Апта басында әдеттегідей тілшілік тірлігімізбен елді мекендерге қарай жол тарттық. Бұл жолы бағытымыз Таң ауылына түсті. Әріптесім екеуіміз жол бойы бүгінге дейін Таң ауылында атқарылған жарқын жобаларды сөз еттік. Расымен де, Таңда тындырымды тірлік көп. Бұл сөзімізге ауылға атбасын бұрған сайын көзіміз жете түседі.

Әне-міне дегенше ауылдағы алтын ұяға да табан тіредік. Мектеп дирек­торы Ләйла Шөменованың айтуынша, жаңа оқу жылы қар­са­ңында мектеп аумағын абат­тан­дан­дыру жұмысына облыстық бюд­жеттен 78 млн теңге бөлініп, ойын алаңы салынған. Ал ғи­марат 2022 жылы күрделі жөн­деу­ден өтіп, ауыл балаларының сапа­лы білім алуына қолайлы жағдай жасалған.
Олар жаңа оқу жылын 261 оқу­­­шымен бастаған. Оның 26-сы мектеп табалдырығын алғаш ат­та­­ған бүл­дір­шіндер болса, 17-сі бі­тіруші тү­лектер. Жаңа оқу жылы­ның тағы бір ерекшелігі 1-11 сынып оқушылары бірдей форма киген. Арнайы Түркия елінен тіктірген киімге Таң ауылы №118 орта мектеп деген арнайы ло­готипте қойылған. 84 оқушыға үкі­мет­тен бөлінген қаржыға, 15 оқушыға «Таң ЛТД» шаруақожалығы, 4 оқу­шыға мектеп мұғалімдері демеу­шілік жасаған. Былтыр алтын ұядан 10 түлек түлеп, оның 9-ы ұлттық бірыңғай тестілеуге қатысқан. Қуантарлығы, барлығы еліміздегі маңдайалды оқу орындарынан білім грантын жеңіп алса, 1 оқушы арнайы оқу орнына құжат тапсырған.

