2013 жылдан бері қыркүйек айының екінші жексенбісі Отбасы күні болып белгіленді. Ал 2014 жылдан бері «Мерейлі отбасы» ұлттық байқауы өткізіліп келеді. Ынтымағы ырыспен қуатталып, еңбегі елдің игілігіне жұмсалып жатқан өнегелі отбасыларды кеңінен насихаттайтын «Мерейлі отбасы» байқауының қашанда орны бөлек. Апта басында облыс әкімі Нұрлыбек Нәлібаев «Мерейлі отбасы – 2024» байқауының облыстық кезеңінде жеңіске жеткен отбасыларды марапаттап, жерлестерін алдағы Конституция, Отбасы күні мерекесімен құттықтады.

– Мемлекет басшысы Қасым-Жомарт Кемелұлы «Берекелі шаңы­рақ – елімізді үйлесімді әрі орнықты да­мытудың мызғымас кепілі. Сон­дық­тан мемлекет ана мен баланы қорғау жүйесін жетілдіруге, отбасы құн­дылықтарын ұлықтауға баса мән береді» деді. Иә, мерейлі отбасы – береке-бірлігімен, тәлім-тәрбиесімен, қалыптасқан қағидасымен, асыл қа­сиеттерімен баршаға өнеге. Сон­дықтан олардың үлгісін дәріптеп, тағылымын көпке тарату маңызды. Биылғы конкурс нәтижесімен 16 отбасы үздіктер қата­рынан та­был­ды. Барлығы – өсіп-өнген әулеттер мен шаңырақтар. Өңірлік ко­миссия­ның ше­шімімен Жалағаш ауданынан кел­ген Төлеміс Бектаевтың отбасы бү­гінгі конкурста бас жүлде иеленіп, рес­публикалық конкурста облысы­мыз­дың мерейін үстем етеді, – деді Нұрлыбек Машбекұлы.

Бүгінде облыста отба­сыларға қам­­­­қорлық пен көмек үз­діксіз көр­се­­тіліп келеді. Ана мен баланы қорғау­ға арналған қаржы, көпбалалы от­ба­­сыларға берілетін мемлекеттік жәр­­демақы көлемі жыл сайын өсуде. Ана­лардың 17 мыңға жуығы – «Алтын ал­қа» мен «Күміс алқа» иегері, 34 мыңға жуығы – көпбалалы ана. Олар­ға ай сайын 2 млрд 85 млн теңге мемлекеттік жәрдемақы төленуде.Мемлекет басшысының, Үкіметтің қол­дауымен халықтың әлеуметтік жағ­да­йын жақсартуға бағытталған тың жобалар жүзеге асуда. Жас отбасы­ларды қолжетімді тұрғын үймен қам­та­масыз ету үшін «Сыр жастары» өңірлік тұрғын үй бағдарламасы қабылданды.Бағдарлама аясында жыл басында 60 жас отбасы қоныс тойын тойласа, жақын күндері 40 жас отбасына пәтер кілті табысталмақ.

Айта кетейік, Бектаевтар отбасы – 11 бала, 43 немере, 66 шөбере, 2 шөпшек өрбіткен өнегелі отбасы. Сондай-ақ ауыл шаруашылығы саласының да­муын­да өзіндік қолтаңбасы бар, шаруа­ға ширақ шаңырақ. Бүгінде бұл отбасы Сыр өңірінің әлеуетін артты­руда мем­лекеттік маңызды шаралар мен қо­ғам­дық жұмыстарға белсене атса­лысып, әрқашан игі бастамаларды қолға алып, көпшіліктің құрметіне ие болып жүр.

Отағасы Төлеміс Бек­таев – тыл ар­дагері, Жалағаш ауда­ны­ның құрметті азаматы. Еңбек жо­­лын 1956 жылы Мақпалкөл ауы­лында егінші болып бастаған ол аудан орталығындағы қазіргі ин­дус­триалды-агрралық кол­ле­джде механи­затор мамандығы бо­йын­ша білім алған. 1990 жылға дейін ауыл шаруашылығы саласында ме­ха­­низатор болып же­міс­ті еңбек етіп, зейнеткерлікке шық­қан. Төлеміс Бек­­та­ев­тың еселі ең­бегі еленіп, «Еңбектегі ерлігі үшін» медалімен, 1991 жылы Қа­зақ СССР-нің жоғары кеңесінің Жар­лығымен «Еңбек ардагері» ме­ре­келік медалімен, 2007 жылы «Қызылорда об­лысына 70 жыл» және Ұлы Жеңістің 60, 65, 70 жылдық медальдарымен ма­ра­пат­талған. Ал ақжаулықты ана Сәнімкүл Әшір­бекова – еңбек ардагері, Алтын алқа ие­гері. 1955 жылы орта мектепті бі­­тір­­ген ол ауыл шаруашылығы сала­сын­да күрішші болып 1987 жылы зей­неткерлікке шыққанға де­йін үздіксіз еңбек еткен. 7 қыз, 4 ұл тәр­биелеп өсірген ана 1974 жылы «Ба­тыр ана» атағын алған. Оның егін ша­руа­шылығындағы еселі еңбегі ба­ға­­ла­нып, 1980 жылы «Халықтар дос­тығы» ор­денімен марапатталған.

Төлеміс Бектаев пен Сәнімкүл Әшір­бековадан тараған балалардың алды зейнеткерлікке шыққан, 5 бала­дан 16 немере, 1 шөбере сүйіп отыр­са, кенжелері 4 бала тәрбиелеп отыр­ған ардақты әке. Бар­лығы жоғары білімді, түрлі салада қызмет етіп, ел эко­но­микасының да­муына еңбек етуде.
– Отбасы – сүйіспеншіліктің, құрмет пен ынтымақтастықтың ошағы, яғни кез келген зиялы қоғамның діңгегі. Отбасының басты қазығы, алтын діңгегі – бала. Баланың тәрбиелі, жан­-жақты болып өсуіне берекелі, өне­­­гелі, ынтымақты отбасының ық­палы зор. Отбасы берекелі, тату болу үшін сыйластық, мейірімділік, жа­на­шырлық, бауырмалдық қасиеттер әр адамның бойынан табылуы ке­рек. Осындай шара арқылы әр отба­сының ынтымағын арттыруға үлес қосқан ұйымдастырушыларға алғыс білдіремін, – дейді Төлеміс Бектаев.

Ақтоты БҮРКІТБАЙ