ЖАЛАҒАШТЫҚ ШАРУАЛАР АУДАН ОРТАЛЫҒЫНДА АУЫЛ ШАРУАШЫЛЫҒЫ ӨНІМІДЕРІНЕН ЖӘРМЕҢКЕ ҰЙЫМДАСТЫРДЫ. МҰНДА ТЕК ӨЗІМІЗДІҢ ӨҢІРДЕ КҮТІП-БАПТАЛҒАН ЖӘНЕ ӨНДІРІЛГЕН ӨНІМДЕР АУДАН ХАЛҚЫНА НАРЫҚТАН 15-20 ПАЙЫЗ ТӨМЕН БАҒАДА САТЫЛДЫ. МОЛШЫЛЫҚ ШАРАСЫНА ОРАЙ ЖӘРМЕҢКЕДЕ КӨҢІЛДІ ӘУЕН ДЕ ОЙНАП ТҰРДЫ. БАСТЫСЫ, ҚЫСТАН ҚЫСЫЛМАЙ ШЫҚҚАН ЖЕРГІЛІКТІ ТҰРҒЫНДАР БІР-БІРІМЕН МӘРЕ-СӘРЕ БОЛЫП, МАЛ-ЖАННЫҢ АМАНДЫҒЫН СҰРАСТЫ.

Әдеттегідей таң атысымен Абай көшесі бойына жиылған халықтың қа­расы қалың. Бәрінің мақсаты – са­палы және арзан бағада ұсынылған өнім­­­дерді артығымен сатып алу. Бұл жолы аудан тұрғындарына 15 авто­кө­лікпен 59,2 тонна азық-түлік өнімдері ұсынылды. Оның ішінде облыс әкімінің тапсырмасына сәйкес «Байқоңыр» әлеу­меттік-кәсіпкерлік корпора­ция­сы­­­нан 15 тонна картоп, 10 тонна пияз жә­­не күнбағыс майы төмен бағамен сатыл­­ды.
Жәрмеңкеде аудан әкімі Ардақ Ибраимов жергілікті өнімдердің баға­ла­рымен танысып, нарық бағасы­нан төмен бағада ұсынған сауда ие­леріне алғыс білдірді. Жалпы баға тұ­рақтылығын бақылау жұмыстары алдағы уақытта да жалғасын тауып, сол арқылы бағаны себепсіз өсіруге жол берілмейді. Мұны аудан басышысы жеке қадағалауына алған. Жалпы аудан орталығында азық-түлік тауарларының қоры жеткілікті, тапшылық жоқ.
Кент тұрғыны Сәбит Досов жәр­меңкеде отбасылық азығын қамдап алуды әдетке айналдырған. Ол мұнда ең бірінші өнімнің қай түрі өтіп кете­тінін де жақсы білетін көрінеді. Маржандай күрішімізді, Мақпалкөлдің алмасы, Қаракеткеннің балығы, өзі­міздің тұзды етімізді жергілікті тұр­ғын­дар таласа саудалайтын өнім­дер десек, артық айтқанымыз емес. Жүк көліктеріне тиелген бақша өнімдеріне қарама-қарсы орналасқан сөреде үл­кен жайынды таразыға тарттырып жат­­қанына куә болдық. Кейін сұраға­нымызда бұл кент тұрғыны күзде ұйымдастырылған жәрмеңкеде де осын­дай үлкен жайынды саудалаған екен. Балық етінің дәмі отбасына ұнап, тағы да сатып алуға келген.
