Жалағаш аудандық «Жалағаш жаршысы» газетінің сайты

28°C

, Жексенбі, 14 шiлде, 15:29

Погондағы журналист: Полицейдің бір күні

25.08.2023

568

0

Соңғы уақытта өңірімізде көлік тізгіндеушілер қатары күрт өсті. Сондықтан болар жол-көлік оқиғалары жиілеп, келеңсіз жайттар орын алуда. Десе де осындай жағымсыз оқиғаларды алдын алу мақсатында тиісті органдармен ауданымызда үздіксіз шаралар ұйымдастырылуда. Иә, елдің тыныштығы мен халықтың қауіпсіздігін қамтамасыз ететін полиция қызметкерлері қаншама жол-көлік оқиғаларының алдын алды. Мәселен, соның бірі 21-23 тамыз аралығында аудан көлемінде құқықтық тәртіпті сақтау, көшелерде және басқа да қоғамдық орындарда қылмыстардың алдын алу және жолын кесу мақсатындағы «Құқықтық тәртіп» жедел-профилактикалық іс-шарасы ұйымдастырылып, рейдтік іс-шаралар жүргізілген. Әрине, мұның барлығы аудан тұрғындарының қауіпсіздігі үшін жасалып жатқан іс-шаралар екені сөзсіз. Осы орайда аудан тұрғындарының амандығы мен  тыныштығы үшін күні-түні аянбай қызмет ететін сала қызметкерлерінің бір күні қалай өтетінін білу мақсатында тәртіп сақшыларының біркүндік жұмысын біз бірге атқаруды жөн көрдік.

Аудандық полиция бөлімінде жұмыс уақыты ерте басталды. Таң атысымен ғимарат ішінде тіршілік қайнап жатыр, сірә үйреншікті жағдай болар, ұйқысын аша алмай, маужырап жүрген ешкім бай­қал­мады. Қызметкерлер таңғы са­ғат 7.00-де кезекші бөлімнен қару ала­ды екен. Содан кейін бүгінгі жұмыс кү­ні­нің мін­деттері мен тап­сыр­малары бе­ріліп, сағат жеті жарым шама­сында сап­тық жиын басталды. Жиында міндетті бө­ліністерін айқын­даған полиция қыз­мет­керлері дереу жұ­мыс­тарына кірісіп кетті.

Бұл жолы әріптесім Кенжетай Қайрақбаев екеуміз АПБ Жергілікті полиция бөлімшесіне қарасты патрульдік поли­ция тобының қызмет инспекторы Нұрлы­бек Жолдастың біркүндік кезекшілігіне түсіппіз. Орда бұзар жаста тұрған жігіттің бұл жұмыста келе жатқанына 8 жылдан асыпты. Өз ісіне деген жауапкершіліктің қандай боларын ол жақсы біледі. Қысқасы, бұл саладағы жұмыстың бар­лығы оған бес саусағындай таныс.

Бізде полиция қызметкерінің форма­сын киіп, аға лейтенант Нұрлыбек­тың «Нива» маркалы жұмыс көлігіне отыра кеттік. Әрине қобалжу бар. Полиция қызмет­кері де­реу бізден қауіпсіздік белдігін тағу­ды талап етті. «Бүгін менің әріптесім екен­сіз, сол себепті тәртіпті әуелі өзі­міз­­ден бастағанымыз жөн», деген қыз­мет­кердің бір ауыз сөзі біз үшін жауап­кершілікті одан бетер еселегендей бол­ды.

Көлігіміз кент орталығына жол тартты. Дәуімбай елді мекенінде көлік саны аз ба, ереже бұзғандар кездесер емес. Әрине қуантарлық жағдай. Осы сәтті пайдаланып, полиция инспекторын әңгімеге тартуды жөн көрдік.

Нұрлыбектің айтуынша, қазір кентте көлік саны көбейген. Сол себепті жол жүру ережесі жиі бұзылып жататын көрінеді. “Біздің негізгі мақсат – тек айыппұл салумен шектелмей, жүргізушілерге түсіндірме жұмыстарын жасап, мейлінше олардың қауіпсіздігіне жұмыс жасау” деп түйді ол әңгімесін. Әріптесімнен көп сөздің емес, істің адамы екені көрінді.

