Әлеуметтік салада адал еңбек ету екінің бірінің қолынан келе бермейді. Өйткені жұмыссыз азаматтардың екі қолға бір күрек табуын қамтамасыз ету, алдыңа келген адамның тұрмыс сапасын арттыруға негізделген мемлекеттік көмекті әділ үйлестіру оңай шаруа емес. Ал дәл осы қызметті жалағаштық Гүлнұр Мақсұтқызының мінсіз орындап келе жатқанына он жылдан асты. Ол осынша уақытта қаншама адамның алғысын алып, елдің ыстық ықыласына бөленді. Мұның бәрі табанды һәм тынымсыз еңбектің өтеуі екеніне ешкімнің дауы жоқ.

Кейіпкеріміз бүгінде Жалағаштағы «Мансап» орталығында бөлімше бас­шысы болып қызмет атқарады. Бө­лім­шеде Гүлнұр Мақсұтқызынан бөлек 5 маман бар. Олар күнделікті аза­мат­тар­дың әлеуметтік осал санат­тарын уа­қыт­ша жұмысқа орналас­тыруды қам­та­ма­сыз етеді.
Қазіргі таңда тәжірибелі маман суб­си­дияланатын жұмыс орындарына адам­­­дарға жолдама беруде. Мәселен, биыл аудан бойынша 8 айда 756 адамға жол­­дама берілген. Оның ішінде қо­ғам­дық жұмысқа 579 адам жолданған. Ал жас­тар практикасына 115 адам жібе­ріл­ген. Мұнан бөлек әлеуметтік жұмыс орнына 30 адам, «Күміс жас» жобасымен 32 адам жолданған.
Гүлнұр Мақсұтқызы қоғамдық жұ­мыс­қа 12 айға дейін жолдама беретінін ай­тады. Ай сайын алатын жалақысы 26,5 айлық есептік көрсеткішке тең. Сондай-ақ оған 30 пайыз экологиялық үстемақы қосылады. Ал жастар практикасымен бар­ған маманның жалақысы 30 айлық есептік көрсеткішке тең. Оған дипломы бар жастар қатысады. Бірақ диплом ал­ға­нына 5 жылдан аспауы тиіс. Сондай-ақ бұған дейін мамандығы бойынша жұ­мыс жасамауы керек.
Бөлімше басшысы «Күміс жас» жо­ба­­сы зейнеткерлікке шығуға жасы тая­ған азаматтарға арналғанын айтады, яғ­ни бұл жобаға 50 жастан асқан аза­мат­­тар қатыса алады. Олар 3 жылға де­йін субсидияланатын жұмыс орнында ең­бек ете алады. Алғашқы жылы жұмыс беруші тағайындаған жалақының 70 па­йызын орталық субсидиялайды, ал 30 па­йызын жұмыс беруші төлейді. Екінші жы­­лы жалақының 65 пайызын орталық субсидиялайды. Қалғанын әдеттегідей жұ­­­­­­­­­мыс беруші тарапынан төленеді. Соң­ғы жылы 60 пайызын орталық субси­дия­­­­­лап, 40 пайызын жұмыс беруші өтей­ді.
– Үш жыл уақыты біткеннен кейін жұмыс беруші тұрақты жұмысқа алып қалуға міндетті. Ал 50 жастан асып, 3 жыл жұмыс беруші мен біздің орталық арасындағы келісім-шарт аясында жұ­мыс істегендерді жұмыс беруші кемінде 1 жыл жұмыспен қамтуға міндетті. Әлеу­меттік жұмыс орындарына келсек, жұ­мыс беруші тағайындаған жалақының 35 пайызын біз төлеп береміз. Жұмыс уа­қы­ты 12 айдан аспауы тиіс. Осыған дейін қаншама адамға жолдама бердік. Оның бірқатары тұрақты жұмысқа орна­ласуына байланысты бұл жұмысты әрі қарай жалғастырудан бас тартты. Біздің мақсат – азаматтарды тұрақты жұ­мысқа орналасқанға дейін уақытша суб­си­дия­­ланатын жұмыспен қамту, – дейді Гүлнұр Мақсұтқызы.