– ҰБТ бойынша былтырғы және оның алдыңғы жылдардағы нә­тиже өте жақсы. Әр жыл сайын оқу­шы­лардың басым көпшілігі грант жеңіп алуда. Биылғы түлектердің де беталысы жа­ман емес. Оқушы­ларымыз ай сайын Қы­зылорда қаласындағы «U-Study» тестілеу ор­та­лығына барып тест тап­сыра­ды. Алды 100-ден жоғары ұпай жинап жүр. ҰБТ-ға дайындық күн­діз-түні жүріп жатыр, тікелей өзім­нің бақы­лауымда, – дейді мектеп ди­ректоры.
Арнайылап ауылға атбасын бұрып келгендіктен түлектермен тіл­­десу үшін математика кабине­тіне қарай бет алдық. Мектеп дирек­торының айтуынша, бұл кабинетке ардагер ұстаз Қайырберген Әб­диевтің есімі берілген. Саналы ғұмырын білім саласына арнаған Қайырберген Әбдиев 45 жыл ұстаздық қызметті абыроймен атқарған. Бұл еңбегін еле­­ген ұс­таздың ұлағатты ұрпақтары ауыл мектебінің математика кабине­тіне оның есімін беріп, ішін толық жабдықтаған.
Биыл мектепті 17 оқушы бітіреді. Оның 16-сы ҰБТ-ға қатысуға ниетті. Ал 1 оқушы ақылы негізде ж­оғары оқу орнына түспек. Бітіруші түлектердің басым көпшілігі жара­ты­лыстану-математика бағытын таң­даған.
Мектеп басшылығы ұстаздардың біліктілігін арттыруды жіті назарда ұстайды. Қазіргі таңда мектепте 48 мұғалім жұмыс жасауда. Оның 2еуі педагог-шебер, 9-ы педагог-зерттеуші, 18-і педагог-сарапшы, 17-і педагог-модератор. Мектепте мін­­детті оқу қоры есебінен ыстық та­мақпен 143 бала қамтылған. Оның 92-сі бастауыш сынып оқушысы болса, 51-і әлеуметтік аз қамтылған отба­сының балалары.
Былтырғы оқу жылында аталған білім ордасының ұжымы өскелең ұр­пақты оқытып тәрбиелеуде қалт­қысыз қызмет етіп, мол жетістікке қол жеткізген. Оған мектеп қа­бырғасында менмұңдалап тұрған марапаттар дәлел. Мәселен жаңа оқу жыл қарсаңында республикалық «Төлеген Айбергенов» оқулары мен «Абай» оқуы, «Ілияс Жансүгіров» оқуларынан оқушылары жүл­делі І, ІІ орын иеленгені үшін «Үздік шы­ғармашыл мектеп» номина­ция­сымен марапатталып, өт­кен оқу жы­лының қорытындысы бойынша «Ын­тымағы жарасқан мек­теп» номинациясын иеленген.
– Өзіңіз көргендей мектебіміз заман талабына сай материалды техни­калық базамен қамтамасыз етіліп, оқушыларға әр пәнді те­рең үйретуге мүмкіндік беретін қажетті құрал-жабдықтармен яғни интерактивьті тақта, компью­тер­лермен жабдық­тал­ған. 2013 жылы мектеп бітірген түлек­теріміз 10 жыл­дықта мектеп қабырғасына «Жа­сыл бұрыш» ор­натты. Сол тү­лектердің 6-ауы қазіргі таңда мектепте өздерінен кейінгі жас ұр­паққа сапалы білім беріп, озат оқушы етіп шығаруда ерен еңбек етуде. Оқушылар сабақтан тыс бос уақытын түлектер тарту еткен «жасыл бұрыш» алаңында өткізеді, – дейді мектеп директоры Ләйла Шөменова.
Мектеп оқушылары түрлі аудан­дық, облыстық, республикалық, білім олимпиадаларына, ғылыми жа­рыстар мен шығармашылық бай­қауларға бел­сене қатысып, жүлделі орын­дар­ды иеленіп жүр. Мәселен, 5-6 сынып оқушыларына арналған республика­лық олимпиаданың аудандық кезе­ңіне 12 оқушы қатысып, 3 оқушы жеңіс тұғырынан көрініп, 1-еуі об­лыс­тық кезеңге жол­дама жеңіп ал­ған. Ал дәл осы олимпиаданың 7-8 сынып оқушы­ларына арналған кезеңіне 20 оқушы қатысқан. Бұл кезеңде 10 оқушы жеңімпаз ата­нып, 2-еуі об­лыстық кезеңге өткен. Ал 9-11 сыныптан 24 оқушы қаты­сып, 9-ы жеңіспен оралып, 2-еуі облыстық кезеңге өтіп, алғыс хатпен оралған. Айта кетейік, былтыр дәл осы олимпиададан Кәусар Ердан құ­қықтық білім негіздері пәні бо­йын­ша республикалық кезеңге дейін барып, білі­мін саралаған. Мұ­нан бөлек ауыл мек­те­бінің оқу­­шы­­ла­рына арналған ауыл олимпиада­сының аудандық ке­зеңіне 18 оқу­шы қатысып, 5-еуі орын алып, 2-еуі об­лыстық кезеңнен ІІІ орын иелен­ген.
Сондай-ақ оқушылардың зият­кер­­лік-шығармашылық әлеуетін жә­не та­нымдық қызығушылықтарын ынта­ландыру мақсатында 2-7 сы­нып оқу­­шыларына арналған «Зерде» зерт­­теу жұмыстары және шы­ғар­машылық жобалар республи­калық конкурсының аудандық ке­зеңіне 9 оқушы қатысып, 7-еуі жүлделі орын алған. Сондай-ақ жалпы білім беретін пәндер бойын­ша 8-11 сынып оқушыларына ар­­налған «Дарын» ғылыми жобалар кон­курсының аудандық кезеңіне 3 оқушы қатысып, 2 оқушы жүлделі ІІІ орын алған.
Ал ҚР Білім Министрлігінің қол­дауы­мен Қазақстандағы ең ау­қым­ды ауыл оқушыларына ар­нал­ған «IQanat» республикалық олимпиа­дасына 2020 жылдан бас­тап білім ошағының оқушылары қатысуда. Жаңа оқу жылында да аталған олимпиадаға 2 оқушы химия, мате­матика пәні бойынша қатысып, Бура­байда орна­ласқан «IQanat Ka­zakh-English High School» мек­те­бінде оқу мүмкіндігіне ие болған.
Сонымен қатар халықаралық Әл-Фараби олимпиадасына мате­ма­тика пәні бойынша 6 сынып оқу­шысы Мұхамедәли Атымтаев қатысып, аудандық ке­­зең­нен ІІ орын алған. Әрине шәкірттердің айтулы жетістігі білікті мамандардың еселі еңбегінің жемісі.
Мұнан бөлек мектепте оқушы­ларды жан-жақты дамыту жұмысы бір жолға қойылған. Бүгінде аталған бі­лім ошағында бірнеше үйірме жұ­мыс жасайды. Оның басым көп­­шілігі спорт саласына бағыт­тал­ған. Ауыл ба­лалары мұнда са­бақтан тыс баскетбол, волейбол, футбол, теннис, дом­­быра, әскери патриоттық клуб сынды үйірмелерге қатысып, әртүрлі са­йыста жеңіс тұғырынан көрінуде.
Мұнда оқушылар екі ауы­сыммен білім алады. Сабақтан тыс уақы­тында үйірмелер мен кітап­ханада өткізетін оқушылардың өнер мен білім бәйгесінде бәсі биік. Бүгінгі са­пардан түй­геніміз осы.

Ақтоты ЕРЖАНҚЫЗЫ