Әрине, жағымсыз хабармен бөлісу бізге де оңай емес. Қазақ «ауырып ем іздегенше, ауырмайтын жол ізде» демекші, дерттің алдын алған тиімдірек екені белгілі. Қысқасы, осыдан 3-4 жыл бұрын әлемге үрей тудырған дерт қайта бас көтерді. Енді ғана есін жиған халық «қайтадан карантин бастала ма?» деген үрейде. Денсаулық сақтау вице-министрі, бас мемлекеттік санитар дәрігер Айжан Есмағамбетованың мәліметінше, бүгінде елімізде коронавирус жұқтырғандар саны 2 есе өскен.

Нақтырақ тоқталсақ, ДСМ Сани­тариялық-эпидемиологиялық бақылау ко­ми­те­тінің мәліметінше, 2024 жылғы қаң­­тарда былтырғы желтоқсанмен са­лыс­­тырғанда коронавирус жұқтырған қа­зақстандықтардың саны 2,5 есе өсіп, 477 адамға жеткен. 2023 жылғы желтоқсанда 187 адам коронавирус жұқтырған. СOVID-19 жұқтырғандардың ең көп саны Ал­­маты (143 адам) және Астана (74 адам) қалаларында тіркелген.
Биыл 26 қаңтар және 1 ақпан ара­­лығында елде жалпы 155 адам СOVID-19 жұқтырған. Бір аптада ауру жұқ­тырғындар 26 адамға артқан. Бас дә­рігердің айтуынша, бүгінде Омикрон штамы тарап жатыр. Алайда ауру жеңіл түрде өтуде. Ауруханаға жат­қызу дең­гейі, өлім-жітім көрсеткіші өзгер­меген. ДСМ ауру жұқтыру көр­сет­кішінің өсуіне қарамастан карантин шектеуі ен­гізіл­мей­тінін хабарлады. Десе де енді тұр­ғын­дар жабық ғимараттарда және қо­ғамдық көліктерде маска тағып жүруге міндеттелмек.

Маска тағу
міндеттелмек

Осы орайда кеше бас мемлекеттік сани­тария дәрігері Айжан Есмағамбетова «Ауа-тамшы жолы арқылы берілетін ин­фекциялық аурулардың таралуының ал­дын алу жөніндегі профилактикалық ша­ра­ларды күшейту туралы» қаулыға қол қойып, маска тағу міндетті орындарды бекітті.
Қаулыда «Санитариялық-эпидемио­ло­гиялық бақылау комитетінің облыс­тар­дың, Алматы, Астана, Шым­кент қа­­­­ла­­ларының денсаулық сақтау бас­қарма­­­­ларының, аумақтық департамент­­те­рінің басшылары медициналық ұйым­дар­­да персоналдың және келушілердің ме­дициналық маскаларды пайдалануын, антисептиктердің болуын, сондай-ақ халық арасында COVID-19 коронавирус инфек­циясының, тұмаудың және ЖРВИ профилактика шаралары туралы ақпа­раттық-түсіндіру жұмысын жүргізуді қам­тамасыз етсін» деп жазылған.
Сонымен қатар бас санитар об­лыстар мен Алматы, Астана, Шымкент қа­лаларындағы халық көп жиналатын жерлерде, яғни әуежайлар, теміржол вок­залдары, автовокзалдар, базарлар, сауда ойын-сауық орталықтары, сауда үйлері, театрлар, кинотеатрлар, ХҚКО-ы, банктер және көліктің барлық түрлерінде, нақтырақ айтсам, қоғамдық көлік, әуе, темір жол қатынастарында медициналық немесе матадан тігілген маскаларды пай­далануға ұсыным берілсін деді. Қаулы қол қойылған күннен бастап күшіне енді.

2 коронавирус
инфекциясы анықталған

Аудандағы ахуалға тоқталсам, аудан­ның бас санитары Гүлзираш Айым­бе­това­ның айтуынша, Жалағашта жыл ба­сынан бері 2 коронавирусты ин­фек­циясы есепке алынып, барлығы зерт­ханалық жолмен нақтыланған. Нау­қас­тар жедел респираторлы вирусты ин­фек­циясымен ауырып, медициналық көмекке жүгінген. Бүгінгі науқастың бірі аудандық ауруханада ем алса, бірі үй жағдайында ем қабылдауда. Науқастың біреуі коронавирусты инфекцияға қарсы екпе алған.
Біз бүгінде коронавируспен күресудің ең тиімді амалы екпе алу екенін айт­пасақ та білеміз. Жалпы, мамандардың айтуынша, 2021-2023 жылдары 67 988 жалағаштық коронавирусқа қарсы екпе қабылдаған. Сондықтан алаңдаудың еш реті жоқ, десе де мамандар міндеттеген талаптарды орындаған абзал.

Жандос ЖАЗКЕН