Президент Қасым-Жомарт Тоқаев Абай Құнанбаевтың 180 жылдығын атап өтудің маңыздылығы туралы Ұлттық құрылтайда мәлімдеді. Сол уақыттан бері елімізде ұлы ақынның мұраларын түгендеп, шығармаларын кең көлемде насихаттау бағытында ауқымды іс-шаралар қолға алынуда.

Қазақ халқының ұлы ойшылы, ақыны, ағартушысы Абай Құнанбаевтың туғанына 180 жылдығы – тек қазақ елі үшін ғана емес, күллі түркі дүниесі мен әлемдік мәдениет үшін ерекше мерейтой. Абайдың өмір жолы мен шығармашылық мұрасы – ұлттың рухани қазынасы, адамзаттық құндылықтардың асыл қайнары.

Абайдың өмірі мен мұрасы

1845 жылы Семей өңірінде дүниеге келген Абай жасынан зерек, талапты болып өсті. Ол шығыс әдебиеті мен мәдениетін терең меңгеріп, орыс классиктерінің шығармаларын оқып, әлемдік ой-сананың дамуына үңілді. Сол білім-білігі оның шығармашылығына кең өріс ашты.
Абайдың өлеңдері, қара сөздері қазақ қоғамының болмысын терең ашып, халықты білімге, еңбекке, әділдік пен адамгершілікке үндеді. Оның қара сөздері – философиялық ой-толғаныстың үлгісі, халықты өзін-өзі тануға шақырған рухани бағдаршам іспетті.

Абайдың дүниетанымдық маңызы

Абай – тек ақын ғана емес, ұлы ұстаз, ойшыл. Ол білімнің құдіретін жоғары қойып, ғылымға сүйенген ұлт қана алға жылжитынын айтты.
«Ғылым таппай мақтанба» өлеңіндегі бес асыл іс (талап, еңбек, терең ой, қанағат, рақым) бүгінгі күні де әр қазақтың өмірлік ұстанымына айналуға тиіс.
Абай мұрасы – бүгінгі ұрпаққа аманат Ұлы ақынның 180 жылдығы аясында елімізде түрлі ғылыми конференциялар, мәдени іс-шаралар ұйымдастырылып, оның еңбектері жаңа қырынан насихатталуда. Бұл – жастарды рухани биіктікке тәрбиелеудің, Абайдың өлмес мұрасын дәріптеудің айғағы.
Абайдың сөзі – мәңгілік, ойы – шексіз, өсиеті – өшпес. Ол ұрпақтан-ұрпаққа жалғасып, қазақ елінің ғана емес, бүкіл адамзаттың игілігі болып қала береді.

Б.ИСАҒАБЫЛОВ,
аудандық соттың бас маманы
Судьялар одағының мүшесі