұлы – аудан тарихында алғаш рет бокстан ҚР спорт шебері нормативін орындаған алғашқы боксшы. Ал Руслан Ысқақ бапкерінің жолын жалғап, Еңбек ауылында жат­тықтырушы қызметін атқаруда.
Аталған спорт мектебінің қай спорт түрін алып қарасаңыз да жат­тықтырушылары өз ісінің на­ғыз шебері екенін аңғардық. Мәселен, мұндағы дзюдо үйірмесінің жаттықтырушысы Гүлдана Қаппаро­ва 15 жылдан бері аталған спорт түрінен шәкірт шың­дауда.

– Қазіргі таңда менде жас ерек­шелігіне қарай үлкен және кіші екі топ бар. Екі топтың барлығын қосқанда 22 жас спортшы бар. Менен бөлек дзюдо үйірмесін тағы екі жаттықтырушы жүргізеді. Оларда 30-ға жуық бала бар. Жалпы барлық топты қосқанда үйірмеге 50-ден аса бала келеді. Олардың арасында 4 ҚР чемпионы, 1 Азия чемпионы бар, – дейді дзюдо үйірмесінің жаттықтырушысы.
Айта кетейік, жаттықтырушы Гүл­дана Қаппарова да – ҚР спорт ше­беріне үміткер. Сондай-ақ жеңіл ат­летикадан ҚР чемпионы. Әкесінің қол­­дауымен бастапқыда каратэ, та­ек­­вандо, содан кейін дзюдоға келген.
Тізе берсек, аталған спорт мектебіндегі спортшылардың же­тіс­тігі аз емес. Әрине, бұл – жас спорт­шылардың тыңғылықты дайындығы мен күндіз-түні чемпион шығаруды мақсат еткен бапкерлердің ерен еңбегінің жемісі. Аталған спорт мек­тебінің бүгінгі тынысы мен жетістігі осындай. Алдағы уақытта да спорт­шылардың жеңіске толы күндері жалғасын тауып, аудан мерейін үс­тем ете беретініне сеніміміз мол.

Сезім НҰР