Жалағаш аудандық «Жалағаш жаршысы» газетінің сайты

-1°C

, Сәрсенбі, 19 ақпан, 04:00

Зидашкүл ОРАЗБАЕВА, тазалықшы:
Елді сүю – адал еңбектен

24.12.2024

227

0

Күнделікті жұмыс барысымен жүріп, кент орталығында көше тазалап, қоқыс жинап жүрген кісіні кездестірдім. Кісінің хал-жағдайын сұрап, жастарға үлгі ретінде жұмысшы адамнан сұхбат алуды жөн көрдім. Бірақ апаның жаурағанын байқап, редакцияға бірге келіп, жұмысы жайында әңгімелестік. Таңнан кешке дейін аудан тазалығын сақтаумен айналысатын ол бізге күнделікті жұмысы, отбасы туралы айтып берді.

Зидашкүл Оразбаеваның таза­лық­шы болып жұмыс істегеніне 24 жылдан асқан. Нақтырақ айтсақ, кент әкім­дігі­не қарасты «Жалағаш қызмет» ішкі та­за­лық мекемесінде жұмысшы. Ту­ған жеріміз Жалағаш көшелерін көр­кей­тіп, күл-қоқыстан тазалайды. Айтуын­ша, қа­зір оның мойнында кенттегі бір­неше кө­шенің тазалығы тұр.

– Туған жерім – Жалағаш ауданы. Осы мекенде өсіп-өндік, жай­ба­­рақат өмір сүрудеміз. Шүкір, 4 баланың анасы­мын, сондай-ақ 7 немере сүйіп отыр­ған ба­қытты әжемін. Айтпақшы, келесі жылы зей­нетке шығамын. Иә, 25 жылға жуық тазалықшы ретінде жұмыс істеп ке­лемін. Кезінде тұрақты жұмыс іздеп жүр­генімде мемлекеттік мекеме өкілдері тазалықшы болып жұмыс істеуді ұсын­ды. Содан міне, тазалықшы болып ең­бек етіп келемін. Жұмыс уақыты жазда таңертең 8.00-де басталса, қыста сағат 9.00-де басталады. Өзімізге белгіленген аумақты, оның ішінде жол жиектерін, көшелерді, арықтарды күл-қоқыстан та­­зартамыз. Әйтеуір күні бойы тыным тап­паймыз, – дейді ол.

Зидашкүл Оразбаева тыным таппай еңбек еткеніне ай сайын тұрақты бел­гіленген жалақы алатынын айтады. Ме­реке күндері басшылық сыйақы да бе­реді екен. Қазір ұжымда өзі секілді 60-қа жуық та­залықшы, сондай-ақ техни­каларды тізгіндеген жүргізушілері бар.

Сөз арасында тазалықшы апай тұр­ғындардың көбі қоқыс жәшіктерін құ­рылыс материалдары мен жиһаздарға толтырып тастайтынын, оларды жинау үшін біраз әлекке түсетінін жеткізді. Сон­дай-ақ көшеге қоқыстарын тастай са­латын азаматтарды да тілге тиек етті.

– Кейбір тұрғындар қоқысты кез келген жерге тастай салады. Қоршаған ортаға, ауданның тазалығына жауап­кершілікпен қарамайды. Меніңше, та­залық табалдырықтан басталады. Сон­дықтан қай кезде де туған жерімізге, қоршаған ортаға жанашыр болайық, – дейді кейіпкеріміз.

Тазалық сақшысы бізге күнделікті жұмыс барысында басынан өткен қы­­­зықты оқиғаларымен де бөлісті. Аязды қыс мез­гілінде тазалық­шылар күн­­­де­лікті жұмыстарына шы­­ғыпты. Қанша қа­лың киім кисең де далада 10 се­кундтан ар­тық тұра алмайтындай суық екен. Алайда та­залық сақ­шылары күннің аяз­ы­на қа­ра­мас­тан міндеттерін орын­дауға бел буған. Сол кезде бір топ жа­лағаштық жас ыстық шәй мен балғын бәліштерін әкеліп, та­залықшыларға ұсы­­­ныпты. Міне, жастардан мұндай ізгі­лікті істі көр­­ген жұмысшылар елімізді жарқын болашақ күтіп тұрғанына кәміл сеніп, көтіріңкі көңіл-күймен жұмыстарын жалғастырған.

Мемлекет басшысы 2025 жылды Қа­зақстан үшін «Жұмысшы маман­дық­тар жылы» деп жариялауы, жұмысшы мамандықтарын дәріптеу арқылы қо­ғамда еңбекқор және нағыз маман болу идеясын насихатталатынын жеткізген еді. Осы орайда аудан әкімі Ардақ Ибраимов Жалағаш кентінің тазалық сақтау саласындағы азаматтармен кез­де­сіп, ауданның 85 жылдық мерейтойы қарсаңында арнайы төсбелгі және ал­ғыс хат табыстады. Туған жердің гүл­­де­нуі­не зор үлес қосып, марапат төрінде көрінгендер қатарында Зи­дашкүл Ораз­баева да болды.

– «Еңбектің наны тәтті» демекші, ең­бектенген адам далада қалмайды. Жұ­мыстың оңайы жоқ. Біз жазда қоқыс жинап, тал әктейміз, қыста қар тазар­тамыз. Қуанатынымыз, жұмыстан кейін мекеменің көлігі үйімізге апарып тас­тайды, қажетті арнайы киімдерімізді алып береді. Басшылық мереке сайын сы­йақы тағайындап, «үлкен кісілер ғой» деп бізді сыйлайды. Соған ризамыз. Өзім көпбалалы ана болғанмен, ба­ла­ларға қол жаймай, осылай еңбек еткенді дұрыс көремін. Бұл салада еңбек ете­тінімді мақтан тұтамын. Осылайша өмір бойы үй мен түз тірлігінен қол үзбей келе жатырмын. Шүкір, Жалағашым бү­гінде тап-таза, көрікті, – дейді еңбек адамы.

Айта кетейік, биылдан бастап кентте көркейту-көгалдандыру және санитар­лық тазалық жұмыстарын жүргізу үшін кент әкімі аппаратының жанынан «Жа­­лағаш қызмет» коммуналдық мем­ле­кеттік мекемесі құрылған. Аталған мекеме арқылы биыл 8470,5 тонна қатты тұрмыстық қал­дық­тар шы­ға­рыл­ған. Міне, Зидашкүл Оразбаева секілді ең­бегі адал азаматтардың арқасында ау­данымыз жыл сайын көркеюде.

Жандос ЖАЗКЕН

Пікірлер жоқ. Бірінші болыңыз!

Пікір жазыңыз

Тағы да оқыңыз: