Қазіргі таңда мемлекеттік қызмет саласына қойылатын талап күннен-күнге артып келеді. Себебі мемлекеттік қызметші – халық пен билік арасындағы алтын көпір. Сондықтан мемлекеттік қызметкердің кәсіби біліктілігімен қатар, оның әдебі, мәдениеті мен адамгершілік қасиеттері де ерекше маңызға ие.

Мемлекеттік қызмет әдебі – бұл қызметкерлердің қызмет барысында және күнделікті өмірде ұстануға тиіс моральдық-этикалық қағидаларының жиынтығы. Ол азаматтармен қарым-қатынас жасау мәдениетін, адалдықты, әділдікті, жауапкершілікті және заңға құрметті қамтиды. Әдеп нормаларын сақтау мемлекеттік органдардың беделін көтеріп, халықтың сенімін нығайтады.

Мемлекеттік қызметші өз жұмысында халық мүддесін бірінші орынға қоюы қажет. Әрбір азаматтың өтінішіне мұқият қарап, сабырлы әрі сыпайы жауап беру – мемлекеттік қызмет әдебінің басты талаптарының бірі. Қандай жағдай болмасын қызметкер дөрекілікке, немқұрайлылыққа немесе артық сөзге жол бермеуі тиіс.

Сонымен қатар, мемлекеттік қызметші қызметтен тыс уақытта да қоғам алдында үлгілі болуы керек. Себебі оның жүріс-тұрысы мен сөйлеген сөзі мемлекеттік органның абыройына әсер етеді. Әдептілік, қарапайымдылық, тәртіптілік сияқты қасиеттер әрбір мемлекеттік қызметкерге тән болуы қажет.

Мемлекеттік қызмет әдебінің маңызды бағыттарының бірі – сыбайлас жемқорлыққа қарсы мәдениетті қалыптастыру. Адал қызмет ету, заң талаптарын сақтау және жеке мүддені қызмет мүддесінен жоғары қоймау – мемлекеттік қызметшінің негізгі қағидалары.

Мемлекеттік қызмет әдебі – қоғам сенімінің негізі. Әдепті, жауапты әрі кәсіби мемлекеттік қызметші мемлекет беделінің артуына және ел дамуына өз үлесін қосады. Халыққа сапалы қызмет көрсету мен әділдікті сақтау – әрбір мемлекеттік қызметкердің басты міндеті.

Г.Айымбетова – басқарма басшысы