Қонысбек Қазантаев атындағы аудандық мәдениет үйінде аудан әкімінің кубогы үшін ұйымдастырылған әуесқой футбол мен волейбол лигасының жеңімпаздарын салтанатты марапаттау рәсімі өтті. Салтанатты шарада аудан әкімі Ардақ Ибраимов жеңімпаз спортшыларды құттықтап, жеңіске жеткен командалар мен үздік ойыншыларды марапаттады. Сондай-ақ ол дені сау ұрпақ қалыптастыруда, жалпы салауатты өмір салтын ұстануда спорт саласының ерекше маңызға ие екенін тілге тиек етті.

– Президентіміз Қасым-Жомарт Кемелұлы «Бұқаралық спортты да­мыту арқылы біз кәсіби спортқа жол ашамыз және ең бастысы, ұлт сау­лығын жақсартамыз» деген бо­ла­тын. Осы бағытта Мемлекет бас­шысы мен Үкіметтің қолдауымен, облыс әкімінің бастамасымен спорт саласында ау­қымды жобалар жүзеге асуда. Жаңа спорттық нысандар пайдалануға бе­ріліп, халық игілігіне ұсынылуда. Өт­кен жылы Қызылорда қаласында Үс­тел теннисі орталығы пайдалануға бе­рілді. Сондай-ақ облыс орталығында халық­аралық стандарттарға сәйкес 11 мың орындық Орталық стадион са­­лы­нуда. Нысан жақын күндері ел игілігіне табысталады. Жыл ба­сында ау­дан орталығында дене шынық­тыру-сауықтыру кешені ел игілігіне табыс­талса, таяуда Аққыр ауыл­дық округіндегі спорт кешені пайда­лануға беріледі. Сонымен қатар кенттегі ор­талық стадион қайта жаңғыр­тудан өт­кізіледі. Бүгін міне, 5 айға жалғасқан аудан әкімінің кубогына арналған фут­бол мен волейболдан өткен турнир өз мәресіне жетті. Ау­да­нда әуесқойлар футбол лигасы (LLF) аясында тұңғыш рет өткі­зілген сайысқа 10 команда, 200-ге жуық спортшы қатысса, во­лей­болға 10 команда, 200-ден аса спорт­шы қатысып, бақ сы­нады. Ба­ғы мен бабы қатар шапқан тур­нир жеңімпаздарын шын жүректен құттық­таймын. Алдағы уақытта да байрақты бәсекелерде, дүбірлі додаларда елі­міз­­дің, аймағымыздың атын асқақ­татуға тілектеспін, – деді аудан әкімі.
Иә, 5 ай бойы спорттың екі түрінен жүлделі орындарды сарапқа салған командалар аянып қалмады. Турнирлік кестеде көш бастаған кейбірі шешуші сәтте сүрініп жатты. Ал ең аз ұпаймен финалдық ойындарға жолдама алған­дардың арасында бабы мен бағы қатар шапқандар да кездесті.
Волейбол қорытындысы бойынша «№123 мектеп-лицей» коман­дасы көш бастады. Мұнан кейінгі орынға «Дос­тар» командасы лайық деп та­ныл­ды. Ауылдық елді мекендерден келген «Ең­бек» және «Бұқарбай ба­тыр» ко­ман­далары үшінші орынды өза­ра бөлісті.
Аудан әкімінің кубогына арналған дүбірлі додада өзінің керемет ойы­нымен дараланған спортшылар да кез­десті. Кешегі салтанатты шарада үздік деп танылған спортшылар да ма­рапат төрінен көрінді. Атап айтқанда, Гүлстан Керімқұл мен Нүркен Балхан «Үздік ойыншы» атанса, Инабат Қар­шыбек пен Ерболат Уржанов «Үздік қорғаушы» номинациясын иеленді. Соны­мен қатар Қанат Ермак «Үздік шабуылшы» атанса, Ерлан Боқанов «Үздік үйлестіруші» номинациясына ие болды. Ал Асылбек Абилкановқа «Үздік жетекші» номинациясы берілді.
– Жарыс тартысты өтті, барлық команданың тыңғылықты дайындықпен келгені көрініп тұр. Біз де қарап қал­мадық. Жеңімпаз барлық команданы құттықтаймын. Алда әлі талай дода күтіп тұр. енді соларға дайындықты бастауымыз керек. Кеше аудан әкі­мінің қолынан арнайы номинация алдым. Әсіресе алдағы уақытта аудан спор­тына әлі де қолдау болатынын естіп қуандым. Қолдау қарқыны бәсең­де­месе, нәтиже де болады. Әркім өз саласын алға сүйреуді мақсат етсе, біз сонда ғана алға қойған меже­мізге жетеміз. Міне, сондықтан спорт саласында жүрген баршамыздың ойы­мыз, түпкі мақсатымыз бір болуы тиіс. Яғни бәріміздің көздегеніміз аудан спортында серпін қалыптастыру болуы керек. Сонда ғана өзіміздің де, туған жердің де мерейі үстем болады, – дейді үздік ойыншы Балхан Нүркен.
Аудан әкімінің кубогына арналған сайыстың бірі – футбол. Спорттың бұл түрі жанкүйерлерге керемет көңіл-күй сыйлады. Олай болатындай жөні бар, өйткені жалағаштық аяқдоп шеберлері бұған дейін талай дүбірлі додада өздерінің шеберлігімен дараланған бо­латын. Аудан әкімінің кубогына ар­налған тартысты бәсекеде де жергілікті спортшылар аянып қалмады.
Футболдан «Иса Ата» командасы көш бастап, аудан әкімінің кубогына ие болды. Ал ІІ орынға «Наркескен» ко­мандасы жайғасты. Сондай-ақ «Ақсу» және «Адия» командалары үшін­ші орынды өзара бөлісті.
Турнирде ерекше ойын өрнегімен көзге түскен футболшылар да арнайы номинацияларға ие боды. Атап айт­қан­да, Нұрдаулет Бөрібайұлы «Үздік қақпашы» атанса, Зейілхан Бақыт­жан­ұлы «Үздік шабуылшы» номина­ция­сына лайық деп танылды. Ал Асқар Ер­гешов «Үздік ойыншы», Ақмейір Ашу­хан «Үздік сұрмерген», Дінислам Асыл­­бекұлы «Үздік қорғаушы», Айдос Ах­метов «Үздік жетекші» атағына ие болды.
Жеңімпаз командалар мен үздік ойын­шылар аудан әкімінің алғыс хаты­мен, медальдармен және аудан әкімінің кубогымен марапатталды. Салтанатты шара соңы жергілікті өнерпаздар мен спортшылардың концерттік бағдар­ла­масымен жалғасып, көрерменге ерекше көңіл-күй сыйлады.

Кенжетай ҚАЙРАҚБАЕВ