Байқоңыр қаласында ТМД елдерінің қатысуымен VІІІ «Халықтар достығы» халықаралық фестивалі өтті. Бұл сайыс түрлі халықтардың мәдениеті және дәстүрлерімен танысу, ұлтаралық байланысты нығайту мақсатында жыл сайын дәстүрлі түрде ұйымдастырылып келеді.

Фестивальдің ашылуында Қызыл­ор­­да облысы әкімінің орынбасары, Қаза­қ­с­тан Республикасы Президентінің «Бай­­­­қоңыр» кешеніндегі арнаулы өкілі Қай­­рат Нұртай, Байқоңыр қаласы әкім­ші­лігінің басшысы Константин Бусыгин құт­­тықтау сөз сөйлеп, қатысушыларға ме­­рекелік тілектерін жеткізді.
Қайрат Нұртай өз сөзінде ұлттық мә­дениет фестивалі Байқоңыр мен Қы­зылорда облысында тұратын түрлі этнос өкілдері үшін үлкен достық мерекесіне айналғанын тілге тиек етті.
Фестиваль қаладағы мекемелер мен кәсіпорындар ұжымдарының, сон­дай-ақ облыстық Қазақстан халқы Ас­сам­­блеясы этномәдени бірлес­тік­те­рінен құ­рылған топтық шеруімен ашыл­ды. Фес­­тиваль аясында «Достық» шеруі, «Ха­лықтан – бір рецепт!» ұлттық тағам­дар байқауы, «Ұлттық киімнің поэ­зиясы» киім­дер байқауы, «Кілемдегі кестелі өр­нек» сәндік-қолданбалы шығар­машы­лық байқау-көрмесі, «Әлем өрнек­тері» бей­­нелеу өнері байқауы, «Халық ойын­дары» спорттық жарыстары, «Біз әр­түр­лі­міз, бірақ біргеміз» би байқауы ұйым­дастырылды.
Этносаралық татулық пен мәдениетті насихаттауға бағытталған шараға Қы­зылорда облысының атынан Достық үйі – «Қоғамдық келісім» КММ достық командасы, Жалағаш ау­да­нының «Ұла­ғат­ты аналар» кеңесі ұжы­мы қатысып, І орынды жеңіп ал­ды. Жа­лағаштық аналар фестиваль бары­сында ұлттық дәстүрді, тұрмыстық мә­де­­ниетті және қолөнер бұ­йымдарын та­­ныстырып, еңбектері жо­­ғары баға­лан­ды. Ұлттық киімдегі ақ­жау­лықты ана­ла­рымыз фестиваль ба­рысында кілем мен төсеніш тігумен ай­налысып, ұршық иіріп, жүн түтіп, ши тоқыды.
Сондай-ақ облыс әкімінің орын­ба­сары, Президенттің арнайы өкілі Қай­рат Ырзақұлұлы қараша айында Бай­қо­ңыр­дан ұшырылатын зымыран ұшыру рә­сі­міне «Ұлағатты аналарды» ша­қыр­ды.
Айта кетейік, аудандық «Ұлағатты аналар» кеңесі 2019 жылы құрылып, сол уақыттан бері ұрпақтар сабақтастығын сақтауға, ұлттық дәстүрлер мен отба­сы­лық құндылықтарды нығайтуға өз үле­с­­ін қосып келеді. Олар былтыр Түркістан қала­сында «USHAR KZ» Қоғамдық қорының ұйым­дастыруымен өткен ІІ республи­калық «Шуақты шақ – 2024» ән байқауын­да бас жүлдені иеленген бо­латын.
Ғасырлар бойы ұрпақтан-ұрпаққа жал­ғасып келе жатқан ұлы құндылық, тәрбиенің қайнар көзі алдыңғы буын асыл аналарымызды қоғамдық шараларға бел­сене қатыстырып, отбасылық дәстүр мен ұрпақтар сабақтастығын нығайту мақ­сатындағы ән байқауда жалағаштық аналар хор, трио, дуэт және жеке орындау кезеңдерінде үздіктер қатарынан көрінді.
Талантымен таңдай қақтырып, үнінің сыңғыры бұзылмаған аналар ха­лық әндерінің тарихына қанық болып, әр­кез жатқа айтып жүреді. Қазіргі уақытта «Ұла­ғатты аналар» кеңесінің төрайымы Айқын Жақсылықова екен, ансамбльдің құра­мында 25 әже өнер көрсетеді. Олар­дың әрқайсысы – ауылдың дамуына өз үлесін қосып жүрген, әр саланың үз­дігі. Олар өнер ұжымында тек қана ән ай­тып қой­май, ұлттық салт-дәстүріміздің жан­да­нуы­на жұмыс жасайды.
Олар кейінгі ұрпаққа насихаттауға бағыт­тал­ған шараларда білген-түйген­дерін үй­­­ретіп, қоғамдық шараларға да бел­сен­­ділік танытады. Өнердің бере­кесін арт­­тырып жүрген аналардан құрал­ған ан­самбль мүшелерінің ең жасы енді қы­рық­қа қадам басса, ең үлкені алпыс­тың ауылына ат басын бұрған.
– Ұжымдағы аналардың бәрі өнерлі. Аталған байқауға өздерінің қо­лынан шыққан қолөнерлерін апарып, көп­шіліктің көңілінен шықты. Анала­рымыздың көбісі – батыр ана. Бос уақытында киіз басып, тоқыма тоқумен, құрақ көрпешелер ті­гу­мен айналысады. Мұнан бөлек мә­де­ни шараларға да тұрақты қатысып, өзі­нен кейінгі жас буындарға келін-не­ме­­релеріне ұлттық қолөнерді үйретіп ке­леді. Аналарымыздың бастамасымен көп­те­ген тағылымды шара өтуде. Соның бірі – Аққұм ауылында өткен «Шолпысы әсем жарасып белге» атты көшеаралық байқау. Мұнан бөлек жастармен өтетін дөңгелек үстелдер де аналарымызды қа­тысуымен жүргізіледі, – дейді «Қоғам­дық келісім» КММ аудан бойынша этноса­ралық қатынастар жөніндегі сарапшысы Әсел Балмырзаева.
Иә, тәлім мен тәрбиенің тұнығы бол­ған аналар қашанда құрметке лайық. Қай кезде де мәдени шараның сәнін кел­тіріп жүретін «Ұлағатты аналар» кеңе­сінің өнері өміршең, еңбегі ерен.

Ақтоты БҮРКІТБАЙ