Аудан орталығындағы №31 мектеп-гимназиясы – 85 жылдық тарихы бар білім ордасы. Ең алғаш 347 оқушыға есігін айқара ашқан қара шаңырақ 2016 жылы гимназия атағын иеленген. Содан бері білім беру жолында елеулі еңбек етіп, талай шәкірттің талабын ұштаған алтын ұяның бүгінде өзіндік орны бар.

Аталған білім ордасы биыл жаңа оқу жылын 486 оқушымен бастады. Оның 37-сі – мектеп табалдырығын ең алғаш аттаған бүлдіршін, ал 42-сі мектепалды даярлық тобына қабылданған. Мектеп-гимназия дирек­то­ры Гүлжанат Басанованың айтуын­ша, биыл 25 оқушы мектеп бітіреді. Оның 5-еуі шығармашылықпен оқуға тү­суге талпынып отыр. Ал 18-і ҰБТ-ға қатысады.
– Былтыр оқу жылын жоғары же­тістікпен қорытындыладық. Биыл да жоғары деңгейде аяқтаймыз де­ген ойдамын. Түлектердің ҰБТ-ға дайын­дығы басталып кетті. Оқу­шы­ла­рымыз алдын ала дайындық сынақ­та­рынан жоғары көрсеткішке қол жеткізіп, алды 100 баллдан жоғары жинады. Межеге жету үшін ұстаздарымыз бар қарым-қабілетін жұмсауда. 3 тү­лек – «Үз­дік аттестатқа» үміткер. Тү­лек­тер­дің ба­сым көпшілігі физика-матема­тика, хи­мия-биология, ағылшын тілі, дү­ние­жүзі тарихы пәнін таңдауда, – дей­ді білім ордасының басшысы.