Кент орталығындағы базар маңына тұрақ­тап, кейіпкерім көлік қозғалысын реттеуге кірісіп кетті. Көлік қозғалысын реттеуде полицейлердің рөлі зор. Өйткені базар маңында таңертең көлік саны көбейеді, көлік жүрісі қиындай түседі. Сол сәтте «Субару» маркалы көлігіне дереу аялдауға бұйырды. Сөйтсек, жүргізуші қауіпсіздік белдігін тақпаған екен. Полиция инспекторы өзін таныстырып, тоқтату себебін түсіндіре кетті. Әкiмшiлiк құқық бұзушылық туралы 593-бабы, яғни Жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау бойынша хаттама толтырып, 5 Аек мөлшерінде айыппұл салды. Сондай-ақ қайталамауды қатаң тапсырды, өйткені екінші рет тағы осылай заңды бұзса, 10 Аек мөлшерінде айыппұл салынады екен.

Автовокзал алдынан өте бергенде “Вольфсваген” маркалы көлік назарымызға ілікті. Автокөліктегі ды­­быс күшейткішпен көлікке оң қап­талға аялдауды талап етті. Жүргізуші де дереу талапты орындап, көлік қоз­ғалт­қышын сөндірді. Дәл жоға­ры­да­ғыдай реттілікпен құжаттарын сұрады. Құ­жаттары түгел. Бір айыбы көлік Жаяу жүргіншілерге жол бермей, жолақты кесіп өткен. Осылайша Әкiмшiлiк құқық бұзушылық туралы 600-бабы, жаяу жүргiншiлердің немесе жол жүрiсiнiң өзге де қатысушыларының жүруiне басымдық бермеу бойынша хаттама толтырылып, 10 Аек мөлшерінде жүргізушіге айыппұл салынды.

 Әрине заң бәріне ортақ, мұндай қатаң шара қолданудың да өзіндік мәні бар. Аяушылық білдіріп, жібере салсаң, уақыт өте бұдан да ауыр заң бұзушылыққа алып келуі мүмкін. Сондықтан алдын алған абзалырақ екен. Нұрлыбек түсіндірме жұмыстарын да назардан қалдырмады.

Араға 30 минут сала Дәуімбай елді мекеніне өтетін «тесік көпірден» өтке­німізде “Ниссан” маркалы автокөлігінің ережені бұзып келе жатқанын байқадық. Біз де қырағылана бастадық па, жан-жақ­та­ғы көліктердің барлығын көзбен сүзгі­ден өткізіп келеміз. Әріптесім көлік тізгін­деген азаматқа оң қапталға тоқтауды талап етті. Тәртіп бұзған көлік иесіне “Қауіпсіздік өзіңіз үшін, сондықтан жылдамдықты асырмай жүруді қаперден шығармаңыз” деп ауызша да, жазбаша да ескерту жасалды.

Нұрлыбектің айтуынша, күніне жүгенсіз көлік жүргізушілерге 10-15-тен аса айыппұл салынады екен. Демек, көлік жүргізушілер тарапынан жол ере­же­сін сақтауға әлі де құлықсыздық басым деген сөз.

  • Қыз­метте жүр­ген соң жұмыс барысында қойыл­ған талаптарды уақытында орын­дауға міндеттіміз. Өйткені бұл – адам өмі­рі мен қауіпсіздігіне жауап беретін қыз­мет саласы. Сол себепті полицей қыз­меткері дене дайындығымен қатар психологиялық дайындықта жүруі қа­жет. Жол ережесін бұзған азаматтарды анықтау қиын шаруа емес, кенттегі барлық бейнекамерелар жұмыс жасап тұр, сол арқылы дереу әшкерелеуге мүмкіндік бар, – дейді полицей Нұлыбек Жолдас.

Осылайша қарбаласы мол біркүндік жұмыс күні аяқталғасын, қызметтік қару қайтадан кезекші бөлімге тапсырылды.  Сырттай қарағанда форма киіп жүретін қызмет болып көрінгенімен, жоғарыда айтып өткеніміздей, бұл қызмет – жауапкершілігі мол жұмыс. Сондықтан “Қауіпсіз ортаны қалыптастыруда тек полиция қызметкерлері ғана жауапты” деген түсініктен арылып, қоғам болып сол жауап­кершілікті сезінуіміз қажет.

Жандос ЖАЗКЕН

Пікірлер жоқ. Бірінші болыңыз!

Пікір жазыңыз

Тағы да оқыңыз: