Өнер адамы тек мәдениет саласынан болуы шарт емес. Бойында қандай да бір таланты бар жан қай салада жүрсе де өнерден шет кетпейді. Бұған аудандық полиция бөлімінің қызметкері, полиция майоры Жасұлан Әбдуайтовтың шығармашылығымен танысқанда көзіміз жетті. Өнерді жан тәнімен ұғып, әншілік қабілетін шыңдап жүрген жерлесіміз жауапкершілігі мол қызметі мен бойына дарыған өнерін бүгінде абыроймен арқалап жүр.

Иығына погон таққан полицей қыз­меттің ауырлығына қарамастан қазақ­тың қара домбырасынан, өне­рі­нен алыс емес. Өнерді ғұрып­таған қара­пайым отбасында дү­ние­­ге кел­ген ке­йіп­керіміз бала кү­ні­нен ән әле­мінде әлдилеп өскен. Сөзінше, оған бұл талант әкесінен, нағашы жұр­тынан да дарыған. Нағашылары ай­маққа белгілі жырау, ақын, термеші болыпты. Ол кісілердің музыкалық сауаты болмаса да, естіген әуенін домбыра немесе түрлі аспаптарға салып ойнай алады екен. Осылайша полицейдің таланты бала кезден өнер­лі ортада қалыптасса керек.

Кейіпкеріміз әншіліктен бөлек ән де шығарады. Бүгінде оның шы­ғар­­машылық қоржыны бірнеше жа­­ңа әнмен толыққан. Мәселен, «Жа­­­ла­ғашым», «Рахмет саған, дә­рігер», «Қазақ жігіті», «Тыныш­тық сақшысы», «Мама», «Мен се­­ні сү­йемін өмір», «Әкешім», «Алыс­­­тағы махаббат», сынды төл туын­ды­лар­­ды жарыққа шығарған. Жа­сұ­лан­­ның ең алғашқы орында­ған туын­­дысы «Жалағашым» әні екен. Әдет­тегідей бір концерттік шарада жүргенде оның өнеріне там­санған композитор Сақыпжан Ай­маханқызы «Жалағашым» әнін сый­ға тартыпты. Бұл туындыны кие­лі Жалағаш топырағында өскен аза­мат орындаса дегені шығар. Сон­дай-ақ жақында жарық көрген туын­дысы «Нәзеркем» атты әні бүгінде әнсүйер қауымның жүрегінен орын тауып үлгерген. Бір қызығы, бұл әннің сөзін Жасұланның өзі жазған.

– Иә, өнер мен үшін бала қиялым­мен ұштасқан жеке хоббиім десем болады. Өнерді жаным сүйеді. «Жігітке жеті өнер де аз» демекші, спортпен де кәсіби шұғылданамын. Күрестен спорт шеберімін. Азды-көпті жетістігім де бар. Жалпы бүгінгі қызметім құқық қорғау саласына үлкен қызығушылықпен келдім. Қызметтегі міндетімді адал атқарудамын. Бұл салада қызмет еткеніме 15 жыл­ға жуықтады. Әр мамандықтың өзіне тән ерекшелігі мен қиындығы бола­ды. Мен өз ісімді жақсы көремін, сон­дықтан маған өнерде де, құқық қорғау саласында да қызмет атқарған қиын емес. Жан дүнием, ойым, болмысым шығармашылыққа жақын болғандықтан адаммен тіл табысуға бейіммін, – дейді өнерлі полицей.

Кейіпкеріміз ұлт­тық аспабымыз дом­быраны жетік мең­герген. Ал гитараны өз бетінше үйренген. Балалық, студенттік кезден түрлі деңгейдегі байқауларда бой көрсеткен Жасұлан үлкен кон­курстан жүл­делі орындар иеленген. Қызметте жүріп сала мамандары ара­сында өтетін республикалық «Пара­сатты полицей» өнер байқауында 3 орын еншілеген. Сон­дай-ақ ауданның бас­қа да мәдени-танымдық іс-шара­ла­­рына тұрақты қатысып тұрады.

Кейіпкеріміз сұхбат соңында өнердегі жоспарымен де бөлісті. Ол бүгінде іштегі өнердің сәулесін тұншықтырмай, тыңдармандарын жаңа туындының жарық көруімен қуантуға жұмыс жасауда. Өзінің айтуынша, ән патриоттық тұр­ғыда, жастарды рухтандыратын, сал­мағы басым керемет дүние болмақ.