Қазіргі Қазақстанның сот жүйесі қоғам өмірінің әділдік пен заң үстемдігіне негізделген жаңа кезеңіне аяқ басты. Осы жолда ерекше маңызға ие құрылымның бірі – кассациялық сот. Ол сот төрелігінің жоғары сатысы бола отырып, төменгі соттар қабылдаған шешімдердің заңдылығын, негізділігін және әділдігін бағалауға бағытталған.

Кассациялық соттың басты мақсаты – азаматтардың конституциялық құқықтарын қорғау және құқық қолдану тәжірибесін біріздендіру. Бұл саты істің мәнін қайта қарамайды, тек заң нормаларының дұрыс қолданылғанын тексереді. Яғни, ол әділеттің сақшысы, сот шешімдерінің заң талаптарына сай болуын қамтамасыз ететін соңғы сүзгі іспетті.

Қазіргі таңда Кассациялық алқа сот актілерінің заңдылығын тексеріп қана қоймай, құқықтық саясаттың айқындығын қамтамасыз етуге, сот тәжірибесіндегі қателіктерді түзетуге және заңнаманың біркелкі қолданылуына ықпал етеді. Бұл азаматтардың сотқа деген сенімін арттырып, әділдіктің шынайы орнауына жол ашады.

Кассациялық соттың қызметі – сот жүйесінің тұрақтылығы мен беделінің кепілі. Ол әрбір азаматтың заң алдында тең құқылы екенін, ал мемлекет үшін ең биік құндылық – адам мен оның құқығы екенін дәлелдейді. Әділ шешім қабылданған жағдайда ғана қоғамның сот билігіне деген сенімі артады.

Сондықтан кассациялық соттың тиімді жұмыс істеуі – құқықтық мемлекет қағидаттарын бекітіп, әділ және жауапты қоғам құрудың маңызды қадамы. Бұл – әділетті Қазақстанның айқын бейнесі, заң үстемдігін қамтамасыз етудің нақты көрінісі.

Жалағаш аудандық сотының

бас маманы Д.Ә.Шадаев