Соңғы жылдары Жалағаш жолдары жаңарып қалды. Әсіресе шалғай елді мекендердің жол сапасына айтарлықтай мән берілді. Тіпті ауыл мен ауылды жалғайтын жолдар, елді мекендердегі ішкі көшелер жөндеуден өтіп, әлеуметтік инфрақұрылым мәселелері оң шешімін табуда.

Былтырдың өзінде аудандағы жол­дар мен ішкі көшелерді жөндеу бо­йынша 5 жобаға қазынадан 1 млрд 293 млн теңге қаржы бөлінген. Нақтырақ тоқталсақ, Бұ­қар­бай ба­тыр, Аққұм, Есет батыр ауыл­­дарының 17 көшесіне және М.Шә­менов ауылының кіреберіс автомо­биль жолын күрделі жөндеу, Таң ауылындағы екі пәтерлі 10 тұрғын үйге кірме автомобиль жолын салу жұмыстары жүргізілді.
Аудан әкімінің халықпен кездесу­ле­рінде кент тұрғындары кейбір кө­ше, жолдардың сапасы сын көтермейтінін ай­татын. Азаматтардың талап-тіле­гін, ұсынысын тыңдап қана қой­май, мә­селені шешу жолын іс жүзінде орындайтын жергілікті билік биыл ау­дан орталығындағы бірқатар жол­ды жөндеу жұмыстарын қолға ал­ған. Бүгінде қызу жұмыс жүруде.
Нақтырақ айтсақ, биыл кент бо­йын­ша 11 көшеге жөндеу жұмыстары жүр­гізіледі. Жобаның жалпы құны – 678,7 млн теңге. Қазіргі уақытта А.Байсо­пақов және С.Сей­фуллин кө­ше­ле­рінде асфальт төсеу жұмыс­тары жүруде. Сондай-ақ М.Мә­ме­­това, Ә.Молда­ғұ­лова көше­ле­­­ріне де асфальт жаю жұ­мыс­тары басталды.
Құрылыс жұмыстарын өзінің жеке бақылауына алған аудан әкімі Ардақ Ибраимов Дәуімбай елді мекеніндегі А.Байсопақов пен С.Сейфуллин кө­ше­лерінде жүргізіліп жатқан жол жөн­деу жұмыстарымен танысып, жауап­тыларға құрылыс сапасына ерекше мән беруді және жұмысты белгі­ленген талаптарға сай орындауды қатаң тап­сырды. Сонымен қатар жөн­­делген көшелердің ұзақ мерзімді пайда­ла­ны­­луын қамтамасыз ету үшін оларды күтіп-ұстау бағытында кент әкіміне бірқатар міндет жүктеді.
Кенттен бөлек Мөрәлі Шәменов ауы­­лындағы Жам­­был, Ердүзелова кө­шелерінің ав­то­­мобиль жолдарын күр­делі жөндеу жұмыстарына облыс­тық бюд­жет­тен 69 млн теңге қа­­ралған. Бүгінгі таңда көшелерге ас­фальт тө­сеу жұ­мыс­тары аяқталып, жол белгі­ле­рін орнату және жолақтарын сызу жұмыс­тары жүр­гізілуде.
Сондай-ақ жоба құны 518,3 млн теңгені құ­райтын Қаракеткен және Дал­дабай ауыл­дарындағы авто­мо­биль жолда­рын күрделі жөндеу үшін биыл 165,3 млн теңге қаралған. Жоба 2026 жыл­ға өтпелі. Қазіргі таңда бөлінген қар­жы шегінде Далдабай елді ме­ке­­­нін­­дегі 7 көшеге құм аралас тас төсеу жұмыстары жүргізілуде. Мер­­ді­гер мекеме – «Нұрлы Тау ЛТД» ЖШС. Тех­никалық қадағалаушы – «СК Ка­питал» ЖШС. Авторлық қа­да­ға­лаушы – «ПРОИНСЕТ» ЖШС. Жал­пы екі жылда Қаракеткен мен Дал­­­дабайда 16 көшенің сапасы жақсармақ.
Соңғы жылдары Жалағаштың шал­­ғай ауылдарында жол құрылысы қар­­қын алғанын айтқан болатынбыз. Сөзімізге дәлел, жоба құны 486,5 млн теңгені құ­райтын Аққыр ел­ді ме­ке­нін­дегі Ы.Ақ­мыр­заев, Ш.Есов, М.Ахме­тов, Аққыр, Н.Тәс­пе­нов кө­ше­­лерін күр­делі жөндеу жұмыс­та­рын бас­тау мақ­­сатында облыстық бюд­­жеттен 180,5 млн теңге қаралып, бүгінде бө­лінген қаржы шегінде Ақ­қыр, Таспе­нов көшелеріне асфльт тө­селіп, жол жие­гіне құм аралас тас төсеу жұмыс­тары жүргізілуде. Жоба 2026 жылға өтпелі. Мердігер ме­кеме – «Р и А Сервис ЛТД» ЖШС. Тех­никалық қа­дағалаушы – «СК Ка­­питал» ЖШС. Автор­лық қадаға­лау­шы – «ТМ Проект Строй» ЖШС.
Еңбек ауылындағы 3 көшеге, яғни Т.Дәуіт­баев, Абай, М.Байділдаев кө­ше­­­лерін орташа жөндеу жұмыс­та­ры­­­на биыл 63,8 млн теңге бөлінді. Бү­гінгі таңда жобалау-сметалық құ­жат­тарға түзетулер енгізілуде. Жо­ба­лау-сметалық құжаттарға тү­зе­тулер ен­гі­зілгеннен кейін орташа жөн­­деу жұ­мыс­тары басталмақ. Мер­ді­гер ме­кеме – «Орда Автодор» ЖШС.
Міне, ауданда тындырымды тір­лік, жү­йелі жұмыс бар. Халықтың бір­лігі, сөз бен істің жарасым табуы, елдің ын­­­ты­мағы жарқын жобаларға бастау алған.

Ж.АРЫН