Адам өміріне араша болып, дертіне шипа сыйлайтын ақ халаттылардың адал еңбегі қашан да құрметке лайық. Олардың тынымсыз тіршілігі, бір күндік жұмысы қаншалықты қауырт екені айтпаса да белгілі. Осы ретте кеше аудандық ауруханадағы жансақтау бөліміне бас сұқтық. Бөлім меңгерушісі Мақсат Серікұлымен бірге тазалықты сақтау мақсатында халат пен бетперде тағып, науқастар жатқан палатаға қарай бағыт алдық.

Бір мезетте 6 науқасқа медициналық қызмет көрсететін бөлімге күнде ауыр жағдайдағы науқастар түседі. Олардың жағдайы бірқалыпқа түскенше бөлімдегі дәрігерлердің бақылауында болып, диагноздарына сай қажетті ем-шара жүргізіледі. Бөлім меңгерушісі Мақсат Елеместің айтуынша мұнда 6 науқасқа арналған төсек орынның 1-еуі балаларға, 5-еуі ересектерге арналған. Мақсат Серікұлынан бөлек, мұнда Нұрболат Балтабайұлы, Бекболат Ержанов, Нұрбек Ақмұрзаев сынды білікті реаниматологтар жұмыс істейді. Мұнан бөлек, 1 аға мейіргер, 7 кезекші анестезист мейіргер, 1 шаруашылық мейірбикесі, 5 кезекші кіші аяжан бар.

Сондай-ақ 2 екпінді ем жүргізу па­ла­тасы мен 1 оқшаулау палатасы, 1 ем шара бөлмесі мен аппараттарды сақтау, А және Б тобындағы дәрі-дәрмектерді сақтау бөлмесі бар.
Қазіргі таңда бөлімшеде 5 науқас ем алуда. Мақсаттың айтуынша, нау­қастар пневмония, инсульт сынды диагнозбен түскен. Анезтезиолог-реа­ниматолог дәрігердің айтуынша, был­тыр бұл бөлімнен 400-ден астам нау­қас ем қабылдаған. Мұның ішінде облыстық көп бейінді орталыққа да жағдайының ауырлығына байла­нысты ауыстырылғандар да бар. Яғни бұл бөлімде тасымалдаушы ме­­ди­ци­налық топ сырқаты ауыр нау­қас­тарды облыстық медицина орта­лы­ғына апарады.
Былтыр өзге емдеу орталық­тарына 165 науқас орналастырылған. Оның ішінде қант диабеті мен 2 науқас, жедел ішек инфекциясымен 1 науқас, церебральды васкулярлы ауру түрімен 1 науқас, жедел ко­ронарлы синдромы сырқатымен 5 нау­қас, инсультпен 38 науқас, ба­лалардағы пневмониямен 9 науқас, асқазаннан қан кетумен 1, өт жолы­на тас байлану сырқаты бойынша 5, нефритикалық синдром­мен 5, жүк­тілікпен 3, нәресте пато­ло­гиясымен 14, ауыр жарақат алған 20 науқас ауыстырылған.
– Былтыр жылдың соңында 50-ден асқан бір ер адамды қала­дағы емдеу орталығының біріне ауыс­тырдық. Біздің бөлімде 20 күн жатып ем алған болатын. Науқас ең алдымен пневмония сырқаты бо­йынша түсті. Одан кейін сырқаты асқынып тоқ ішектің өтімсіздгі диаг­нозына әкеліп соқты. Осында әріп­тестеріммен бірге ота жасадық. Қазіргі таңда облыстық медицина орталығында жатып ем қабылдауда. Бұл науқастың жағдайы өте ауыр болды. Өйткені ол бір емес, бірнеше сырқат түрімен ауырады. Науқасқа облыста да ота жасалды. Ал биыл жыл басынан бері түрлі диагнозбен 33 науқас өзге емдеу орталықтарына ауыстырылды. Оның 17-сі бөлімде жатқан науқастар болса, 16-сы қабылдау бөлімінен ауыстырылған. Мәселен бүгін бір науқасты облысқа ауыстырып жатырмыз. Ол жедел коронарлы синдромы сырқатымен бөлімде 3 күн ем қабылдады. Нау­қастан қайта-қайта анализ алып, 3 күн бойы жағдайын бақыладық, – дейді Мақсат Серікұлы.
Дәрігер науқастардың басым көп­шілігі жол апаты, қант диабеті, ин­сульт сынды сырқаттар бойынша түсетінін айтты. Ал балалалар бронхит, ларингит, пневмония сынды сырқаттармен шағымданып келеді. Жүкті әйелдер кесір тілігі арқылы босанғаннан кейін міндетті түрде бөлімде дәрігерлер бақылауында бо­лады. Сондай-ақ ауыр босанып, көп мөлшерде қан жоғалтқан аналар да өз-өзіне келіп, ес жиғанша 2-3 күнге дейін осында ем қабылдайды.
Дәрігер сұқбат барысында көп­теген науқастардың дәрігердің қа­был­дауынан жиі өтпейтінін, тек­серуден қашып, ауру қысқанда ғана дәрігердің көмегіне жүгінетінін тілге тиек етті. Яғни ауруын асқындырып келетін науқастар көп. Бөлім мең­герушісінің айтуынша былтыр бө­лім­шеде қайтыс болған науқастар саны 22-ге жеткен. Өкінішке орай, бұл көрсеткіш 2023 жылмен салыс­тырғанда әлдеқайда артқан.
Бөлімше стандартқа сай меди­циналық құрал-жабдықтармен толық қамтамасыз етілген. Мәселен, мұнда жүректің электрлік белсенділігін өлшейтін электрокардиограмма, жү­рекке шағын электрлік импульс не­месе электр тоғының соғуын жіберу арқылы науқастың жүрек соғысын қалпына келтіретін де­фиб­риллятор, тері астындағы тамырларды бей­нелеуге көмектеетін веновизор құ­рылғылары бар. Дәрігер бұл құрыл­ғының көмегімен тамыры жіңіш­ке егде жастағы науқастар мен бала­лар­дың тамырын тез табуға болаты­нын айтады. Мұнан бөлек ин­фузиялық до­заторлар мен өкпені жа­санды желдету аппараттары да бар.
– Біз көбіне ангиокатетер қол­данамыз. Себебі ол ыңғайлы және кез келген уақытта пайдалануға бо­лады. Науқастың тамырын бір-ақ рет тесіп 5-7 күнге дейін қолданамыз, – дейді ол.
Жансақтау бөліміндегі жұмыс қаншалықты ауыр болса, мұндағы қыз­меткерлердің жауапкершілігі де соншалықты жоғары. Олар нұс­қау­лықты дер кезінде орындап, науқас­тарға қажетті екпе мен басқа да көмектерді сапалы түрде көрсетеді. Яғни әр адамның шыбын жаны үшін көз ілмей, тәулік бойы қызмет етеді.

Ақтоты БҮРКІТБАЙ