Тілшілік тірлікпен кеше тағы жолға шықтық. Бұл жолғы бағытымыз – Мәдениет ауылы. Бұл ауылдың тынысымен бұған дейін де етене таныспыз. Ауыл жастары білім, өнер, спорт додаларында топ жарып, бас бәйгені еншілеп келгенде олардың жеңісін оқырман қауымға жеткізу үшін арнайылап ауылға атбасын бұрғанбыз. Ал бүгін мұнда келудегі мақсатымыз – соңғы жылдары ауылда атқарылған ауқымды істер мен жүзеге асатын жарқын жобалардың жай-күйімен танысу.

Ауыл әкімі Төлеген Қорғанбектің айтуынша, былтыр 1,3 млн теңгеге ауылдың ішкі көшелеріне жасыл бел­деуді қоршау және 522 мың теңгеге ауылды көр­кейту көғалдандыру жұмыс­тары жүр­гізілген. Мәдениет ауыл­­­дық ок­ругі әкімі аппаратының ғи­маратына 3 бейнебақылау камерасы орна­ты­лып, құны 2,6 млн теңгені құ­райтын «Же­ңіс» бағы жанында орна­лас­қан спорт алаңына жөнделген. Мұ­нан бө­лек ауыл тұрғындарының демеу­ші­лі­гімен 3,5 млн теңгеге А.Құнанбаев көшесі бойынан 0,10 гектарды құрайтын балалар ойын алаңы мен саябақ, Ж.Жабаев көшесіне 0,15 гектар жерге ағаш көшеттері отыр­ғызылып, «ӘлемТрансЖол» ЖШС де­меу­шілігімен 7 млн теңгеге ауызсу мұна­расы ауыс­ты­рыл­­­ған.
Қазіргі таңда ауыл тұрғындарының 90 пайызының есік алдына ауызсу жет­кізілген. Сондай-ақ жалпы құ­ны 199,8 млн теңгеге Жа­ңа­қо­ныс кө­шесін орташа жөндеуге ЖСҚ әзір­­­­леніп, қаржыландыру үшін тиіс­ті бас­­қармаларға бюджеттік өтінім жол­дан­ған. Ал Ж.Тайшиев көшесі бойы­нан 250 метр жерге жаңадан қоршау жұ­мыс­тары жүргізіліп, алдағы көктемде ағаш отыр­ғызуға дайындық жұмыстары жүргі­зілді.

