Білім саласында қажырлы еңбек етіп, бәсекеге қабілетті ұрпақ тәрбиелеуде өзінің қолтаңбасын қалдырған Раушан Қожагелдиеваның есімі Жалағаш жұртына етене таныс. Алғаш еңбек жолын 1979 жылы Жалағаш ауданына қарасты сол кездегі Қышбөгет елді мекеніндегі №236 орта мектепте мұғалім болып бастаған ол 1981-1982 оқу жылында Жалағаш кентіндегі №246 орта мектепте ұстаздық қызметін жалғастырды. Ұлағатты ұстаз 1982 жылдан бастап 2017 жылға дейін Таң ауылындағы №118 орта мектепте жемісті қызмет етіп, құрметті еңбек демалысына шықты.

Білікті педагог 40 жылға жуық ғұмырын мектеп қабырғасында өткізді. Мыңдаған шәкірттің қолына қалам ұстатып, жазуды үйретіп, әріп танытып, қаншама балаға бағдаршам болды. Саналы ғұмырында қажыр-қайратын, қарым-қабілетін ұлт болашағы жас ұрпақтың тәрбиесіне арнады. Бүгінде білікті педагогтан білім алған шәкірттері әр салада жеткен жетістігін ұлағатты ұстаздан алған білімімен, тәлім-тәрбиесімен байланыстырады. Кезінде ұлағатты ұстаздың жетекшілігімен бірнеше сайыста, олимпиадаларда, шығар­машылық байқауларға қатысқан оқушылары білім бәйге­лерінде биіктен көрініп, шәкірттері мектептің мақтанышына ай­налды. Бірқатар шәкірті «Үздік аттестат», «Алтын белгі» иегері атанды. Оқушылары ҰБТ-дан жоғары балл жинап, еліміздегі маң­дайалды жоғары оқу орындарында мемлекеттік грантпен білім алу мүмкіндігіне ие болды.
Таң ауылындағы №118 орта мектепте «Ы.Алтынсарин» төс­бел­гісінің иегері, ұлағатты ұстаз Раушан Қожагелдиеваны еске алуға арналған тағылымды шара өтті. Онда білім саласында ұзақ жыл абыройлы қызмет атқарып, шәкірт тәрбиелеуде елеулі із қалдырған Раушан Жарылқапқызының өмірі мен еңбегі өскелең ұрпаққа кеңінен насихатталды.
Іс-шараға облыстық білім басқармасының басшысы Асқарбек Есжанов, «Amanat» партиясы облыстық филиалының төрағасы Жандос Базартай және аудан әкімінің орынбасары Ғани Сүлей­менов, ұлағатты ұстаздың отбасы, бауырлары, әріптестері, шәкірт­тері және ауыл тұрғындары қатысып, жүрекжарды естеліктерімен бөлісті.
Тағылымды шарада орта мектеп базасынан ұстаздың құр­метіне арнайы кабинет ашылып, оның өмір жолы мен еңбек жо­лынан сыр шертетін бұрыштар ұйымдастырылды. ­Соны­мен қа­тар бастауыш сынып мұғалімдері мен оқушыларына ар­нал­ған логикалық олимпиада өтті. Логикалық олимпиадаға қа­тысқан аудан оқушылары мен бастауыш сынып мұғалімдері тапқырлық пен білімдерін ортаға салып, жеңімпаздар облыстық білім басқармасы басшысының арнайы дипломдарымен және отбасының тағайындаған бағалы сыйлықтарымен марапатталды.
Жаны жаңалыққа құмар тәжірибелі педагог өзінің ерен еңбегінің арқасында зейнет жасына үлкен аброймен жетті. Білімді де білікті, әрбір ісіне тыңғылықты, ұрпақ тәрбиесіне үлкен жауапкершілікпен қарайтын ұлағатты ұстаздың еңбегі жоғары бағаланып, сан мәрте құрметке бөленді. 1983 жылы ҚазЛКСМ Жалағаш аудандық комитетінің және аудандық білім бөлімінің «Құрмет» грамотасына ие болса, 1992-2001 жылдары оқыту мен тәрбие берудегі үлгілі еңбегі үшін аудандық білім бөлімінің «Құрмет» грамотасымен ма­ра­патталды. Ол 1997 жылы аудандық атаулы мектептің шығар­машылық ізденіс жұмыстарына белсене араласқаны үшін де «Құрмет» грамотасына лайық деп танылды. Ал 2006 жылы облыстық кәсіподақ комитетінің «Құрмет» грамотасы берілді. 2012 жылы аудан әкімінің алғыс хатына ие болса, араға екі жыл салып, облыстық білім басқармасының «Құрмет» грамотасымен ма­рапатталды. 2017 жылы облыс әкімі орынбасарының алғыс хатына ие болса, 2023 жылы ҚР Оқу-ағарту министрінің алғыс ха­ты­мен марапатталды. Бұл марапат ұзақ жыл бойы табанды еткен еңбектің жемісі екені даусыз.
Раушан Қожагелдиеваның тек ауданның ғана емес, еліміздің білім саласында серпін қалыптастыруда өзіндік қолтаңбасы бар. Қазір оның салаға сіңірген еңбегін, басқа да алған марапаттарын тізе берсек, өз алдына бір еңбекке арқау болары анық. Қазақстан Республикасы Тәуелсіздігінің 25 жылдығы аясында ұстаздар күніне арналған салтанатты жиында саналы ғұмырын ұрпақ тәрбиесіне арнаған ұлағатты ұстаз Раушан Жарылқапқызына Білім және ғылым министрлігінің «Ы.Алтынсарин» төсбелгісі табысталды. Білім беру саласындағы ең жоғары бұл марапат осынау ұстаздық ғұмырына берілген лайықты баға деп білеміз.
Бұл шара – жай ғана білім сайысы емес, ұстаз еңбегіне көрсе­тілген құрмет пен шәкірттерге артылған зор сенімнің жарқын кө­рінісі болды. Облыстық білім басқармасының басшысы Асқарбек Темірбекұлы саналы ғұмырын бала тәрбиесіне арнаған, ұстаздық мамандыққа адал болған Раушан Жарылқапқызы туралы ес­телігімен бөлісті. Сонымен қатар рухани кеште сөз алған пар­тияның облыстық филиалының төрағасы Жандос Базартай, ау­дан әкімінің орынбасары Ғани Сүлейменов, ұлағатты ұстаздың ең­бегін ұрпаққа үлгі етумен қатар шәкірттерін патриоттық рухта тәрбиелеген асыл жанның рухына көрсетілген шынайы құрмет екенін атап өтті. «Amanat» партиясы атынан олимпиадаға қаты­су­шы ұстаздар алғыс хатпен марапатталып, аудан әкімдігі атынан арнайы ашылған оқу кабинеті үшін бағалы сыйлық табысталды.

Ерлан АНУАРҰЛЫ