Аудан әкімі Ардақ Ибраимовтың төрағалығымен мәжіліс отырысы өтті. Күн тәртібінде 2024-2025 оқу жылының аяқталуы, оқушылардың жазғы демалысын тиімді ұйымдастыру және олардың қауіпсіздігін қамтамасыз ету мәселелері қаралды. Аудан әкімі жазғы демалыс кезінде балалардың бос уақытын сапалы әрі қауіпсіз өткізу бойынша бірқатар нақты тапсырма берді.

– Оқу жылы аяқталып, оқушылардың жазғы дема­лысының басталуына да санаулы күндер қалды. Сондықтан бұл кезеңге тыңғылықты дайындық қажет. Әрбір бала демалыс уақытын тиімді әрі қауіпсіз өткізуі тиіс. Сол үшін барлық жауапты сала басшылары берілген тапсырмаларға сәйкес нақты жұмыстарды атқаруы керек, – деді аудан басшысы.
Мәжілісте «Ақтерек» сауықтыру лагерінің аума­ғында шыбын-шіркей және зиянкестерге қарсы за­лал­сыздандыру жұмыстарын жүргізу, тәрбие мен қауіп­сіздік мәселелеріне ерекше назар аудару, үйір­ме мен спорттық секциялардың тұрақты жұмысын қам­тамасыз ету, сондай-ақ тарихи-мәдени орындарға экскурсиялар ұйымдастыру тапсырылды.
Сонымен қатар мектеп бітіруші түлектерге қатысты қауіпсіздік шаралары нақтыланды. Бұған дейін мектеп бітіру кештерін өткізуге тыйым салынғаны белгілі. Осыған орай түлектердің автокөлік кортеждерін ұйым­дастыруға жол бермеу мақсатында нақты шаралар қабылданды.
Айта кетейік, бүгінге дейін 20 мектепте 7012 оқушы білім алды. Биылғы оқу жылында 9 сыныпты 675 оқушы, 11 сыныпты 447 оқушы бітірді. «Үздік аттес­татқа» 9 сыныптан үміткерлер саны – 82, 11 сыныптан – 49 оқушы. «Алтын белгіге» үміткер оқушы саны – 16.
Күн тәртібіндегі қосымша мәселеге сәйкес, су ай­дындарында шомылу қауіпсіздігі бойынша рейд жұ­мыс­тарын күшейту және бақылауды қатаңдату тапсырылды.

Е.ӘНУАРҰЛЫ