Таң шапағы төгіле бастаған сәттен-ақ тынысы бөлек тіршілік әдеттегідей балабақша табалдырығынан бой көрсетеді. Қолына баласын жетектеген ата-ана үшін таңғы ең маңызды міндет – көз қуанышын сенімді жерге аманаттап, күнделікті қарбалас жұмысқа аттану. Аудан тұрғындары үшін он жылдан астам уақыт бойы сол сенімнің алтын бесігіне айналып үлгерген «Жас қанат» балабақшасы бүгінде бүлдіршіндердің шат күлкісіне толы, бұл ұжым 125 баланы тәрбиемен тербетіп келеді.

Бүгінде елімізде 10 мыңнан астам мемлекеттік және жеке балабақша жұ­мыс істейді, оның ішінде жекеменшік ұйым­дардың үлесі жыл сайын еселеп ар­тып, мектепке дейінгі білім беру кеңіс­ті­гінің ажырамас бөлігіне айналды. Мем­лекет тарапынан да, кәсіпкерлік ортадан да қолдау тапқан бұл сала әр баланың ертеңіне қызмет етіп келеді. Сан артып, сапа жоғарылаған сайын Қазақстанның білім көкжиегі де кеңейіп жатыр. Өйткені балабақшаға барған бала – ұлттың үлкен жолға түскен кішкентай жүрегі.
2013 жылдан бері аудан балала­рының айнымас мекеніне айналған жеке негіздегі «Жас қанат» балабақшасы бүгінде 3 жастан бастап бүлдіршіндерді қабылдап, балғын жүректердің өміріне өз өрнегін салып жүр. Бес топқа бөлінген балалар «Ботақан», «Балапан», «Күн­шуақ», «Балдырған» топтарында, енді мектеп табалдырығына даяр тәрбие­ле­­нушілер «Балдәурен» тобында. Бұл тәрбие ордасында бүгінде 20 қыз­мет­­кер жұмыс жасайды. Мейірім мен міндетті қатар алып жүрген 9 тәрбиеші, оның ішінде төрт модератор, бір сарапшы, бір зерттеуші бар. 5 тәрбиеші көмекшісі, балдырғандардың саулығына жауапты медбике, 2 аспаз, өнерге бау­литын му­зыка жетекшісі, әр сөзді анық айтуға үйретер логопед, барлығы да баланың болашағына шынайы жана­шыр­лықпен қыз­мет етеді.
«Жас қанат» – тек бала ойнап, дема­латын орын ғана емес таланты мен талабын алғаш байқап, ұшқыр ойына шам­шырақ жағатын тәрбие ордасы. Бүл­дір­шіндердің жеткен жетістіктері соның айғағы. Өткен жылы мектепалды даярлық тобы аудандық «Шебер әке, өнерлі ана, еңбек­қор бала» байқауында өздерінің ынтымағы мен ізденісін та-­нытып, екінші орынға ие болды. Ал «Мен – тәуелсіз ел ұланы» атты аудандық театрлан­ды­рылған бейнеролик байқа­уын­да жас өнер­паздар елге деген сүйіс­пеншілігін өзіндік қойылым арқылы жет­кі­зіп, тағы бір мәрте екінші орынды қанжы­ға­сына байлады. Бұған қоса «Мен зерт­­теу­шімін» танымдық-зерттеушілік бай­­­­­­­қа­у­­ын­да да «Балдырған» тобы екін­ші орын­ға лайық деп танылды. Ал ау­дан­дық «Өнерім саған – Қазақстан!» фес­­ти­валінде дәл осы «Балдырған» тобы өнер­паздық қырын танытып үшінші орын иеленді. Балабақшаның көктемгі сауықтыру және шынықтыру жұмыстары биыл жаңа қарқын, өзгеше серпінмен жал­ғасын тапты. Облыстық әдістемелік вебинар алаңында балабақша тәрбие­шілері «Аула ойындары» тақырыбында мазмұнды жұмыс үлгісін ұсынып, за­ма­науи педагогика үндескен орта қа­лып­тастыра білді. Бала жүрегіне жол тауып, оның қуанышын арттыру – үлкен өнер. Мектепке дейінгі тәр­биелеу мен оқытуды дамыту мақ­са­тында өткен «Педагогикалық идея – 2024» шы­ғар­ма­шылық алаңы да тәр­бие­ші­лердің жа­ңашыл көзқарасын айқын­дай түсті.
