Қазақстанда ең төменгі жалақыны әлеуметтік маңызы бар салалардың қызметкерлері алады, деп жазады Stan.kz.

Finprom.kz зерттеуі бойынша қазақстандықтардың орташа айлық жалақысы 14,3% өсіп, 233,1 мың теңгеге жетті.

Өңірлер бөлінісінде орташа айлық жалақының ең көп мөлшері дәстүрлі түрде Атырау облысына тиесілі: 377,4 мың теңге. Орташа айлық жалақы мөлшері бойынша ТОП-3 өңірдің қатарына Нұр-Сұлтан(349,6 мың теңге) және Маңғыстау облысы (337,7 мың теңге) кірді.

Ең төменгі орташа айлық жалақыны Түркістан (166,7 мың тг), Жамбыл (168,8 мың тг) және Солтүстік Қазақстан (168,9 мың тг) облыстарының тұрғындары алады. Әр түрлі қызмет саласында жұмыс істейтін қызметкерлер арасында жалақының айтарлықтай айырмашылықтары байқалады.

Мысалы, орташа айлық жалақының ең жоғары шамасы тау-кен өндіру өнеркәсібінде (472,3 мың теңге), сондай-ақ қаржы және сақтандыру қызметі саласында (422,6 мың теңге) белгіленген. Ал ең төменгі орташа айлық жалақы сумен жабдықтау саласында (145,7 мың теңге) және ауыл шаруашылығында (147,7 мың теңге) тіркелді.

«Білім беру саласында орташа айлық жалақы 176,5 мың теңгені (ел бойынша орташа көрсеткіштен 24,3% — ға төмен), Денсаулық сақтау саласында-197,4 мың теңгені (ел бойынша орташа көрсеткіштен 15,3% – ға төмен) құрады. Осы салалардағы орташа айлық жалақы да елдегі ең төменгі жалақы», – деп атап өтті сарапшылар.