Айта кетейік, былтыр аталған білім ошағын 18 түлек бітіріп, оның 15-і бүгінде еліміздегі маңдайалды жоғары оқу орындарында мемлекеттік грантпен білім алуда. Ал 3-еуі арнаулы орта оқу орнына құжат тапсырған.
Әрине, оқушыға сапалы білім беруде білім ордасы қажетті заманауи технологиялармен, ақпараттық ресурс­тармен жоғары деңгейде қамтылғанын аңғардық. Яғни мектеп қазіргі заман талабына сай техникалық құрал, ком­пьютер, интерактивті тақталармен жаб­дықталған. Атап айтар болсақ, мұнда арнайы химия, физика, биология, ин­фор­матика, ІТ кабинеті бар. Онда сапалы интернет желісі де тартылған.
Сондай-ақ мұнда 91 мұғалім бар. Оның 18-і – педагог зерттеуші, 23-і – пе­дагог сарапшы, 31-і – педагог мо­дератор. Өскелең ұрпақты оқытып тәр­биелуде аталған білім ордасы биік бе­лестерді бағындыруда. Ұстаздар мен оқушылар аудандық, облыстық, рес­публикалық байқаулар мен пәндік олим­пиадалардан, сондай-ақ спорттық сайыстардан жүлделі орындар иеленіп жүр. Мәселен, жақында ғана ауыл мек­тептері оқушылар арасында ауыл олимпидасының облыстық кезеңіне 9 оқушы қатысып, І, ІІ, ІІІ орын­дарды иеленген. Яғни 2 оқушы рес­публикалық кезеңге жолдама алған.
2 мен 7 сынып оқушылары ара­сында өткен «Зерде» ғылыми жоба­сының аудандық кезеңіне 14 оқушы қатысып, 12-сі жеңіс тұғырынан кө­рінген. Оның ішінде 3 оқушы облыстық кезеңге өткен. Ал 8-11 сынып оқу­шылары арасында өткен «Дарын» ғы­лыми жобасына 4 оқушы қатысып, мектеп абыройын үстем еткен.
Білім ордасында оқушыларды жан-жақты дамытып, бос уақытын тиімді өткі­зіп, оларды спортқа, өнерге баулу мақ­сатында түрлі үйірмелер жұмыс істейді. Әрине, үйірменің үйретері көп. Мектеп директорының айтуынша, оқушылардың 80 пайызы үйірмеге тұрақты түрде қатысады. Ауданда өткізілетін спорттық сайыс­тарда топ жарып жүрген жастардың көбісі осы мектептің білім алушылары десек, қателеспейміз. Себебі олар спортқа бейім. Яғни мұнда дойбы, шахмат, баскетбол, волейбол, футбол, үстел теннисі, ганд­бол, робототехника, ән, қолөнер үйір­мелері бар. Қыздар арасында өткен республикалық кіші футболдан мектеп оқушыларынан құралған команда биыл І орын иеленген. Мұнан бөлек «Мектеп театры» жо­басы, «То­ми­рис» дебат клубы, «Жасыл клуб» еріктілер бірлестігі жұмыс іс­тейді. Мә­селен, «Мектеп теат­ры» ұжы­­мы жа­қында «Әбіш оқула­ры» рес­публи­калық ғылыми-шығармашылық кон­кур­сының облыстық ке­зеңі­не қатысып, Әбіш Кекіл­баевтың «Аңыз­дың ақыры» шы­ғар­масындағы «Махаб­бат мұна­ра­сы­нан» үзінді қойып, ІІ орын иеленген.
Сондай-ақ білім ордасында мек­теп парламенті де тағайындалған. Оның басты мақсаты – оқушылардың қоғамдық, әлеуметтік, шығармашылық қабілетін арттыру. Мектепте оқушы­ларды білім-ғылымға баулитын түрлі шаралар көбіне кітапханашының ұйым­дастыруымен өтеді. Күн сайын іші ба­лаға лық толатын кітапхана қорында 22 964 кітап болса, оның 1557-сі – оқулық, қалғаны көркем әдебиет, әдіс­темелік құралдар мен электрондық кітаптармен толыққан. Жастарды кітап оқу мәдениетіне тәрбиелуге, олар­дың поэзияға деген құлшынысын арт­ты­руға, талғамына, таңдауына сай әде­биеттерді іріктеп оқуға деген ынта-ықы­ласын көтеруде кітапханашы Сара Буханованың үлесі зор. Себебі ол оқушылардың шығармашылық жұмыс­тармен көп шұғылдануына бар жағдай жасайды. Мәселен, кітапханада «Оқуға құштар» мектеп жобасы аясында көптеген танымдық іс-шара өткізіліп, көрмелер ұйымдастырылып тұрады.
Мұнан бөлек мектеп-гимназияда түрлі патриоттық және әлеуметтік ба­ғытта балалардың жас ерекше­лік­теріне қарай «Қасиетті домбыра», «Әке ұлағаты, ана өсиеті», «Ұлттық ойындар», «Қазақ халқының дәстүр­лері», «Ерлікке тағзым», «Буллинг және кибербуллинг», «Өз мектебімнің тарихы» атты жобалар тұрақты түрде ұйымдастырылып тұрады.
№31 мектеп-гимназиясы жыл сайын білім бәйгесіндегі жетістіктері үшін аудан әкімінің «Жеңістің биік тұғы­ры», «Шабыттың ақ желкені» сынды түрлі номинацияларын иеленіп келеді. Сон­дай-ақ былтыр «Жылдың үздік мұғалімі» номинациясын да аталған білім ордасының ұстазы Тоты Жалиева иеленген. Ұжымның әр жетістігінде әр ұстаздың еңбегі мен оқушының қарым-қабілеті, ізденісі жатқаны рас.
Мүмкіндігі шектеулі балаларды да назардан тыс қалдырмаған білім ордасында арнайы дефектолог кабинет жасақталған. Мұнда ерекше білімді қажет ететін балалармен жұмыс іс­тейтін дефектолог Ақмаржан Бүркітбай балалармен коррекциялық жұмыс жүр­­гізіп, оң нәтижеге қол жеткізуде. Сон­­дай-ақ Ол – «Үздік де­фектолог – 2024» байқауының І орын иегері. Мек­тепте әлеуметтік тұрмыс жағ­дайы төмен от­басылардан 117 оқушы, 1-4 сынып­тағы 126 оқушы, барлығы 243 бала тегін ыстық тамақпен қамтамасыз етілген.
Мақаламызға арқау болған атал­ған білім ордасының ұстаздары шә­кірт­­терін білім нәрімен су­сындатып, тәлім-тәрбие беріп, жақ­сы қасиеттерді бойына дарытуда қажырлы еңбек етуде. Олар оқушы­ларды білім мен тәрбие арқылы тұлға етіп қа­лып­тас­тыруда жауапкершілікті бірінші орынға қояды.

Ақтоты ЕРЖАНҚЫЗЫ