Жастар – қашанда асқақ арман мен үміт, биік ар мен өр намыстың символы. Қай елдің болмасын басты капиталы халқы десек, соның ішінде жастар – қоғамның жетекші күші ретінде еліміздің дамуы үшін жауапты екені сөзсіз. Еліміздің тарихы мен мәдениетінің тағдыры, дамуы мен өркендеуі, жалпы бүгіні мен ертеңі де жастарға байланысты. Олар қай кезде де, қай қоғамда да белсенді буын өкілдері. Еліміздегі жас буын өкілдері мемлекетіміздің жаңа келбетін қалыптастырады. Себебі, жастарымыздың жаңа белестерге деген ұмтылыстары жаңа идеялардың туындауына себепші болады.
Халқымыз ел келешегінің кемел, болашағының жарқын болуын үнемі жастармен байланыстырады. Осы орайда «Арыстандай айбатты, жолбарыстай қайратты, мен жастарға сенемін», – деп қазақ зиялыларының арасында жастардың айбаты мен қайратына Мағжан Жұмабаев осылай баға берген еді. Міне, осыдан қанша жыл бұрын айтылған сөз бүгінде әрбір жастың жүрегіне нұр сеуіп, кеудесіне үміт сәулесін ұялатады.
12 тамыз – Халықаралық жастар күні. Осыған орай, жастар күнін атап өту мақсатында аудан әкімдігінің қолдауымен, жастар ресурстық орталығының бастамасымен 7-11 тамыз аралығы жастар апталығы болып белгіленіп, әртүрлі бағыттағы шаралар ұйымдастырылды.
Жастар апталығының алғашқы күні орталық саябақтарда «Taza Aimaq» акциясын ұйымдастырудан бастау алды. Акцияға «Жасыл ел» жастар еңбек жасағы мен кент және ауылдық округтердің жастары, мекеме қызметкерлері қатысып, қоғамдық орындарды күл-қоқыстан тазартты.
Даналықтың кілті болып табылатын қарт ата-әжелеріміздің бүгінгі болашаққа берері мол. Еліміздің алтын діңгегі аталған қарттарымызды құрметтеу – әрбір азаматтың басты міндеті. Үлкенге құрмет көрсетуде жалағаштық жастар жолынан жаңылған емес. Бұл сөзімізді ауданның ерікті жастары бастаған бір топ жас «Qamqor» жобасы аясында ардагер анамыздың үйіне барып, тазалық жұмыстарын жүргізіп, қажетті қол көмектерін көрсеткені дәлелдей түсті. “Қарттарымызды құрметтеу, олардың қажеттіліктеріне жарай білу біздің парызымыз” дейді жастар.
Жастардың көмегі қарт кісілердің көңілін көтеріп, күш беріп қана қоймай ертеңіне деген сенімділігін арттыра түсті. Бұл шараның нәтижесінде игі іске жұмылған жалағаштық ерікті жастар ардагер анамыздың риясыз лебізіне бөленді. Бұдан бөлек, барлық ауылдық округтердің ерікті жастары да тыл ардагерлеріне, жалғызбасты қариялар мен көпбалалы аналарға көмек көрсетті.
Мұражай – әр елдің тарихын, салт-дәстүрін, мәдениетін танытатын құндылық. Бұл күнгі шаралар легі «Түнгі мұражай жастарға» атты ашық есік күнімен қорытындыланды. Жастардың ой-өрісін, танымдық қабілетін арттыру мақсатында тарихы терең музейде жастарға өлкеміздің табиғаты, өнері, тарихы, мәдениеті жайлы сыр шертетін экспозициялық залдар бойынша музей қорындағы құнды экспонаттар мен музей тарихынан толық мәліметтер көрсетіліп, кеңінен мағлұмат берілді. Халқымыздың рухани асыл қазыналары мен бүгінін жалғап отырған рухани мекемеден жастар ерекше әсер, рухани азық пен тың серпіліс алып қайтты.
Апталықтың екінші күні жастарды киелі мекендермен таныстыра отырып, еліміздің бай мұраларын насихаттау мақсатында «Asyl Mura» жобасы аясында аудан көлеміндегі тарихи-мәдени орындар Қалжан ахун, Мырзабай ахун, Қособалы асар, Домалақ асар, Үңгірлі асарға саяхат ұйымдастырылды.
