АҚШ президенті Дональд Трамп елге шетелден әкелінетін барлық тауарларға кедендік баж салығын енгізетінін жариялады, деп хабарлайды Egemen.kz.

Трамп Truth Social әлеуметтік желісіндегі парақшасында 185 елдің тізімін жариялады, олардың импорттық өнімдеріне АҚШ әкімшілігі өзара негізде кедендік баж салығын енгізеді.

Базалық тариф 10% мөлшерінде белгіленгенімен, көптеген елдер үшін бұл көрсеткіш жоғары болып шықты:

• Қытай – 34%
• Еуропалық Одақ елдері – 20%
• Швейцария – 31%
• Ұлыбритания – 10%
• Израиль – 17%
• Қазақстан – 27%
• Вьетнам – 46%
• Камбоджа – 49%
• Лаос – 48%

Ресей бұл тізімге енбеген. Сонымен қатар, Мексика, Иран, Канада және Беларусь елдеріне де баж салығы енгізілмеген. Ал Украинадан келетін тауарларға 10% сауда салығы салынатыны хабарланды.

Посткеңестік елдердің көпшілігіне 10%-дық тариф енгізілген. Алайда Қазақстан (27%) мен Молдова (31%) үшін бұл көрсеткіш айтарлықтай жоғары. Армения, Әзербайжан, Грузия, Өзбекстан, Түркіменстан, Қырғызстан және Тәжікстан үшін баж салығы 10% деңгейінде сақталды.

Трамп жеңіл және жүк көліктеріне, сондай-ақ автокөлік бөлшектеріне 25%-дық баж салығын енгізу туралы бұйрыққа қол қойды.

АҚШ президенті бұл шараларды «экономикалық тәуелсіздік декларациясы» деп атап, 2 сәуірді «Америка азаттық күні» деп атады.

«Ондаған жылдар бойы АҚШ-тың достары мен қарсыластары біздің экономикамызды пайдаланды. Бірақ баж салығын енгізумен бұл аяқталды. Бұл – АҚШ үшін жаңа алтын ғасырдың бастауы», деді Трамп.

Сонымен қатар, ол баж салығының мөлшері өзгертілуі мүмкін екенін ескертті. 10%-дық базалық баж салығы – 5 сәуірден бастап, бірқатар елдер үшін жоғары тарифтер – 9 сәуірден бастап күшіне енеді.

Сарапшылардың пікірінше, бұл жаңа тарифтер АҚШ-тағы инфляцияның өсуіне және тұтыну бағасының қымбаттауына әкелуі мүмкін. Сондай-ақ, көптеген елдер АҚШ-тың бұл әрекетіне жауап ретінде өз тарифтерін енгізуі мүмкін, бұл жаһандық сауда соғысына алып келуі ықтимал.