Қазіргі уақытта ақпараттық технологиялардың дамуы қоғам өмірінің барлық саласына еніп, мемлекеттік органдардың жұмысын жеңілдетуге және тиімділігін арттыруға мүмкіндік беруде. Соның ішінде сот жүйесінде енгізілген цифрлық қызметтердің бірі – электронды сот отырыстарын өткізу тәжірибесі.
Электронды сот отырысы – сот процесіне қатысушылардың сот ғимаратына келмей-ақ, бейнеконференцбайланыс арқылы сот отырысына қатысуына мүмкіндік беретін заманауи формат. Бұл жүйе сот төрелігінің қолжетімділігін арттырып, уақыт пен қаржылық шығындарды үнемдеуге ықпал етеді.
Электронды сот отырысын ұйымдастыру барысында сот отырысының хатшысының рөлі ерекше. Сот отырысының хатшысы сот отырысына қатысушыларды алдын ала хабардар етіп, олардың бейнебайланыс жүйесіне қосылу мүмкіндігін тексереді. Сонымен қатар сот отырысы басталғанға дейін техникалық құралдардың дұрыс жұмыс істеуін қадағалап, сот процесінің үздіксіз өтуіне жағдай жасайды.

         Сот отырысы барысында хатшы сот отырысының хаттамасын жүргізіп, қатысушылардың жеке басын анықтау, олардың қатысуын тіркеу және техникалық жазбаның жүргізілуін қамтамасыз ету сияқты міндеттерді орындайды. Бұл сот процесінің заң талаптарына сәйкес әрі тәртіппен өтуіне көмектеседі.
         Электронды сот отырыстарының тағы бір артықшылығы – шалғай елді мекендерде тұратын азаматтардың сотқа қолжетімділігін арттыруы. Қатысушылар өз өңірінен немесе тұрғылықты жерінен сот процесіне қатыса алады. Бұл әсіресе уақытты үнемдеп, сот ісін жедел қарауға мүмкіндік береді.
Бүгінде сот жүйесінде цифрлық технологияларды қолдану сот төрелігінің ашықтығы мен қолжетімділігін арттыруға бағытталған. Электронды сот отырыстарын өткізу – осы бағыттағы маңызды қадамдардың бірі.
         Қорытындылай келе, электронды сот отырысын ұйымдастыру сот жүйесінің заман талабына сай дамып келе жатқанын көрсетеді. Бұл жүйе сот төрелігінің тиімділігін арттырып қана қоймай, азаматтардың құқықтарын қорғауға да оң ықпал етеді. Ал сот отырысының хатшысы электронды сот процесінің сапалы әрі дұрыс ұйымдастырылуына үлес қосатын маңызды тұлға болып табылады.

                                                                                       Жалағаш аудандық сот

                                                                                       Әкімшісінің бас маман – сот

                                                                                       отырысының хатшысы Ғ.Сахи