– Бұл саяхат біздің білімімізді арттырып қана қоймай, рухани әлемімізге де мол қазына сыйлады. Тарихи мекендерге жасалған сапар басқа саяхаттарға қарағанда ерекше болады екен. Бұл шара жастарға керекті нағыз рухани байлық, ғибратты шара деп білеміз, – деді аудан жастар.
Тарихи орындарды аралай отырып, саяхаттан ерекше әсер алып қайтқан жастарға ұлттық мұраны дәріптеген тарихи-мәдени сапар алдағы уақытта да жалғасын тауып, тұрақты түрде жүргізілетіні жеткізілді.
Мұнан бөлек, «Kino time» ашық аспан астында «Дос-Мұқасан» фильмінің көрсетілімі өткізілді. «Дос-Мұқасан» фильмі – әртүрлі жастағы аудиторияны өзіне баурай алатын отбасылық туынды. Егде жастағы адамдар жастық шақты, сол кездегі әндерді сағынышпен еске алса, жастарға өткен ғасырдың 70 жылдарының лебін сезініп, қазақ «Битлз-нің» қалыптасу тарихымен танысу мүмкіндігі бар. Туынды қазір бірқатар фестивальға қатысып, көптеген кино өнерін бағалаушылар тарапанына өң бағаға ие болып үлгерді. Аталмыш фильмді тамашалауға келген көрермендер ұйымдастырушыларға алғыстарын білдірді.
Жастар күніне арналған жоспарға сәйкес апталықтың үшінші күні 9 тамыз спорт күні болып белгіленді. Осы тұста 16-35 жас аралығындағы жастар арасында спорттың 8 түрінен сайыс өтті. Спорттық шараға аудан әкімінің орынбасары Ғани Сүлейменов қатысып, жарысқа қатысушы спортшыларға сәттілік тіледі. Сайысқа кент және ауылдық округтерден 70-ге жуық жас қатысып суға жүзу, гір тасын көтеру, асық ату, дартс, үстел теннисі, қол күрес, турникке тартылу, шахмат ойындары бойынша бақ сынасты. Сайыс соңында төрешілердің әділ шешімімен ерекше ойын өрнегін көрсетіп, өзінің ептілігімен шымырлығының арқасында көзге түскен жастар жеңімпаз деп танылып, арнайы аудан әкімінің орынбасары Ғани Сүлейменовтың дипломымен «Темірқазық» қоғамдық бірлестігінің медаль, ақшалай сыйлықтары табысталды.
Апталықтың келесі күні 10 тамыз – қазақтың жазба әдебиетінің негізін қалаушысы, ойшыл ақыны, ұстаз ағартушысы, ұлтымыздың тұғыры биік мақтанышы Абай Құнанбайұлының туған күні. Мемлекет басшысының тапсырмасымен Үкімет қаулысына сәйкес 2020 жылы Абайдың 175 жылдығы қарсаңында 10 тамыз Абай күні деп бекітілген болатын. Осы тұста ұлы ақынның өнегелі өмірі мен танысу, ақынның даналығын, рухани асыл мұраларын насихаттау мақсатында ұлы ақынның шығармашылығына арналған «Абайды бірге оқимыз» атты аудандық байқау өтті.Байқауға аудандық білім ошақтарынан 9 оқушы қатысып, ІІІ-кезең бойынша сайысты. Артына өлмейтұғын мұра қалдырған ұлы Абайдың шығармаларын насихаттау, бүгінгі ұрпақтың қастерлі борышы. Сайыс соңында әділ – қазылардың шешімімен байқауға қатысқан қатысушылар жүлделі орындарды иеленіп, арнайы дипломдармен және бағалы сыйлықтармен марапатталды.
Бұдан әрі шаралар легі аудан әкімі Асқарбек Есжановтың аудан жастарымен кездесуімен жалғасты. Жиынға аудан басшысымен қатар аудандық мәслихат төрағасы Өмірзақ Елеусінов және жауапты сала бойынша орынбасарлар, бөлім басшылары мен кент әкімі қатысты.
