Көктем басталса, аққұмдықтар егіннің қамына кіріседі, содан күздің соңына дейін дамыл таппайтын дала дарабоздары жер жыртудан дән жинауға дейінгі егіс басындағы қызу еңбектің бәрінде табандылық танытады. Әсіресе ауылдағы «Аққұм-Жер» шаруа қожалығының ұжымы соңғы жылдары саланы табысты қорытындылап келеді. Әлбетте бұған ұжымның ымырамен іс қылуы басты себеп болғаны айтпаса да түсінікті.

Биыл да шаруашылық үшін табысты жыл болды десек те жарасатындай, елмен бірге маусымында аяқсу тап­шы­лығын олар да сезінді, бірақ кезекпен су алу арқылы бұл мәселені де айна­лып өткендей. Тілшілік тіршілікпен ең­­бек адамдарының егіс басындағы қы­­­зу жұмысын ақпараттандыру мақса­тын­да Аққұмға бұған дейін талай ат ізін салғанымыз бар. Әсіресе күздің басында анасынан сөз естіген баладай басы салбыраған бітік шыққан өнімге қарап, жақсылыққа жорығанбыз. Бақ­қа­­нымыз бақа болмады, расында күзгі науқанда шаруашылық ұжымы қам­баны астыққа толтырып, өз табысын ға­на еселеп қоймай, ауданның ауыл ша­руашылығы саласына серпін берді.
Жалпы Рүстем Сәрсенбаев басшы­лық ететін шаруашылық табыс пен ха­­­лықтың талап-тілегін тең ұстайды. Бір сөзбен айтқанда, төраға Рүстем Сәр­­­сенбаев алдына келген ауылдағы ағайын­ның бірде-бір мәселесін еске­русіз қалдырған емес. Керісінше Ақ­құм­да басқа да түрлі жобаларды қолға алып, ауылдағы ағайынның екі қолға бір күрек табуына қолғабыс еткісі ке­леді. Әлбетте бұған қатысты ойда жүр­ген жарқын жобалары жоқ емес, ол жағын алдағы уақыттың еншісіне қал­дыр­­дық.
Биыл шаруашылық ұжымы 874 гек­тар алқапқа Сыр салысын екті, одан бөлек 200 гектар жоңышқа мен би­дайы тағы бар. Ақегістің уақытында би­­дайдан межелі өнім жиса, мау­сы­мында жоңышқасын да жинап алды. Ал ди­қандардың жаздай күріш­тің күтіміне бар күшін салғаны анық бай­қалады. Күзгі науқанда Сыр салы­сының әр гектарынан 68 центнер орта­ша өнім алды. Толайым табыстың тү­бінде адал еңбек жатқанын біз де жақ­сы бі­ле­міз. Ал сол еңбекті лайықты баға­лау тө­рағаның да негізгі міндеті бол­са ке­рек.
Рүстем Сәрсенбаев – бұл жағынан өресі биік азамат. Осыған дейін егіс ба­сында берген сұхбатында «адал еңбек қалайда лайықты бағалануы керек, он­сыз жұмыс жүрмейді, күзгі науқанды бірыңғайласақ, сабантойда жалақыдан бөлек жұмысшылар қаржылай сыйлық­қа ие болады» деген уәдесі бар. Тө­ра­ға бұл сөзіне берік екен, оған жа­қын­­­да шаруашылықтың қорытынды ша­­ра­сында көзіміз жетті.
«Аққұм-Жердің» сабантойы облыс орталығындағы маңдайалды мейрам­хананың бірінде болды. Бұл жолы егіс басындағыдай қолға ілінгенімен емес, еңбек адамдары түгел жаңа көй­лек-шал­бармен жүр. Маңдайдағы қыртыс та жазылған, шаруашылықтың саланы та­­быспен қорытындылауында бар­лы­ғының қолтаңбасы бары анық бай­қа­лады. Бәрі де қаржылай һәм бағалы сыйлықтан үмітті. Қуанғанымыз, еш­қай­­сы­сының сағы сынбады, бәрі де ең­бегіне сай құрметке бөленіп, алды қо­мақ­ты қаражат алды.
Сабантой ауыл ақсақалдарының ба­тасымен басталды, қазыналы қария Қосым Жүсіпбеков шаруашылықтың биыл табысты еңбек еткенін, оның же­мі­сін тұтас ауыл жұрты көріп отыр­ға­нын жасырмады. Сондай-ақ ол еңбек ұжы­­мының алдағы жұмысына сәттілік тіледі.
