Президент Қасым-Жомарт Тоқаев халқымыз қашанда жаңашылдыққа құштар болғанын, әрдайым білімге, шығармашылыққа және жасампаздыққа ұмтылған, бірлік пен ынтымақты ту еткенін баса айтып жүр. «Бүгінгі жас ұрпақ жаңғыру үдерістеріне атсалысып, елімізде жүргізіліп жатқан реформалардың игілігін толық сезінуі қажет. Дарынды, талапты және еңбекқор жастар, оның ішінде ғалымдар – заманауи Қазақстанның жарқын келбеті. Жас әрі терең білімді азаматтар – ұлтымыздың басты капиталы және қоғамдағы оң өзгерістердің қозғаушы күші» деді Мемлекет басшысы.

Иә, бүгінде елдегі білім ошақтарын цифрландыру үдерісі ауыл мектеп­терінен басталды. Жалпы елі­мізде 5 мыңнан астам ауыл мектебі бар. Қуантарлығы, ауыл мен қала мек­тептеріндегі білім сапасына қа­тыс­ты алшақтықты жою үшін ауыл мектептерінің деңгейі едәуір көте­рілді. Бір сөзбен айтқанда, ауыл білім ошақтары мен қала мектептерінің жағ­дайы бір деңгейде десек, қателеспейміз.
Мәселен, былтыр «Қа­зақстан хал­қына» қоры есебінен ауылдық жерлерде тірек мектептердің әлеуетін дамыту бағдарламасы ая­сында Әл-Фараби атындағы №201 мек­теп-лицейінде 250 млн теңге қар­жы қаралып, оқу кабинеттері, зерт­ханалар заман та­ла­бына сай жаңа жаб­дықтармен жарақталды. Со­ны­мен қатар «Ауыл – ел бесігі» жо­басы аясында Бұқарбай батыр ауы­лындағы №33 орта мектепке күр­делі жөндеу жұмыстары жүргізілді. Аудан оқушылары республикалық, об­лыс­тық деңгейдегі білім бәйгелерінде алдыңғы қатардан ұдайы көрініп келеді.
Мұнан бөлек аудан дарындары ауыл мектептерінің оқу­шыларына ар­налған олимпиаданың республи­калық кезеңінде жүлдегерлер қата­рынан көрініп келеді. Нәтижесінде рес­публика көлемінде Әл-Фараби атын­дағы №201 мектеп-лицей үздік 10 мектептің құрамына еніп, Қазақ­стан Республикасы Оқу-ағарту министр­лігінің «Ең үздік ауыл мектебі» атағымен марапатталып, об­лыстың «Үздік мектеп» грантын жеңіп алған болатын.
Осы орайда аудан әкімі Ардақ Ибраимов «Руханият» орталы­ғында ұйымдастырылған «Жас өнертап­қыш­тар: Инновация және болашақ» атты аудан оқушыларының ғылыми-тех­ни­калық бағыттағы инновациялық жоба­лар көрмесімен танысты. Дарынды оқушылар ғылыми-техникалық бағыт­тағы инновациялық жобаларын жаңа ғылыми идеялар негізінде әзірленгенін жан-жақты түсіндіріп өтті. Ұсынылған жобалар қоғамның түрлі салаларында прогрессті қамтамасыз етуге, өн­діріс пен қызмет көрсету процесін оң­тай­ландыруға, ресурстарды тиімді пайдалану және экологиялық тұрғыдан таза суды қамтамасыз ету мақсатында жүзеге асыруға бағытталған.