Жалынды жастар қай кезде де айтар ойын ашық жеткізуге құштар екені белгілі. Ашық аспан астында өткен басқосуда аудан басшысы жастардың көкейтесті мәселелеріне құлақ асып, алдағы уақытта шешу бағытында тиісті шаралар қабылданатындығын айтты.
Кездесу барысында Асқарбек Темірбекұлы басқосуға жиылған жастарды мерекелерімен құттықтап, Жалағаш ауданында жастар саясатының жүзеге асырылуы барысына тоқталды.
– Аудан бойынша 35 жасқа дейін 10966 жас бар, бұл жалпы халықтың 30 пайызын құрайды. Қазіргі таңда мемлекеттік жастар саясатын қаржыландыруға жергілікті бюджеттен 18 млн.теңге және жастарды дамыту мен қолдауға мемлекеттік әлеуметтік тапсырыс шеңберінде 3 жобаны жүзеге асыруға жергілікті бюджеттен 4,2 млн.теңге қаржы бөлінді. Жастарды кәсіпкерлікке тарту бағытында да нақты жұмыстар атқарылуда. Аудан бойынша қазіргі уақытқа дейін 1273 субъекті немесе 38 пайызын 18-35 жас аралығындағы жас кәсіпкерлер құрап отыр. Жыл басынан ауданнан мемлекеттік және өңірлік бағдарламалар аясында шағын және орта кәсіпкерлікті бастау немесе дамыту бағытында 15 жастың жобасы 132 млн теңгеге қаржыландырылды. Сондай-ақ, жыл басынан «Аграрлы несие корпорациясы» АҚ арқылы жастар кәсіпкерлігін бастау немесе дамыту бағытында аудан бойынша 22 жоба қатысып, қазіргі таңда 11 жоба 51,5 млн теңгеге қаржыландырылды. Біз мұнымен тоқмейілсіп қалмауымыз керек, – деген аудан әкімі жастардың дамыған заман талабына сай әркез осындай жаңашыл болу қажеттігін де тілге тиек етті. Кездесуде аудан жастары Жалағаш кентінің орталығынан жастар аллеясы салынса деген ұсыныстарын жеткізді. Бұл ретте Асқарбек Есжанов кент орталығын абаттандыруда жастардың ұсынысын қолдайтынын айтып, келесі жылы аталған ұсынысты жүзеге асыру бағытында жұмыстар жасалатынын жеткізді. Сондай-ақ басқосу барысында белсенділігімен дараланып, қоғамдық жұмысқа атсалысқан, жасынан шаруаны ширақтаған, білім көкжиегінде білімді шәкірттер өсірген, өнерімен танылып спортты жанына серік еткен үздік жастар аудан әкімінің алғыс хатымен марапатталды. Сонымен қатар жастар кеші өз жалғасын тауып, Асқарбек Темірбекұлы алау жанында шығармашыл жастардың өнерін тамашалады.
Апталықтың соңғы күнінде ауданымыздың ерікті жастары «Мектепке жол» акциясы аясында аз қамтылған, көпбалалы отбасыдан шыққан екі оқушының мектепке дайындығына көмектесіп, оқу-құралдарын алып берді. Бес күнге созылған шаралар легі жастар күніне арналған мерекелік гала концертпен аяқталды.
– «Бүгінде әр салада қызмет етіп жүрген белсенді жастар жетерлік. Олар өзінің ауқымды жұмыстарымен, қарқынды қимылдарымен еліміздің дамуы мен гүлденуіне өз үлестерін қосып жүр. Білімнің биігін бағындырып, спортта да, мәдени іс-шараларда да, елімізді әлемге танытып жүргендердің басым бөлігі жастар», – деді аудандық жастар ресурстық орталығының директоры Нұржан Амандық.
Ауданның өресі биік, жалынды жастарын мерекелерімен құттықтап, ізгі лебізін білдірген Нұржан Райсұлы жастар күніне орай ұйымдастырылған апталықтың жоғары деңгейде өтуіне атсалысқан мекеме басшыларымен ұйымдастырушыларға өз алғысын білдірді. Мерекелік шара соңы жалынды жастардың думанды концертімен би кешіне ұласты.
Ақтоты ЕРЖАНҚЫЗЫ
Пікірлер жоқ. Бірінші болыңыз!