Сот жүйесіндегі әділдік тек шешім шығарумен ғана шектелмейді.   

       Қабылданған үкім мен қаулының заңға сәйкестігі де аса маңызды. Кей жағдайда төменгі сатыдағы соттар құқық нормаларын дұрыс қолданбауы немесе іс жүргізу барысында қателік жіберуі мүмкін. Осындай жағдайда кассациялық саты құқықтық бақылаудың маңызды тетігі ретінде әрекет етеді.
       Кассация — заңды күшіне енген сот актілерін қайта тексерудің ерекше механизмі. Бұл сатыда іс қайтадан басынан қаралмайды. Негізгі назар соттардың заңды дұрыс қолдануына аударылады. Яғни кассациялық сот фактілерден бұрын құқықтық бағалауға мән береді.

       Көпшілік кассацияны апелляциямен шатастырып жатады. Алайда олардың айырмашылығы айқын. Апелляциялық сатыда дәлелдер қайта зерттеліп, куәлар тыңдалуы мүмкін. Ал кассациялық қарауда сот төменгі инстанциялардың заң талаптарын қаншалықты сақтағанын тексереді. Бұл құқықтық жүйедегі тұрақтылықты қамтамасыз етеді.

      Қазіргі таңда Қазақстан Республикасының Жоғарғы Соты жанындағы кассациялық тәртіп азаматтардың құқықтарын қорғауда ерекше рөл атқарып отыр. Әсіресе соңғы жылдары сот тәжірибесінде заңды біркелкі қолдануға басымдық берілуде. Бұл әр өңірдегі сот шешімдерінің өзара қайшылыққа түспеуіне ықпал етеді.

        Кассациялық шағым беру — әр азаматтың заңмен қорғалған құқығы. Егер адам сот шешімімен келіспесе және құқық нормалары бұзылды деп есептесе, жоғары сатыға жүгінуге мүмкіндігі бар. Мұндай тетік сот қателіктерін түзетуге және әділ шешім қабылдауға жол ашады.

       Заңгерлердің пікірінше, кассациялық сатының басты ерекшелігі — құқықтық мәдениетті қалыптастыруында.

       Себебі бұл механизм соттардың жауапкершілігін арттырып қана қоймай, құқық қолдану тәжірибесін жетілдіреді. Әрбір қаралған іс кейінгі сот тәжірибесіне де ықпал етуі мүмкін.

      Бүгінде қоғамда заң үстемдігіне деген сұраныс артып келеді. Осы тұрғыдан алғанда кассация — азаматтардың құқықтарын қорғаудың сенімді құралдарының бірі. Ол сот төрелігінің сапасын арттырып, құқықтық мемлекеттің негізгі қағидаларын нығайтуға қызмет етеді.

                                                                 Жалағаш аудандық сот әкімшісінің                                                                  бас маманы Р.Аккасинов