Аудан әкімі инновациялық жоба­лардың болашақта ел игілігі үшін жүзеге асуына тілектестігін білдіріп, жас ғалымдар мен дарындылардың туындыларын жоғары бағалады.
– Әрбір жобаның артында үлкен еңбек пен шығармашылық ізденіс тұр және бұл жобалардың болашақта қоғамға қосар үлесі зор екені айқын. Жастарымыздың ғылыми-техникалық әлеуеті өте жоғары. Бұл жобалар ауда­нымыздың дамуына жаңа серпін беріп, еліміздің болашағы үшін маңызды қадам болмақ. Бүгінгі көрмеде көрсе­тілген жұмыстар мен идеялардың әрі қарай сәтті жүзеге асуына тілектеспін, – деді аудан әкімі.
Айта кетейік, инновациялық жоба­лар көрмесіне республикадан орын алған 30 жоба ұсынылды. Аудан оқу­шылары биылғы оқу жылында да рес­публикалық, облыстық білім бәйге­ле­рінде үздіктер қатарынан көрініп келеді.
Мұнан кейін «Білімді ұрпақ – жарқын болашақ кепілі» атты аудан әкімінің дарынды оқушылармен кездесуі өтті. Кездесуге жиылған республикалық пән­дік олимпиада жеңімпаздары ау­дан басшысымен еркін форматта пікірлесіп, ашық диалог құрды.
– Сіздер, аудан, облыс, респуб­ликалық олимпиадада білімдеріңізді дәлелдеп, жеңімпаздар қатарынан кө­рініп келесіздер. Мемлекет басшы­сының, Үкіметтің қолдауымен қазіргі таңда өңіріміздің білім саласында ау­қымды жобалар жүзеге асырылуда. Облыс әкімінің тікелей қолдауымен аудандағы мектептер заман талабына сай жабдықталды, бұл бағыттағы жұ­мыстар одан әрі жалғасатын болады. Қазір білім аламын деген жастарға барлық жағдай жасалған. Өздеріңіз білетіндей, Мемлекет басшысы 2025 жылды «Жұмысшы мамандықтар жылы» деп жариялады. Экономиканы өркендетуде білікті мамандар әркез сұранысқа ие, сондықтан ауданда қазіргі еңбек нарығына қажетті мамандар тізімі жасақталды. Елдің болашағы – өздеріңіз секілді білімді жастар. Алдағы ұлттық бірыңғай тестілеуден сәтті өтіп, болашақта сұранысқа ие мамандықты меңгеріп шығуларыңызға тілектеспін, – деді Ардақ Ибраимов.
Президент Ұлттық құрылтайдың IV отырысында биыл елімізде 500 мың оқушыға арналған екі жүзден астам мектеп салынатынын мәлімдеген бо­латын. Шындығында, сапалы салынған қарапайым мектептерге де сұраныс жоғары. Үш жылда 1300, соның ішінде ауылдағы 900 білім ордасын жаңғырту міндеті тұр. Жаңа оқу жылына дейін мемлекеттік және жекеменшік мек­тептің барлығы балалардың қауіп­сіз­дігін қамтамасыз ететін арнайы құрал­дармен жабдықталуы тиіс.
Айта кетейік, Сыр елінде «Жайлы мектеп» ұлттық жобасы аясында 6900 орындық 10 мектептің құрылысы жүр­гізіліп, 2700 орындық 5 мектеп пай­далануға берілді. Былтыр аймақта 6 мектеп, ал 5 білім ордасына қо­сымша ғимарат салынып, Арал ауданы Тоқабай ауылындағы, Шиелі кентін­дегі және осы ауданның Жансейіт ауылындағы апатты мектептердің мәселесі шешімін тапқан болатын. Тағы 8 мектептің ғимаратына күрделі жөндеу жүргізілген.
Сондай-ақ Жалағаш кентінде өнерлі жастардың бас қосатын мекені 200 орындық оқушылар үйі мен 50 орындық өнер мектебі ел игілігіне берілді.
– Бүгін біз үшін ерекше күн. Бірыңғай «Жүзден жүйрік, мыңнан тұлпар шыққан» олимпиада жеңімпаздарының қатарынан табылып, осындай құрметке ие болу – біз үшін үлкен абырой. Президент Қасым-Жомарт Кемелұлы Тоқаев еліміздің жас таланттарын қолдау елдің болашағына инвестиция екенін атап өтті. Жастардың білім мен ғылымға ұмтылысын қолдайтынын айтып, олардың жетістігі елдің дамуына қосылған үлес екенін айтқан болатын. Республикалық олимпиадалар мен ғы­лыми жобаларда бірнеше рет жа­ратылыстану-математика, қоғамдық-гуманитарлық бағыт бойынша аудан­ның, облыстың мерейін қазақ тілі, орыс тілі, биология пәндері бойынша жеңімпаз болып жүргенім тек өзіміздің ғана емес, бізге білім берген ұстаздарымыз бен ата-анамыздың да еңбегі деп білемін. Осы мүмкіндікті пайдаланып, әрдайым білім мен ғылымға ұмтылу қажеттігін үйреткен ұстаздарымызға шексіз алғыс айтамын, – дейді Темірбек Жүргенов атындағы №123 мектеп-лицейдің 10 сынып оқушысы Рәбия Қодар.
Рәбия сынды дарынды оқушыларға мемлекет жыл сайын республикалық және халықаралық деңгейде пәндік олимпиадалар, ғылыми жарыстар, шы­­ғармашылық байқаулар ұйымдас­ты­рады. Сол арқылы жеңімпаздар мен жүл­­дегерлерге гранттар, стипендиялар және ЖОО-ға түсу кезінде жеңілдіктер беріледі.
Әлеуметтік жағдайы төмен отба­сы­нан шыққан дарынды балалар үшін «Қазақстан халқына» қоры, Прези­денттік білім гранттары қарастырылған. Сонымен қатар «Болашақ» бағдар­ламасы арқылы шетелдік үздік универ­ситеттерде білім алу мүмкіндігі бар.
Республикалық Ауыл олим­пиа­дасында тарих пәнінен жүлделі ІІІ орын, қола жүлде иегері №201 мек­теп-лицейінің 11 сынып оқушысы, «Алтын белгіге» үміткер, Қорқыт ата университеті грантының иегері Ба­қытжан Берекет, №201 мектеп-лицейінің «Алтын белгіге» үміткер, респуб­ликалық Ауыл олимпиаданың физика пәнін 2 жыл қатарынан І орын және «Алтын медаль» иегері, Сүлеймен Де­мирел университетінің грант жеңім­пазы Азамат Тұрсынбектің білім­дегі жетістіктері талай жастың білім алуға деген ынтасын ашары сөзсіз.
Жиын соңында білім бәйгелерінде топ жарып жүрген озат оқушылар облыс әкімі атынан бағалы сыйлықтарға ие болып, аудан әкімінің алғыс хатымен марапатталды.

Ж.МАХМҰТҰЛЫ