Кейіпкеріміз еңбек жолын орталықта инспектор болып бастаған. Жауапты ма­ман іс жүргізушінің қызметімен қа­тар жастар практикасына жолдама бе­ру­ді де қамтамасыз етті. Ал 2012 жы­лы қа­раша айында орталықтың ма­маны бол­ды. Дәл осы қызметті 2023 жыл­ға де­­йін абыроймен атқарды. 2023 жылдың шіл­де айынан бастап «Мансап» ор­та­лы­ғында бөлімше басшысы болып қыз­мет атқарып келеді.
Гүлнұр Мақсұтқызы уақытша жұмыс­қа орналасқандар арасында кейін тұ­рақ­­ты жұмысқа тұрғандардың ба­рын ай­тады. Мәселен, биыл 579 адам қоғам­дық жұмысқа жолданса, олардың 18-і мер­зімінен бұрын тұрақты жұмыспен қам­тылған. Дәл осындай жұмыс беруші мен орталық арасындағы келісім-шарт мер­­зімінен бұрын жастар практикасынан 2, «Күміс жас» жобасымен 2, әлеуметтік жұ­мыс орындарынан 10 адам тұрақты жұ­мыспен қамтылған.
Мемлекеттен бұл мақсатқа бөлін­ген қаражатпен елдің бәрін уақытша жұ­мыспен қамту мүмкін емес. Сондық­тан тиісті қаражаттың мақсатты үйлес­ті­рілуі де – тәжірибелі маман Гүл­нұр Мақсұтқызы басшылық ететін бө­­лімше қызметкерлерінің негізгі мін­деті. Сондықтан олар ай сайын елді мекен­дер­де мониторинг жұмыстарын жүргізіп тұ­рады. Нәтиже де жоқ емес, мәселен, биыл 8 айда олар 592 адамды уақытша жұмыспен қамтыған 108 мекеме мен кәсіпорынға мониторинг жұмыстарын жүргізген. Сол кезде 26 адамға дәлелсіз жұмыстан қалуына байланысты ескерту берілген. Мұнан бөлек 12 адамның жұ­мысы тоқтатылған. Соның арқасында мем­лекеттің 15 млн 117 мың 943 теңгесі үнем­делген.
– Біз тек мұнда адамдарға жолдама берумен шектелмейміз. Олардың өз уақытында жұмыс орындарында еңбек етіп жатыр ма, жоқ па, сол жағын да бақылаймыз. Өйткені мемлекеттен бө­лінген қаражат мақсатты игерілуі керек. Жыл басынан бері қаншама мони­торинг жұмыстарын жүргіздік. Соның арқа­сын­да қаншама олқылықтың алдын алдық. Біз­дің міндет – халықтың осал топтарын уақытша жұмыспен қамту және сол мақ­сатқа бөлінген қаражаттың тиімді жұм­­салуын қамтамасыз ету, – дейді тә­жі­ри­белі маман.
Иә, кейіпкеріміз кабинет төңіректейтін қызметкерлер сұрпынан емес. Мейлінше елдің тұрмыс сапасының артқанын қа­лайды. Халықтың осал топтарын жұ­мыс­пен қамтып, сондай-ақ олардың ал­­дағы уақытта тұрақты жұмысқа орна­ла­­суына қолғабыс етеді.
Гүлнұр Мақсұтқызының әлеуметтік салада жұмыс жасағанына 13 жыл бол­ды. Осынша уақытта ол өзіне жүк­тел­­ген міндетті мінсіз орындады. Соның ар­қа­сында басшылықтың да, халықтың да алғысын алды. Бірнеше рет марапат төрінен көрінді. Министрліктің, облыс әкімінің, аудан әкімінің, басқарма бас­шы­сының бірнеше рет алғыс хатына ие бол­ды. Бірақ ол соның бәрінен елдің ал­ғысын биік қояды.

Кенжетай ҚАЙРАҚБАЕВ