Кәсіпкерлік қарқын алған

2 мыңға жуық халқы бар ауылда жұмыс­сыздық деңгейі 1,5 пайызды құрайды. Мұнда 139 кәсіпкерлік субъек­тісі тіркеліп, қазіргі таңда оның 108-і нақты жұмыс істеп тұр. Оның ішін­де 1 ЖШС, 5 кооператив, 48 шаруа қо­жа­лық, 85 жеке кәсіпкерлік субектісі бар. Мұнан бөлек 5 күріш ақтайтын диірмен, 10 жеке кәсіпкердің сауда дү­кені, 1 қоғамдық монша, 2 автокөлік жуу ор­­талығы тұр­ғын­­дарға қызмет көр­се­ту­де.
– Ауылда соңғы жылдары көптеген жарқын жоба жүзеге асты. Жаңадан спорт мектебі, мәдениет үйі, 90 орындық балабақша бой көтеріп, ел игілігіне берілді. Жаңа нысандар тек ауыл мәдениеті мен спортына серпін беріп қана қоймай, ауылдағы жұмыссыздық мә­селесіне тұсау болды, – дейді ауыл әкімі.
Мәдениеттегі мәдениет ошағындағы кітапхана да оқырмандарға сапалы қыз­мет көрсетіп, ауыл жастарының бос уақытын тиімді өткізу мақсатында түр­лі шаралар өткізіп, жастарды кітап оқуға баулуда. Мұнан бөлек 80-ге жуық бала спорт мектебінде тұрақты шұғыл­данып, республикалық жарыстарда Азия, Әлем чемпионатында жеңіспен ора­­­лып жүр.
Ауылда егін, мал шаруашылығынан бөлек кәсіпкерлік саласы да қанат жайып келеді. Бұрын жергілікті тұрғындар тек егін және мал шаруашылығымен айналысса, бүгінде сала түрленген. Сұхбат бары­сын­да ауыл әкімі «Кәсіп істеп, шаруамды ширатамын» деген жастарға қашан­да қолдау көрсетіп, сүйемелдеу жұмыс­тарына дайынмын» деген болатын.
Былтыр мемлекет тарапынан бе­ріл­ген қолдауды 8 тұрғын тиімді пай­даланып, өз кәсібін бастағанына қа­рап, ауыл әкімінің кәсіпкерлік сала­сы­на серпін беруде аянып қалмағанын аң­ғардық. Қайтарымсыз грант жеңіп алған ауыл тұрғындарының басым көп­шілігі мал шаруашылығын дамытуда. Мә­селен, Жандос Байболов мал бор­да­­қылау ісімен айналысып кәсібін өркен­детсе, Серік Бөдешов, Асылхан Қаппаров, Есенкелді Ердесов, Әйгерім Тапаева сынды тұрғындар мемлекеттің қайтрамсыз қаржысына қол жеткізіп, жылқы, сиыр өсіру бағытында жұмыс істеп жатыр. Мұнан бөлек бір кәсіпкер кондитер өнімін қолға алған. Ауыл тұр­ғындарынан бөлек көршілес ауыл­да­ғы ағайынға да өз өнімін ұсынған кә­сіпкер кәсібінің көк­жиегін кеңейтіп, мемлекет тарапынан та­ғы да қолдау болса, ауласынан үлкен цех ашып, жұмыссыз жастардың санын азайт­­пақ.
Ауылдағы кәсіпкерлер қайырымды­лық шараларынан тыс қалмайды. Игі­­лікті істердің басы-қасынан табы­латын ша­руашылық басшылары іс-ша­­раларда, мерекелерде ауыл қарт­тарына сый-сияпат жасайды. Одан бөлек мұқтаж жандарға, тұрмысы төмен отбасыларға да көмек қолын созып, өзгелерге үлгі болып жүр.

Ауыл экономикасының негізгі тірегі – егін шаруашылығы. Соның ішінде күріш егумен айналысатын бұл ауылда бүгінде бірнеше шаруа қожалық бар.
Мәдениет ауылының жалпы жер көлемі – 11 718 гектар. Оның ішінде ша­бындық жер көлемі – 7 850, егістік жер көлемі – 4 275 гектар. Мұнан бөлек 1 397 гектар жайылымдық жері тағы бар. Былтыр көктемгі науқанда 1157 гектар күріш, 269 гектар жаңа жоңышқа, 139 гектар мақсары егілген. Сондай-ақ ауыл тұрғындарына бау-бақша егуге шаруашылық басшы­ларының көмегімен елді мекеннің оң­түстік бетінен 25 гектар жер ашып беруге көмек көрсетілді.
– Бүгінде елді мекенде 11 ішкі көше бар. Оның 9-ы асфальтталған. Ал 2 көше күрделі жөндеуді қажет етеді. Биыл ауыл бойынша 4 көшеге жарықтандыру жұмыстарына ЖСҚ әзірлеп, Ж.Жабаев көшесіне жаңадан тас төсеу жұмыстары, Жаңақоныс көшесін асфальттау жұмыс­тары жүргізіледі, – деді ауыл әкімі.
Елді мекеннің ахуалы басқа ауыл­дардан көшілгері. Теп-тегіс жол, мек­теп, балабақша, мәдениет үйі мен спорт мектебі, кәсіппен айналысамын дегендерге қолдау, бәрі де ауыл игілігіне жұмыс істеп тұр. Тұрғындар қай істе де ауызбіршілік пен ынтықмақты ту еткен. Сондықтан ауылда атқарылған жобалар сәтті жүзеге асып отыр.

А.ЕРЖАНҚЫЗЫ