– Аққұмдықтар үшін биыл берекелі жыл болды, ауылдағы маңдайалды ша­­­руа­шылықтың бірі «Аққұм-Жер» қам­­­басы астыққа толды. Мұнда үлкен еңбек­тің үлесі барын жақсы білеміз. Ауыл әкімі арқылы елді мекендегі ше­ші­мін таппаған мәселелер бойынша төра­ғаның бұған дейін талай алдына бардық. Шүкір ғой, қазіргі жастардың көзі ашық, істің жүйесін біледі. Рүс­тем баламыз біз көтерген қай мәсе­лені де аяқсыз қалдырмай, оның ше­­шіміне жұмыс жасады. Жаздың ор­та­сында жайылымға барар жол бо­йын­да орналасқан каналдың көпірі сыр берді. Енді қанша жылдан бері жөн­деу көрмеген ғой, осылайша ауыл­дың өрісі тарылды. Бұл мәселені де ша­руашылық төрағасының назарына салдық, егіс басындағы қызу жұ­мыс­тың жүріп жатқан кезі, соның бә­рінде уақыт тауып, көпірді күрделі жөн­деуден өткізді. Тізе берсек, бұл ша­руа­шылықтың ауылға пайдасы мол, қан­шама адамды жұмыспен қамтып отыр. Келер жылы да алға қойған өз мақ­сат­тары бар, соның барлығына табыс ті­лей­міз, қамбаларыңыз астыққа тола берсін, – деді қазыналы қария.
Бірді айтып, екіге кетті демеңіздер, ақсақалдың сөзіне арқау болған көпір­дің мәселесін біз де уақытында басына барып көрдік. Сол тұста Рүстем Сәр­сенбаев «халық айтса, жерде қал­май­ды, мейлінше шешімін табуға жұ­мыс жа­­саймыз» деп тағы уәде еткен. Тө­раға сө­зінде тұрды, көп ұзамай сол көпірді күрделі жөндеуге 10 млн тең­ге­ден ас­там қаржы құйды. Қазір бұл мә­се­ле де толық шешімін тауып, ауыл­да­ғы ағайын алғысын жаудырды.
Мұнан кейін қонақтар Сыр өнер­паз­дарының мерекелік концертін тама­шалады. Ал кезек марапаттау рәсіміне кел­генде ауыл еңбеккерлерінің жүз­дері жадырап сала берді. Дала дара­боз­да­рының алды 1 млн 500 мың теңге, басқа да қаншама диқан мен ме­ха­ни­затор 1 млн теңгеден ­қаржы­лай сый­­лыққа ие болды. Мұнан бө­лек бірнеше еңбек адамы 700, 600, 500, 400 мың теңгеден қаржылай сый­лық ал­ды. Сондай-ақ аспаздар мен бас­қа да ең­бек­керлер бағалы тұр­мыс­тық зат­тарға ие болды. Ауыл еңбек­кер­­леріне жал­пы құны 30 млн теңге үлес­тірілді.
Бұл шара нағыз сабантойға лайық өтті. Дән себемін дегенше механи­затор­лардың егіс басында қалай ең­бек­тенгені, жаздай диқандардың кү­ріш­­тің күтімін қалай жасағаны, одан кейінгі комбайнерлердің қызу жұмысы, бәрі-бәрі бейнекөрсетілім арқылы көп­шілік назарына ұсынылды. Сондай-ақ ұлттық спорт түрлерінен жарыс та ұйымдастырылды. Жеңімпаздар әдет­те­гідей қаржылай және бағалы сый­лық­тарға ие болды.
Шаруашылық төрағасы Рүстем Сәр­­­сенбаев келер жылы да межелі өнім­ге қол жеткізу үшін дайындықты бас­­тап кеткенін айтады. Мәселен, ал­дағы жылы шаруашылық 1120 гек­тар алқапқа күріш егуді жоспарлап отыр. Сондай-ақ 500 гектар алқапқа би­дай және жоңышқа егу көзделуде. Бұдан «Аққұм-Жердің» келер жылы егісті әр­тарап­тандыруға басымдық беретінін анық бай­қадық.

Кенжетай ҚАЙРАҚБАЕВ