– Жергілікті кәсіпкерлер ұйымдас­тыратын жәрмеңкеден жыл сайын қажетті затымызды арзан бағада сатып аламыз. Тіпті өзімді бұл ауданның сала өкілдері өндіретін өнімдердің тұ­рақты тұтынушысымын десем де болады. Тек биыл жылдағыдан сәл кеш келдім. Әсіресе Қаракеткеннің балығы ұнайды. Бірінші саудамды осы балық алудан бастап жатқаным да сондықтан. Әдеттегідей барлық өнімнің нарық бағасынан арзан екенін анық байқауға болады. Қазір картоп, пияз, асқабақ секілді бірқатар бақша дақылы мен ет өнімдерін молынан аламын. Мұнда тіпті қорада мал ұстайтын жандар үшін де мал азығы жеткізіліпті. Оның да бағасы нарықтан әлдеқайда төмен. Жалағаштықтар шаруа адамдары бізге осындай сапалы өнімдерін ұсына берсін деп тілейміз. Ұйымдастырушыларға алғыстан басқа айтарымыз жоқ, – дейді кент тұрғыны Сәбит Досов.
Мұнда бос жүрген бір адам көзге түспейді, барлығының қимылы шалт. Сатушы бір тұтынушының қоржынын сапалы өніммен толтырса, кезекте 4-5-еуі тағы тұр. Осыдан-ақ кент, ауыл аймақтардан жеткізілген әрбір өнімнің бағасы қалтаға қонымды, сапасы да жоғары екенін анық байқауға болады. «Елде болса, ерінге тиеді» деген осы шығар, сірә. Сатушыда реніш жоқ, тұтынушы да дән риза.
– Аудан орталығында жәрмеңке өтеді деген соң, сонау Жаңадария ауы­лынан өз өнімімізді әкелдік. Негізінен бақша өнімдері, картоп, қауын-қар­бызды тұрғындарға ұсынудамыз. Өз­деріңіз білесіздер, Жаңадария ауы­лы бақша дақылдарын егуге өте қо­­лайлы, топырағы құнарлы, бүгінде аяқ­су жолдары бір жүйеге түскен. Әсі­ресе қауын-қарбыз табиғи ауа райы­мен, яғни ешқандай қоспасыз, жаз бо­йы күннің ыстығымен ерекше пісіп-жетіледі. Алайда қауын-қарбызымыз қысқа дейін толықтай өтіп кетті. Енді міне, кар­топ, асқабақ өнімдерін сатудамыз. Бас­тысы, сапалы өнімге сұраныс жоғары, – дейді шаруа адамы Рысбек Ілиясов.
Айта кетейік, биыл мерекелі жыл­ды аудан шаруалары мол табыспен қарсы алды. Былтыр жыл қорытындысымен облыс бойынша ауданымыз агро­өнеркәсіп кешенін дамытуда ең жо­ғары көрсеткіштерге қол жеткізіп, «Үздік аудан» номинациясына ие болды. «Қызылорданың Қостанайы» бол­ған жалағаштың диқандары былтыр 37 218 гектарға ауыл шаруашылығы да­қылдарын екті. Оның ішінде 19 800 гектар күріш егіп, әр гектардан 60,5 центнерден, барлығы 1 млн 200 мың центнерге жуық өнім жинады.
Былтыр аудан шаруалары күріштен бөлек бидай, арпа, сұлы, қант құмайы, мақсары, картоп, көкөніс, бақша да­қылдарын толық жинап алды. Тар­қатып айтсақ, 129 гектар күздік бидайдың әр гектарынан 13, 770 гектар жаздық бидайдың әр гектарынан 9, центнерден, 665 гектар мақсарының әр гектарынан 8,7, 200 гектар қант құ­майының әр гектарынан 41, 40 гектар ар­паның әр гектарынан 8,2 центнерден өнім жиды.
Мұнан бөлек 64 центнер сұлы, 33 276 центнер картоп, 195 центнер көкөніс, 299 650 центнер бақша да­қылдары жиналды. Сондай-ақ биыл азық-түлік бағасын тұрақты ұстап тұру мақсатында аймақ бойынша картоп, көкөніс, бақша өнімдерін 17,8 мың гек­тарға егу межеленген.

Жандос ЖАЗКЕН