«Нашақорлыққа жол жоқ» ұранымен аудан, ауыл мекемелері қызметкерлерінің арасында еркін жүзуден аудандық ашық біріншілік өтті. «Б.Құлтекенов» атындағы жабық бассейндегі жарысқа қатысушылар өзара мықтыны анықтап, жүлделерді сарапқа салды.

Салауатты өмір салтын қалып­тас­ты­ру және ауданда жүзу спор­тын дамыту мақсатында ұйым­дас­ты­рыл­ған жарыста 30-40 жас, 40-50 жас, 50-60 жас және 60 жастан жоғары ме­кеме қызметкерлері суда еркін жүзуден сайысты. Жалағаш кенті мен ауылдардан 30-дан аса қызметкер қатысқан бәсеке тартысты өтті. Қаты­сушылар 50 метрге еркін әдіспен жүзуден бақ сынады.

Нәтижесінде 30-40 жас аралы­ғын­­да Асхат Сапабек оза шапты. Ке­­лесі орынға «Наркескен» спорт клу­­­бының волейбол үйірмесінің жат­­тық­тырушысы Жайдар Мақсұм жай­­ғасса, Еңбек ауылынан келген Ер­бо­лат Оржанов үздік үштікті түйіндеді.
40-50 жас аралығында №33 ор­та мектептің мұғалімі Нұрлыбек Тө­леубаев көш бастады. Ал екінші орынға аталған бассейн қызметкері Арман Абуов ие болса, үшінші орын­ға №123 мектеп-лицейдің қыз­меткері Самұрат Оспанов лайық деп танылды.
50-60 жас аралығындағы қаты­сушылар арасындағы жарыс та тар­тысты өтті. Мұнда мемлекет және қо­ғам қайраткері атындағы №123 мектеп-лицейінің дене шынықтыру пәні мұғалімі Бағдат Шаекеев бас бәйгені еншіледі. Ал 60 жастан жоғары қатысуышар арасында «Наркескен» спорт клубындағы футбол үйірмесінің жаттықтырушысы Жанқожа Қаниев мықтылығымен көзге түсті. Келесі орынға Р.Бектібаев жайғасса, Шаки­зада Мұстафа үздік үштікті түйіндеді. Жеңімпаздар аудандық дене тәр­биесі, спорт және туризм бөлімінің медаль, дипломдарымен және ау­дан­дық жабық бассейннің арнайы сый­лықтарымен марапатталды.

«ЖЖ» ақпарат