Балабақша ауласына аяқ басқан сәттен-ақ әрбір детальдің бейжай емес, бала қиялын оятып, қызығушылығын арттыру мақсатында ойластырылғанын аңғаруға болады. Асфальт бетіне тө­сел­ген түрлі-түсті шарлар ішіндегі әліп­би әріптері. Көз ұшына кіп-кішкентай тәр­биеленуші ілікті. Ешкім ескертіп жат­­паса да, аяқ киімін ұқыппен шешіп, әде­­мілеп қойып шықты. Күннің екінші жартысында балабақшаның іші өзгеше жайдары күйге енеді. Бүлдіршіндерге ар­налған «Аспаптар сыры» үйірмесінің бас­таларын сезгендей қуанышты күбір дә­лізден естіледі.
Он төрт жылын бала тәрбиесіне ар­­наған Ақбөпе Қалыбекқызының ай­туынша, балабақша жұмысы оңай емес. Ол – бүгінгі таңда тек тәжірибелі тәрбиеші ғана емес, үнемі ізденіс үстіндегі шебер маман. Жылдар бойы жинаған кәсіби біліктілігін тоқмейілсімей, керісінше жаңа талапқа сай толықтырып, әр сабағына жаңаша леп енгізіп келеді. Аудандық, облыстық деңгейдегі түрлі бай­қау­ларға қатысып, педагогикалық әдіс­темесін шыңдап жүруі еңбекке де­ген жауакершілігін айқын танытады. Әсі­ре­се күй өнері арқылы балалардың ой-өрісін кеңейтуге арналған мақаласы көп­­шіліктің қызығушылығын оятып, ма­мандар тарапынан жоғары бағасын ал­ған болатын. Ұлттық мұраны бала та­­нымына жақындату – оның кәсіби қол­таңбасының жаңашыл қадамы. Би­ылғы оқу жылында да аудандық білім бө­лімі ең­бегін назардан тыс қалдырмай, ар­найы марапаттады.
Таңғы мезет – әр үйде өз жырын бас­тайтын арнаулы шақ. Бір үйде асығыс аяқ киім киіліп, біреуінде мектепке да­йын­дық басталса, ата-ана Ақмарал Қа­зы­бекқызының шаңырағында бәрі Ар­­шаттың «Бүгін балабақшада не бо­ла­ды?» деген тәтті сұрағынан өрбиді.
– Аршат күнде балабақшаға асы­ғады. Таңғы шайын да тауысып үл­гермей, сөмкесін өзі көтеріп жөнеледі. Баланың барар жеріне қуануы – тәрбие мен мейірімнің үлкен өлшемі. Баланың жанын түсіну баланы оқытудан да қиын. Аршаттың балабақшаға асығуы – тәрбиешілерге деген сенімді арттырады, – дейді ол ағынан жарылып.
Бұл балабақшаға кірген әр жанның жүрегін бір жылылық шарпып өтеді. Уақыт өз заңымен өтеді, бірақ баланың балауса шағында алған тәрбиесі мәң­гі қалады. «Жас қанат» атауы тек ба­лабақшаның атауы ғана емес, әр ба­ланың арманына қонған үміттің ақ қанаты секілді. Балғын жүрекке сенім ұя­латып жүрген ұжымның еңбегі ел ер­те­ңіне қосылған өлшеусіз үлес екені сөз­сіз.

Гүлжан Есжан